Dar pơrjum neh ai jơnau đơs bè 8 tơngume. Pal sền gròi là bè bè jơnau rơcang cih Jơnau yal cồng nha jat sền mìng dùl tơngume “Broă lam lơh bơta dong kờl, adat boh lam bè bơtàu tơnguh mờ ngui cau lơh broă lơh jat jơnau sồr bơtàu tơnguh lơh sa – mpồl bơtiàn, ngan là cau lơh broă geh bơta niam uă”, tam gơl broă lơh lơh adat boh lam nam 2025; ai jơnau đơs bè broă tơn jơh pơrjum dơ̆ 9 mờ jơnau đơs bơh sơn rờp bè broă rơcang tus pơrjum dơ̆ 10…

Anih duh broă lơh kơnòl broă sùm Quôk hội kung sền sơ wì, ring bal 3 jơnau lơh nền tàm pơrjum gơ wèt gơnăp gơnoar, geh: Jơnau lơh nền tam pơrjum tam gơl, bơtơl bàr pe bơta bơh Jơnau pal jat lơh broă bơh Anih duh broă Lơh kơnòl broă sùm Quôk hội dê; Jơnau lơh nền tàm pơrjum bè tă priă bơyai lơh mờ broă lơh sền gàr rềs àr mpồl bơtiàn, sền gàr ờ geh broă lơh tơngai bơh nam 2025 tus nam 2027; Jơnau lơh nền tàm pơrjum bè jơnau pal jat, broă lơh mờ khà tam pà kờp dŭ lài tă dơ̆ ngui sùm kes priă dà lơgar nam 2026.

Củ tịc Quôk hội ồng Trần Thanh Mẫn pà git, dar pơrjum geh lơh tơnơ̆ pơrjum dơ̆ 9 bơh Quôk hội dê lơh geh cồng nha niam bơnĕ. Pơrjum neh ring bal jơnau lơh nền tàm pơrjum tam gơl, bơ tơl bàr pe bơta bơh Sơnua boh lam nam 2013 dê, ring bal 34 adat boh lam, 34 jơnau lơh nền tàm pơrjum. Tŭ do, ală cau ala mat Quôk hội gam lam lơh broă tìp mat cau tĕ khà tàm 34 càr, ƀòn dờng tàm gùt lơgar. Kuơmàng, tơnơ̆ pơrjum dơ̆ 9, Quôk hội, Cíñ phủ, ală Ƀộ, Gah broă lơh mờ ală càr, ƀòn dờng lam lơh broă mơ tơn, ngan là broă lam lơh gơnoar atbồ ƀòn lơgar 2 kâp.

Jat Củ tịc Quôk hội đơs, broă ai jơnau đơs bơh sơn rờp bè jơnau rơcang cih Jơnau yal jat sền mìng dùl tơngume “Broă lam lơh bơta dong kờl, adat boh lam bè bơtàu tơnguh mờ ngui cau lơh broă lơh jat jơnau kờñ bơtàu tơnguh lơh sa mpồl bơtiàn, ngan là cau lơh broă geh bơta niam uă” ngan ngồn, ờ mìng geh kuơ jŏ jòng tàm tŭ tơngai dà lơgar he gam mut tàm tŭ tơngai bơtàu tơnguh pa, kờñ geh cau lơh broă geh bơta niam uă lơh bơnàng jă ai gơguh lơh sa mhar mờ kơ̆ kơljap jŏ jòng sùm in.

Tơngai tus, Ƀộ Cíñ trị kung rơp yal ală Jơnau lơh nền tàm pơrjum tơrgùm ai bơtàu tơnguh bơto bơtê mờ bơsram mờ tàm gah sền gàr pràn kơldang să jan làng bol in. Pa do, Quôk hội neh ring bal 3 jơnau lơh nền tàm pơrjum kuơmàng bè gah jak chài, tam gơl pa bơceh lơh, tam gơl sồ; Jơnau lơh nền tàm pơrjum bè tam gơl pa broă lơh bơt bơtàu mờ lơh jat adat boh lam lơh jat jơnau kờñ bơtàu tơnguh dà lơgar tàm rài pa; Jơnau lơh nền tàm pơrjum bè bơtàu tơnguh lơh sa cau nă să is.

Bơdìh hơ̆ tai, tàm pơrjum dơ̆ 9, Quôk hội kung neh ring bal Adat cau pơgru, Jơnau lơh nền tàm pơrjum bè ờ sa, dong kờl priă bơsram gơ wèt mờ kơnòm mầm non, kơnòm bơsram pe kâp. Cíñ phủ yal Jơnau lơh nền tàm pơrjum bè broă sền gròi ai ală kơnòm bơsram tàm tiah kơh bơnơm in.

Bè broă sền sơ wì, tam gơl Broă lơh lơh adat boh lam nam 2025, Củ tịc Quôk hội sồr lơh jat jơnau sồr ngan ngồn. Củ tịc Quôk hội ồng Trần Thanh Mẫn đơs sùm, nam 2025, broă lơh bơt bơtàu adat boh lam pal lơh jat gơtùi jơnau sồr lơh pràn tă bơsong ală kal ke, kòl yan tàm gah lơh sa – mpồl bơtiàn, sền gàr dà lơgar, lơngăp lơngai kung bè bơt bơtàu mpồl lơh broă sră pơ àr gơnoar atbồ 2 kâp: “Tơnơ̆ pah dơ̆ pơrjum, bol he rơp lam lơh sền sơ wì, tơn jơh dùl bă tơl làm, bơh hơ̆, tơrgùm ală broă pal pơn jat tai đòm jat, tam gơl pa nàng cèng wơl cồng nha, lơh gơlik bơta tam gơl pràn tàm broă lơh bơh Quôk hội dê. Pơrjum dơ̆ 10 là pơrjum dut ndơl bơh tơngai lơh broă dê, lơh sir jơh ală kơnòl broă neh ai tơlik, mờ kung lơh gơlik bơnàng jă ai tơngai lơh broă tus in. Mờ bơta kuơmàng bè hơ̆, broă rơcang lài wil tơl, nền nòn, tam gơl pràn jơh bal bè tơngume, broă lơh mờ bơta niam nàng đơs nền gơnoar broă tề lam, bơt bơtàu bơh Quôk hội mờ Cíñ phủ dê”.

Củ tịc Quôk hội đơs là, tơngai tus là ală nhai dut nhơl bơh tơngai lơh broă Quôk hội khoă XV dê mờ khà broă uă ngan, uă kơnòl cíñ trị kuơmàng, mờ jơnau sồr dờng rlau bal mờ kơnòl kung dờng rlau. Bè hơ̆ den tàng ală anih lơh broă bơh Quôk hội dê pal pơgồp bal jơh nùs mờ Cíñ phủ, ală anih lơh broă geh gơ rềng, tơrgùm lơh gơs ală kơnòl broă geh jàu tàm broă lơh, broă rơndap lơh neh ai tơlik bơh nam 2025 mờ jơh gùt tơngai lơh broă khoă XV dê. Mờ kung lơh jat jơnau sồr lơh bơh kâp geh gơnoar dê, rơcang lài yal mờ lam lơh mơ ală kơnòl broă pa, mờ kung mhar crăp rơcang ală tơngume yal Anih duh broă Lơh kơnòl broă sùm Quôk hội dê in gàr di tŭ tơngai hơ pơrgon, bơta niam, pleh tơrgùm broă rềp mờ ngai lơh pơrjum.