Tàm Pôs đồng ling sền gàr tiah nhàr lơgar Mpồng nhàr lơgar ală lơgar Lệ Thanh, broă lơh “Pah poh dong dùl hìu bơnhă rƀah tàm tiah nhàr lơgar” geh lam lơh mờ 52 nă đảng viên drơng 132 hìu bơnhă, uă ngan là hìu bơnhă rƀah. Cau ling dong kờl ngai lơh broă, bơto pơlam làng bol sơng ka sền gàr phan tam, sơng ka niam suơn chi, tơnguh uă cồng nha lơh sa. Bi Hi Kri, kòn cau H’rê, hìu bơnhă rƀah tàm ƀòn Bi, sàh Ia Dom, càr Gia Lai, là dùl tàm ală cau geh mpồl ling sền gàr tiah nhàr lơgar dong kờl. Bơta lòt bal, bơto pơlam jơh nùs jơh tồr bơh ală cau ling dê dong hìu bơnhă bi Hi Kri in geh tai ală bơta tam gơl niam broă lơh sa mờ rài kis.

“Chờ hờp ngan, ơm bal mờ cau ling den chờ hờp ngan. Tàm tiah nhàr lơgar den hìu bơnhă kung ơm rềp mờ cau ling, cau ling dong kờl hìu bơnhă kung uă ngan sơl. Hìu bơnhă ưn ngài uă ngan”.

Ờ mìng lòt bal mờ làng bol tàm broă lơh sa, lơh broă lơm, kwang bàng, cau ling Pôs đồng ling sền gàr tiah nhàr lơgar Mpồng tiah nhàr lơgar Lệ Thanh gam sền gròi dong kờl ală hìu bơnhă dờp bơta dong kờl mpồl bơtiàn, cau geh màng mờ dà lơgar. Pah nhai, mpồl ling lam lòt lùp còp, pà phan, kham pràn kơl dang să jan mờ pà sơnơm ờ sa priă ai ală hìu bơnhă dờp bơta dong kờl mpồl bơtiàn tàm ù tiah do dê. Ală broă lơh bơta nđàc pơgồp bơnah sền gròi rài kis, tơngŏ kơnòl bơh cau ling dê gơwèt mờ ală cau neh tă pơgồp dà kơl hề, phi să tài broă lơh sền gàr Dà lơgar tờm. Cau ling sồt să 4 tàm 4 Rơ Chăm Nich, ơm tàm thôn Moóc Đen, sàh Ia Dom, sền gĭt loh ngan bơta tam klăc hơ̆ bơh ală dơ̆ cau ling lùp còp, dong kờl tŭ kòp tê jê să mờ tàm ală dơ̆ lơh chờ dà lơgar, sa tềp dà lơgar:

“Kòp jê dilah mờ ờ di tŭ lòt hìu sơnơm den tus hìu sơnơm tiah ƀòn Bi bơh ling sền gàr tiah nhàr lơgar dê. Đơs bal là oh mi ling sền gàr tiah nhàr lơgar tàm ngai chờ, ngai sa tềp den sùm tus lùp còp hìu bơnhă, pà phan. Oh mi tàm tiah do bè hơ̆ lơm, cau lơi kung kờñ, kung gơboh lơm”.

Bơh ală broă lơh geh ngan tàm sền gàr tàm rài kis, broă lơh hòi jà làng bol gam tă pơgồp bơnah sơlơ tơnguh tai bơta tam klăc bal đah làng bol mờ mpồl cau lơh kơnòl broă sền gàr tiah nhàr lơgar. Đại úy Trần Tuấn Linh, Chính trị viên phó Pôs đồng ling sền gàr tiah nhàr lơgar Mpồng tiah nhàr lơgar ală lơgar Lệ Thanh, pà gĭt, mpồl ling lam lơh uă broă lơh wèt tus tàm ƀòn lơgar bè lơh hìu ơm bơta nđàc, hìu Tam klăc dờng, lùp còp hìu bơnhă geh bơta dong kờl mpồl bơtiàn, dong kờl priă bơcri lơh mờ bơta chài bơtàu tơnguh lơh sa. Bơh hơ̆, làng bol geh tai ală bơta nàng bè ờs wơl rài kis, mơkung tơnguh uă bơta gĭt wă, kơnòl tàm pơgồp bal sền gàr lơngăp lơngai rơndăp tăp sèng tàm tiah do dê.

“Bơh ală broă lơh dong làng bol bơtàu tơnguh lơh sa den làng bol tàm tiah nhàr lơgar kung neh geh bơta pin dờn mờ Mpồl ling sền gàr tiah nhàr lơgar. Is ồn bal mờ mpồl ling sền gàr tiah nhàr lơgar bè là dùl “jrong kis” lơh broă, lơh sa, lòt rê tàm tiah nhàr lơgar den pơgồp bal mờ Mpồl ling sền gàr tiah nhàr lơgar, mpồl lơh broă geh gơnoar tàm tiah mpồng tiah nhàr lơgar gàr niam lơngăp lơngai, rơndăp tăp sèng, rơndăp tăp sèng mpồl bơtiàn”.

Jat kềng gah gơl gùng tiah nhàr lơgar càr Gia Lai, broă lơh sền gròi rài kis làng bol dê sùm pơgồp bal mờ kơnòl broă hòi jà làng bol tus bal sền gàr gùng nhàr lơgar, jrong nhàr lơgar. Tàm Pôs đồng ling sền gàr tiah nhàr lơgar Ia Puch, kwang bàng, cau ling sùm ơm bal tàm ù tiah, pơgồp bal mờ kấp ủy, gơnoar atbồ mờ ală cau geh bơngă pin dờn mblàng yal jơnau, hòi jà làng bol tơnguh uă bơta rcang ngăc, rcang lài tus bal sền gàr lơngăp lơngai rơndăp tăp sèng. Trung tá Nguyễn Đăng Dũng, Mpồl Hòi jà làng bol, Pôs đồng ling sền gàr tiah nhàr lơgar Ia Puch, pà gĭt:

 “Broă lơh pah ngai den sùm lòt tus tàm ƀòn gĭt ală bơta, 3 jat 4 bal bal mờ làng bol, den là tă pơgồp jơnau đơs ai kra ƀòn, kwang lam bồ thôn in kơ̆p kờñ làng bol là bal mờ kấp ủy, gơnoar atbồ tiah do mờ kwang bàng cau ling pôs đồng ling sền gàr tiah nhàr lơgar là sền gàr lơngăp lơngai rơndăp tăp sèng. Bơdìh hơ̆ den kung hòi jà, mblàng yal ai làng bol in sền gròi lơh broă sa”.

Bal mờ broă jat làng bol, git ală tiah, ală broă lơh bè “Dong kờl oh lòt bơsram”, “Kòn ròng pôs đồng ling sền gàr tiah nhàr lơgar”, “Hìu ram mhŭ tiah nhàr lơgar” mờ broă lơh lùp còp, dong kờl làng bol tàm dơ̆ lơh chờ dà lơgar, dơ̆ sa tềp pơn jat tai pơgồp bơnah lơh jat broă lơh gàr tơl niam rài kis mpồl bơtiàn, sền gròi rơnàng kơnòm să mờ ală hìu bơnhă gam kal ke. Mò Siu H’Ler, Bí thư Đảng ủy, Chủ tịch Mpồl duh broă Làng bol sàh Ia Puch, đơs nền, bơta gĭt gơ̆p đah mpồl ling mờ kấp ủy, gơnoar atbồ mờ làng bol ngai sơlơ geh lơh kơ̆ kơl jăp, lơh geh bơta pràn tơrgùm bal tàm bơtàu tơnguh lơh sa- mpồl bơtiàn gơ jat bal mờ sền gàr tiah nhàr lơgar.

“Ală oh mi tàm mpồl ling sền gàr tiah nhàr lơgar sùm rcang lài pơgồp bal mờ ală cau tă pơgồp jơnau đơs ai kấp ủy, lam lơh ală kơnòl broă geh gơrềng tus gàr niam sền gàr dà lơgar bơdìh tiah nhàr lơgar. Mơkung dong làng bol tơn jơh rƀah, bơt bơtàu ƀòn lơgar pa, pơgồp bal mờ ală mpồl lòt sền sền gàr lơngăp lơngai tiah nhàr lơgar bơh dà lơgar dê”.

Ngan ngồn tàm ală ù tiah tiah nhàr lơgar pà gŏ, sền gàr gơnoar tờm, lơngăp lơngai dà lơgar ờ mìng jat tàm broă lơh lòt sền, gròi sền lơm mờ gam kờñ geh bơta dùl nùs bal, dùl bơta pràn bơh làng bol dê. Tŭ làng bol pin dờn, rcang lài pơgồp bal mờ mpồl lơh broă geh gơnoar, nùs nhơm rcang gàr lài sền gàr tiah nhàr lơgar gùt làng bol dê geh bơt bơtàu bơh tàm ƀòn lơgar. Đại tá Đoàn Ngọc Báu, Chính ủy Mpồl đơng lam Mpồl ling sền gàr tiah nhàr lơgar càr Gia Lai pà gĭt, do là bơnàng jă nàng ală tiah tàm tiah nhàr lơgar in kơ̆ kơl jăp, lơh geh ală bơta bơtàu tơnguh lơh sa mờ bơtàu tơnguh rài kis làng bol ală ƀòn lơgar.

“Lam lơh ală broă lơh lơh broă ờs mờng jat nền tàm ù tiah, den là jat nền ală cau nàng crăp rcang sền gàr lơngăp lơngai tiah nhàr lơgar, mơkung bơtàu tơnguh ròng phan, tam phan nàng dong làng bol in bơtàu tơnguh lơh sa niam chài mpồl bơtiàn”.

Gàr kơ̆ gơnoar tờm, lơngăp lơngai tiah nhàr lơgar mờ sền gròi rài kis làng bol là 2 kơnòl broă đềt mềr kơ̆ ngan. Bơh ală ngai lơh broă dong làng bol lơh broă sa, bơta tam pà bal mờ ală hìu bơnhă geh bơta dong kờl mpồl bơtiàn tus broă hòi jà làng bol tus bal sền gàr gùng nhàr lơgar, jrong nhàr lơgar, Mpồl ling sền gàr tiah nhàr lơgar càr Gia Lai gam pơgồp bơnah lơh kơ̆ kơl jăp nùs nhơm rcang gàr lài tàm làng bol, bơt bơtàu tiah nhàr lơgar lơngăp lơngai, kơ̆ kơl jăp. Tŭ rài kis ngai sơlơ geh sền gròi, bơta pin dờn mờ geh kơnòl bơh làng bol dê gơwèt mờ kơnòl broă sền gàr tiah nhàr lơgar kung geh bơtơl, lơh geh bơnàng jă nàng tiah nhàr lơgar càr Gia Lai in bơtàu tơnguh kơnhăp kơ̆.