Tus tŭ do, Ƀộ Tài nguyên mờ Môi trường neh đơng lam cih 6 Nghị địñ mờ 4 Thông tư, tàm hơ̆, mờ jơnau rơcang cih Nghị địñ cih mùl màl lam lơh jat 2, 3 bơta bơh Adat Ù tiah dê geh 10 tap, 115 bơta cih mùl màl 51 tơngume geh jàu tàm Adat, tơrgùm tàm jơnau cih bal bè: gơnăp gơnoar, kơnòl broă, rơndap tap sèng, mpồl lơh broă bơh mpồl lơh sră ù tiah, mpồl bơtàu tơnguh bă ù dê; jàu ù, ai ơpah, tam gơl jơnau kờñ ngui ù; bơsong tam pìt tam phà ù tiah, lơh glài broă lơh tìs adat boh lam bè ù tiah gơ wèt mờ cau geh broă lơh tìs adat boh lam bè ù tiah tŭ lơh kơnòl broă tàm gah ù tiah.

Thứ trưởng Ƀộ Tài nguyên mờ Môi trường ồng Lê Minh Ngân pà git: “Ƀộ Tài nguyên mờ Môi trường neh ai jơnau đơs bơh ală sở, gah broă lơh geh gơ rềng dê bơh 63 càr, ƀòn dờng gơ wèt dà lơgar dê bơh 4 dơ̆ pơrjum tàm ală tiah; ai jơnau đơs mờ sră nggal tàm ală ƀộ, gah broă lơh, càr, ƀòn dờng, mpồl geh gơ rềng cih dờp, mblàng lơh loh ală jơnau đơs mờ yal Ƀộ Tư pháp in sền sơ wì. Kờp dŭ ngai 19/4/2024 Mpồl duh broă rơp bơyai lơh pơrjum sền sơ wì ală Nghị địñ do”.

Tàm dơ̆ pơrjum, kwang đơng lam bồ Ƀộ Tài nguyên mờ Môi trường pà git: geh uă tơngume pa, broă gơlik geh tàm tŭ tam gơl, bơ tơl Nghị địñ 156 bơh Cíñ phủ dê cih mùl màl lam lơh jat 2, 3 bơh bơh Adat Lâm nghiệp dê, kung bè lơh Nghị địñ cih mùl màl bè ù tam kòi. Ƀộ Tài nguyên mờ Môi trường gam lam lơh ai jơnau đơs bè jơnau rơcang cih 2 nghị địñ do jat jơnau sồr.

Đơs, Ƀộ Tài nguyên mờ Môi trường neh lam lơh rơcang lài, di tŭ jơnau sồr lơh bơh Cíñ phủ dê, Phó Thủ tướng ồng Trần Hồng Hà đơs nền: pal pơn jat tai lơh loh ală broă gam geh jơnau đơs krơi is bè broă lam lơh, ală cau, broă lơh ngan ngồn,… mhar ai jơnau đơs kâp hơ đơm, mpồl lơh sa kă bro, mpồl bal, mpồl cau, mpồl lơh broă cíñ trị mpồl bơtiàn dê… gơ wèt mờ jơnau cih bè tơm wơl, dong kờl, rơndap ƀòn ơm kis pa, lơh nền giă ù; lơh, ai tơlik jat sră nggal tơrmù lơyah gơ wèt mờ Nghị địñ cih bè lơh glài broă lơh tìs mờ priă tàm gah ù tiah… Phó Thủ tướng sồr: Ƀộ Tài nguyên mờ Môi trường pal hơ yal Jơnau rơcang cih Nghị địñ cih mùl màl bè ù tam kòi di tơngai pơrgon, lơh jat jơnau sồr tam pà kâp, tam pà gơnoar, tam gơl wơl sră pơ àr gơnoar atbồ, geh ală bơta pal jat, jơnau sồr jat sền, sền sơ wì, kơlôi sơnơng broă lơh jat ală jơnau cih bè ù tam sền gàr brê, ù tam kòi: “Pal lơh jat ală jơnau sồr pal jat, gàr ală nghị địñ geh wil tơl ală jơnau cih bơh Adat Ù tiah dê, gàr pal di mờ sơnua boh lam, di mờ adat boh lam, ring bal mờ adat boh lam, Nghị địñ ờ gơtùi krơi mờ Adat boh lam. Sồr ală oh mi lam lơh tam pà kâp, tam pà gơnoar wil tơl, gơ lòt bal mờ ală bơta pal geh, jơnau sồr nàng kâp hơ đơm in lơh jat mờ kung là bơnàng jă nàng bol he in jat sền, sền sơ wì”.

Phó Thủ tướng sồr Ƀộ Tư pháp, Ƀộ Tài nguyên mờ Môi trường pơgồp bal, mhar rơcang lài sră nggal nàng yal Quôk hội in ai tơlik Nghị quyết ai gơnoar Adat Ù tiah nam 2024 geh lơh jat tàm ngai 01/7/2024 do. Ƀộ Xây zựng mhar lơh ală sră nggal cih mùl màl Adat Hìu ơm nam 2023 mờ Adat tac bro ù tiah hìu đam nam 2023 nàng di tŭ geh lơh jat ring bal mờ Adat Ù tiah nam 2024 tàm ngai 01/7/2024.