Kah wơl jơnau đơs bơh ồng Trần Việt Hoà dê, Kwang atbồ Kụk tam pà ồs đèng, Ƀộ Kông thương tàm dơ̆ pơrjum ƀău bè bơta lơh gơlik mờ tac ồs đèng bơh Ƀộ Kông thương đơng lam ngai 07/6/2023 – tŭ neh lời gơlik geh bơta ờ tơl ồs đèng tàm tơngai kàl prang duh lồi nhai 5, bồ nhai 6 tàm tiah đah tô đah tô dà lơgar lơh gơbàn bơta pal gơ sơt đèng tàm pơ dar tàm uă tiah: “Bulah neh lơh ngan jơh pràn nàng gàr tơl ồs đèng, mơya broă lời ờ tơl ồs đèng nàng drơng ai bơta bơtàu tơnguh lơh sa- mpồl bơtiàn in là kơnòl ờ gơtùi mblàng lơh loh tìs di. Bol hi dan pơyua jơnau dan să tus jơh làng bol, mpồl lơh sa kă bro mờ dùl dơ̆ tai dan ală cau cih ƀau, anih mblàng yal jơnau, yal bè ală jơnau đơs tềm pềr ồs đèng nàng bol he bal mờ gơp at tê bal, nàng geh ală broă lơh sơrlèt gan tŭ tơngai kal ke do”.

Mùl màl bơta ờ tơl ồs đèng neh lơh gơ rềng uă ngan tus broă lơh sa – kă bro bơh mpồl lơh sa kă bro mờ rài kis pah ngai bơh tơl nă bol he dê. Tàm tŭ tơngai ờ tơl ồs đèng tàm tiah đah tô dà lơgar, rlau 4 rbô MW đèng càl tàm tiah tàm gùl lơgar, Tây Nguyên mờ tiah đah jum dà lơgar neh lơh sir mơya ờ gơtùi tơmut bal tàm gùng che ồs đèng tài uă jơnau, tàm hơ̆ pơn rơ ngan là pràn jak pờ tơlik mờ ờ tơl tơngume adat boh lam pal jat bơh tơl rơndap broă lơh dê. Tơnơ̆ ală bơta ờ niam do, anih lơh broă atbồ dà lơgar đơs nền rơp kơlôi sơnơng, rơcang lài ală broă rơcang sơndră ngac ngar mờ ală kal ke bè pờ tơlik ồs đèng nàng tơrmù ƀà hoàc huơr ai làng bol mờ mpồl lơh sa kă bro in.

Dùl ròt jơnau sồr lơh bơh ală sră nggal, jơnau sồr bơh Cíñ phủ, Thủ tướng Cíñ phủ tus kâp Ƀộ, gah broă lơh dà lơgar, mpồl lơh sa kă bro - sồr tàm tơl broă gơlik geh, ờ gŏ di lời gơlik geh bơta ờ tơl ồs đèng, ờ tơl năng lượng – neh geh ai tơlik tàm 6 nhai lồi nam 2023, ngan là tŭ ală rơndap ù tiah bal bè năng lượng dà lơgar; Rơndap ù tiah bơtaù tơnguh ồs đèng dà lơgar mờ Rơndap ù tiah phan bơna rơcang lài, tac xăng zờu, nhơm chu dà lơgar tơngai bơh nam 2021 tus nam 2030, broă wèt sền tus nam 2050 neh geh Thủ tướng ring bal tàm ală nhai 5, 6, 7 pa do. Broă ai tơlik là lơh bè lơi nàng lam lơh ngan ngồn ală broă lơh neh geh ai tơlik tàm ală Rơndap ù tiah do, nàng gàr tơl năng lượng.

Tiến sĩ Nguyễn Anh Tuấn, gơ wèt Mpồl duh broă jak chài Sră ƀău Năng lượng Việt Nam song dơpă đơs, tàm jơh bal tềng đap mat mờ jŏ jòng ndrờm pal pơlam sồr nàng tềm pềr gơ jat bal mờ bơcri priă lơh ală ồs đèng pa: “Nam 2024- 2025 mờ trồ tơngai duh bè nhai 5, nhai 6 pa do den ngan là tiah đah tô dà lơgar rơp ờ tơl đèng, mờ ờ geh broă lơi nàng bơsong. Tŭ do mìng geh dùl broă là tềm pềr ồs đèng, ngui dồ êt wơl. Cíñ phủ, ală Ƀộ, gah broă lơh dà lơgar geh gơ rềng pal lơh kràñ cê, ờ tàm tuh kơnòl gơp in, ngan là ală ƀộ geh gơ rềng”.

Sùm tàm ală dơ̆ pơrjum tàm lơgar mờ dunia bè năng lượng, tàm hơ̆ bơtàu tơnguh năng lượng lơh geh wơl, hơ̆ sồng ngui tềm pềr mờ geh cồng nha năng lượng geh uă tàm nam 2023. Uă ngan jơnau pơlam geh ai tơlik, gơ jat bal mờ jơnau sồr tơlir, sàng goh, tam gơl năng lượng ndrờm bal. Cau jak chaì lơh sa, Tiến sĩ Võ Trí Thành song dơpă đơs: priă bơcri – kòn bơnus – măi mok mờ pràn jak gùng dà – broă dong kờl là ală tơngume tờm pal gờñ geh tă bơsong nàng ai ngui priă bơcri cau dùl nă să ai bơtàu tơnguh gah năng lượng in, tài pah nam, Việt Nam pal bơ tơl tai bơh 14 tus 16 tơmàn dolar Mỹ nàng lam lơh rơndap ù tiah ồs đèng 8 jat di mờ jơnau bơceh lơh.

Tềng đap mat, nàng gàr tơl ồs đèng nam 2024 in, Ƀộ trưởng Ƀộ Kông thương Nguyễn Hồng Diên sồr ală mpồl geh gơ rềng pal lơh niam 2 kơnòl broă gàr tơl xăng zờu mờ tềm pềr ồs đèng, sền do là 2 broă lơh kuơmàng nàng gàr tơl ồs đèng tàm nam 2024: “Jat jơnau sồr sồ 29 bơh Thủ tướng Cíñ phủ dê den tơl hìu măi pal gàr tơl xăng zờu ai broă lơh bơh hìu măi đèng in. Mờ pal lơh jat nền nòn Jơnau sồr sồ 20 bơh Thủ tướng Cíñ phủ dê bè broă sơlơ tơnguh tai tềm pềr ồs đèng ai tơngai bơh nam 2023 tus nam 2025 in. Añ đơs là broă lơh tềm pềr ồs đèng kung là broă lơh pal geh ngan, kờp bal mờ ală lơgar pas cau kung pal tềm pềr đèng. Bol he ngui đèng pơhì pơhà ngan. Tài giă đèng ờ kas, tài jơnau sồr tềm pềr đèng bol he dê ờ hềt ngan ngồn tus tơl nă cau ngui đèng den tàng bơta pơhì pơhà uă ngan. Jơnau sồr sồr 20 bơh Thủ tướng dê neh đơs loh ngan, bol he pal lơh jat”.