Pà git, tơngai rềp ndo giă kòi phe gơguh jơnhua, ờ mìng lơh gơlik bơta ƀuơn dờng ngan ai drà kă bro tac hờ lơgar ndai phe bơh Việt Nam dê in, cèng wơl bơta chờ hờp làng bol lơh broă sa in. Bulah bè hơ̆, do kung là bơta kơlôi rơcang bơh cau ngui sa dê mờ bơta ờ niam tàm tac phe hờ lơgar ndai, mò Lê Thị Song An, mpồl kwang bàng càr Long An lùp: “ Giă kòi sùm gơguh jơnhua den tàng 2, 3 tiah geh bơta blơi kòi phe ur ar ngan, lơh gơbàn bơta ờ ring bal đah broă lơh gơlik mờ jơnau kờñ ngui, lơh giă kòi phe gơguh jơnhua ờ dipal mờ kung là bơta kơlôi rơcang bơh cau ngui sa, kông ñân dê tŭ giă phe gơguh jơnhua. Bơta do lơh gơbàn ală bơta ờ niam tàm tac hờ lơgar ndai, ờ hềt gơtùi lơh gơlik bơta lơh bal kơ̆ kơljap đah làng bol mờ mpồl lơh sa kă bro. Den tàng, añ dan Ƀộ trưởng pà git broă lơh ngan ngồn, geh cồng nha nàng ờ mìng gàr tơl kòi phe dà lơgar in, mờ gam sơlơ tơnguh lơh gơlik, tac hờ lơgar ndai phe kơ̆ kơljap jat di jơnau đơng lam bơh Thủ tướng Cíñ phủ dê”.

Ƀộ trưởng ồng Lê Minh Hoan pà git, pơgap mờ do 10 nam den bă ù lơh kòi lơgar he dê pơgap rlau 4 tơlak lồ. Tŭ do, jat khà tơrgùm kờp, ù lơh kòi gam 3 tơlak 930 rbô lồ. Jat Nghị quyết Quôk hội mờ Nghị quyết bơh Cíñ phủ dê là ngui ngac ngar 5 tơlak lồ ù lơh kòi. Ƀộ trưởng đơs loh, ngac ngar tàm do hơ̆ là nàng gàr tơl kòi phe mờ nàng bơta bơtàu tơnguh lơh sa- mpồl bơtiàn den kung pal lời dùl khà ù lơh sa suơn sre, tàm hơ̆ geh ù lơh kòi.

Ƀộ trưởng ồng Lê Minh Hoan pà git, rơndap ù tiah ù lơh sa suơn sre, gơ ơm tàm rơndap ù tiah mờ bơh Ƀộ Tài nguyên mờ Môi trường kong kơnòl tờm. Tàm rơndap ù tiah bơh ală tiah dê kung geh jơnau sồr bè bă ù lơh kòi, git loh bă tiah lời ai ù lơh sa suơn sre in: “Tàm broă bơtàu tơnguh lơh sa- mpồl bơtiàn ală càr pal sền sơ wì gàr khà ù lơh sa suơn sre, tŭ tam gơl ù tam kòi tài gam uă jơnau gơ lời wơl lơh gơ rềng tus tơnơ̆ do bè khà lơh geh kòi, priă jền lơh geh bơh làng bol lơh broă sa dê kung bè ròt ală gah lơh phan dê… Ƀộ Nông nghiệp mờ Phát triển Nông thôn rơp kơ̆ dơn bal mờ ală càr nàng mblàng lơh loh ală broă tŭ lơi tam gơl, tŭ lơi ờ tam gơl mờ kơrnuat pal jat là sền sơ wì mờ kơlôi sơnơng nền nòn đah bơtàu tơnguh mờ gàr bă ù lơh kòi”.

Bàr, pe jơnau đơs đơs là, gàr tơl kòi phe dà lơgar dê pal gơ jat bal mờ rơndap tap sèng wơl rài lơh sa, gàr tơl kòi phe tàm tơl broă gơlik geh, ờ mìng tơrgùm tàm bơta mùl geh, bơta pràn tus bal mờ gam gàr bơta ring bal phan sa tơl pràn să jan in, bơta niam phan sa, sồr Ƀộ trưởng pà git, Ƀộ neh lam lơh ală broă lơh mùl màl lơi?.  Hơ bơta do, Ƀộ trưởng ồng Lê Minh Hoan pà git: “Gàr tơl phan sa ờ di mìng là kòi phe bè ờs mờ gam jơh ală bơta phan sa geh gar nàng lơh gơs cất đạm nàng kòn bơnus in kis mờ kờp bal mờ phan siam phan ròng, bơkàu, kơnuh, plai chi ndrờm lơh gơs. Broă tus bal den bol he pal tơnguh niam rài kis làng bol in mờ uă broă lơh jơnau kờñ dà lơgar nàng geh tơl bơta pràn tus bal, ờ di là mìng sùm pơn jờng làng bol tam tơngời, mờ ală bơta hơ̆ ờ di là kơ̆ kơljap jŏ jòng. Bơh priă jền lơh geh mờ rài kis bơh uă broă lơh bơh 3 broă lơh jơnau kờñ mờ ală broă lơh bơh Ƀộ Nông nghiệp mờ Phát triển Nông thôn dê bè broă lơh sa hơ đơm mƀur brê nàng tơnguh priă jền lơh geh”.

Hơ jơnau lùp bè broă lơh lơh gơlik bơta lơh bal lơh gơlik mờ tac phan lơh gơs bơh suơn sre bơh ồng Phạm Hùng Thắng, mpồl kwang bàng càr Hà Nam dê, Ƀộ trưởng ồng Lê Minh Hoan dờp, lam lơh lơh bal jat ròt mpồl lơh gơlik là broă rơndap lơh bơh gah lơh sa suơn sre dê nàng kờñ tam gơl bơta geh ngan rah rài, dềt, lơh is bơh rài lơh sa suơn sre dê. Bơta geh ai tơlik là tơnguh jơnhua bơta kơ̆ kơljap bơh ală mpồl lơh gơlik dê tàm tơngai tus. Tàm tơngai tus, Ƀộ rơp lòt bal mờ ală tiah nàng lơh ală broă lơh ròt mpl lơh gơlik ring bal mờ lơh sir rlau tai bal mờ ală hìu bơsram, ală cau kơlôi sơnơng, ală mpồl lơh sa kă bro tus bal nàng ală mpồl lơh gơlik in bơtàu tơnguh kơ̆ kơljap rlau. Đơs pơn dut dơ̆ lùp mờ hơ jơnau lùp tàm pơrjum dơ̆ 25 bơh Ủy ƀan Thường vụ Quôk hội dê, Củ tịc Quôk hội ồng Vương Đình Huệ đơs uă bơta gam ờ niam mờ gam lơh gơbàn ờ suk tàm mpồl bơtiàn neh di tŭ geh sền sơ wì mờ bơsong: “Añ pin dờn là, mờ lâw ală broă lơh mờ ală Ƀộ trưởng neh hơ pơrgon, mờ bơta pơn đơl uă ngan bơh jơh Cíñ phủ dê, bơta lòt bal bơh Quôk hội dê, ală kwang bàng Quôk hội, gah atbồ gơ wèt kơnòl bơh Ƀộ Tư pháp dê rơp geh uă tam gơl loh làng, brồ guh tus bơta pa, ngan ngồn rlau, ngan là tàm tŭ tơngai, jơnau sồr kơnòl broă ngai sơlơ uă jat Nghị quyết sồ 27 bơh Đảng dà lơgar dê; gah lơh sa suơn sre rơp sơrlèt gan bơta kal ke, bơta lòng, pơn jat tai là bơnàng jă kơ̆ kơljap bơh rài lơh sa dê, lơh gơlik bơnàng jă kuơmàng nàng wèt tus rài lơh sa suơn sre tam gơl pa, mut gơ rờm bal dunia mờ gơ dờp mờ tam gơl trồ tiah”.