Jat ồng Y Thanh Hà Niê Kdăm – Củ tịc Mpồl duh broă Jơi bơtiàn bơh Quôk hội dê, Phó Kwang atbồ Mpồl kwang bàng jat sền bơh Quôk hội dê pà git, cồng nha lam lơh ală broă lơh jơnau kờñ dà lơgar (geh: bơt bơtàu ƀòn lơgar pa, tơrmù rƀah kơ̆ kơljap jŏ jòng sùm mờ bơtàu tơnguh lơh sa- mpồl bơtiàn tiah làng bol jơi bơtiàn dồ êt nă cau mờ tiah kơh bơnơm) bơh sơn rờp neh lơh geh 2, 3 cồng nha niam; phan bơna lơh sa, mpồl bơtiàn tiah ƀòn lơgar, tiah kơh bơnơm geh tam gơl niam. Bơdìh hơ̆ tai, kung gam ală kòl yan, bơta ờ niam lơh broă lơh gơs jơnau kờñ ai priă bơcri kes priă dà lơgar tus nam 2025 ai broă lơh jơnau kờñ dà lơgar in kal ke ngan.

Gơ rềng tus ală broă lơh nàng tơnguh mhar broă ai priă bơcri dà lơgar, ală broă lơh jơnau kờñ dà lơgar nàng kờñ tơnguh cồng nha ngui priă bơcri, tă pơgồp ai jơnau kờñ gơguh lơh sa mờ lơh sir phan bơna drơng bơtàu tơnguh mờ rài kis bơh làng bol dê in, tàm pơrjum lồi nam pa do bơh Hội đồng Ñân zân càr Dăk Lăk ồng Võ Ngọc Tuyên, Kwang atbồ Sở Kế hoạc mờ Đầu tư càr Dăk Lăk pà git: “Tàm tơngai tus, bol hi sền gròi uă ngan tus ală broă lơh jơnau kờñ dà lơgar. Geh bơta pơgồp bal đah Sở Kế hoạc – Đầu tư mờ ală sở, gah broă lơh. Broă lơh jơnau kờñ dà lơgar bè bơt bơtàu ƀòn lơgar pa den là Sở Nông nghiêjp, broă lơh tơrmù rƀah kơ̆ kơljap jŏ jòng sùm là Sở Lao động, broă lơh bơtàu tơnguh lơh sa tiah làng bol jơi bơtiàn dồ êt nă cau – tiah kơh bơnơm là Ƀan Jơi bơtiàn den bol hi rơp cribơyai tàm Mpồl đơng lam broă lơh jơnau kờñ dà lơgar nàng geh bơta ring bal mờ sền sơ wì lài mờ tŭ jàu broă rơndap lơh bơh bồ nam tơn nàng lam lơh ai priă bơcri di tŭ”.

Tàm dơ̆ pơrjum do, Hội đồng Ñân zân càr Dăk Lăk neh ai tơlik Nghị quyết bè broă geh jàu, broă rơndap lơh priă bơcri bơtàu tơnguh bơh kes priă dà lơgar mờ kes priă càr lam lơh Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ êt nă cau mờ tiah kơh bơnơm tàm nam 2024 là mờr 660 tơmàn đông.

Kung tàm dơ̆ pơrjum lồi nam 2023 bơh Hội đồng Ñân zân càr Gia Lai dê, ồng Phạm Minh Trung- Kwang atbồ Sở Tài nguyên mờ Môi trường càr do neh sồr ală tiah pơgồp bal lam lơh mhar ală sră nggal nàng ai pà ù làng bol tàm broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn dồ êt nă cau in: “Bè ai pà ù ai làng bol jơi bơtiàn dồ êt nă cau in tàm broă lơh jơnau kờñ dà lơgar bè bơtàu tơnguh lơh sa- mpồl bơtiàn tiah làng bol jơi bơtiàn dồ êt nă cau, Ủy ƀan Ñân zân càr neh jàu Sở Tài nguyên mờ Môi trường in tă pơgồp jơnau đơs, geh jơnau pơlam is bè ù ơm. Sở neh geh sră nggal pơlam is ală kơnhoàl. Sồr ală kơnhoàl geh broă rơndap lơh, cih mat nàng ring bal, lam lơh jat”.

Mờ nùs nhơm rơcang lài, song dơpă, ờ pleh, di tŭ đal git ală kal ke, kòl yan, Quôk hội pơn jat tai lòt bal mờ Cíñ phủ nàng jòi geh ală broă lơh dipal rlau, ngan là tŭ tơngai lam lơh 3 Broă lơh jơnau kờñ dà lơgar tơngai bơh nam 2021 tus nam 2025 mìng gam rlau 2 nam tai là pal lơh gơs. Pơrjum dơ̆ 6, Quôk hội khoă XV neh ring bal Nghị quyết bè jat sền lam lơh 3 Broă lơh jơnau kờñ dà lơgar. Kwang ala mat Rơ Châm Hphik, mpồl kwang bàng càr Gia Lai đơs là: “Nghị quyết geh bơta jal mhar mờ di tŭ, di ngan mờ nùs tồr làng bol dê, đơs ngan rơp gơtùi tă bơsong ală bơta tờm gam gam kòl yan tàm tŭ lam lơh 3 Broă lơh jơnau kờñ dà lơgar”.

Do là dơ̆ sơn rờp, dùl tơngume jat sền dờng ngan rlau jơh tơrgùm jơh bal 3 broă lơh jơnau kờñ dà lơgar kuơmàng bơh dà lơgar dê. Đơs tàm pơrjum, Củ tịc Quôk hội Vương Đình Huệ đơs nền: jat sền mờ nùs nhơm geh đơs sùm là bơt bơtàu mờ rơcang sơndră, tàm hơ̆ bơt bơtàu kung gam là sơn rờp ngan nàng tơl broă ngai sơlơ niam rlau: “Quôk hội ring bal nàng Cíñ phủ mhar bơt bơtàu, yal Quôk hội in tàm pơrjum rềp ngan rlau jơh Jơnau rơcang cih Nghị quyết bè lam lơh jat tơrlòng lài bàr, pe gùng dà broă lơh, broă dong kờl krơi is mờ broă tam pà kâp ai kâp kơnhoàl in lơh nền mat, rơndap tap sèng, tam pà ngui priă bơcri kes priă dà lơgar, lam lơh ală Broă lơh jơnau kờñ dà lơgar”.

Bal mờ broă ring bal Nghị quyết jat sền dờng ngan rlau jơh bè broă lam lơh jat Nghị quyết bơh Quôk hội dê bè ală Broă lơh jơnau kờñ dà lơgar, Quôk hội kung neh jàu Cíñ phủ in, yal Quôk hội in tàm pơrjum rềp ngan rlau jơh dùl Nghị quyết krơi is bè tam pà kâp, ala mat, tơrmù sră pơ àr lơh broă nàng di tŭ tă bơsong kal ke, kòl yan, dong broă lam lơh ală Broă lơh jơnau kờñ dà lơgar lơh geh cồng nha, lơh gơs di mờ tŭ tơngai hơ pơrgon, lơh gơlik bơta pin dờn mờ rài kis gơboh gơbài bơh làng bol dê in.