Sơnah ƀòn Quy Nhơn là dùl tàm ală tiah lam lơh rơcang gờñ ngan ai dơ̆ tĕ khà in. Bơh bồ tơngai lơh broă tơn, sơnah ƀòn neh pồ tơl Mpồl sồr lơh mờ Anih duh broă tĕ khà sơnah ƀòn, mờ kung tơng gơs 5 mpồl dềt mìng drơng dùl kơnòl geh: kwang bàng, drơng broă, yal tơnggit jơnau, mblàng yal; bơsong jơnau yal yă yal khài, lah yă; lơngap lơngai mờ lơh sơnơm. Ală mpồl dềt ndrờm geh rơndap jơnum dong broă, jàu kơnòl mùl màl, loh làng ai tơl mpồl in, gàr bơta rơcang lài, ring bal tàm sồr lơh mờ lam lơh jat.

Jat broă rơndap lơh, tàm sơnah ƀòn rơp geh 6 mpồl tĕ khà, kờp dŭ pồ 30 nă cau ala mat Mpồl duh broă Làng bol sơnah ƀòn tơngai lơh broă bơh nam 2026 tus nam 2031. Tàm pơrjum cribơyai dơ̆ 1, geh 48 nă cau geh yal tơnggit tơlik mat tĕ khà. Tàm hơ̆, khà cau ùr geh 45,8%. Khà cau geh ƀằng đại họk rlau hơđang geh uă rlau. Duh broă sùm Anih duh broă tĕ khà sơnah ƀòn Quy Nhơn lam lơh broă dờp sră nggal tơlik mat tĕ khà jat jơnau sồr, mờ kung rơcang lài lam lơh ală bơnah broă pơn jat tai bè rơcang bơyai lơh pơrjum cribơyai ring bal dơ̆ 2, kờp sền mờ lir mat cau tĕ khà, gàr lam lơh di tŭ tơngai hơ pơrgon, rơndap tap sèng mờ jơnau sồr bơh broă lơh tĕ khà dê.

Ồng Nguyễn Đức Toàn – Ƀí thư Đảng ủy, Củ tịc Anih duh broă Làng bol sơnah ƀòn Quy Nhơn pà git: “Sơnah ƀòn Quy Nhơn yal tơnggit 48 nă cau ala mat, nàng làng bol in pồ 30 nă cau ala mat jat jơnau sồr, gàr yal tơnggit ală cau ala mat geh tơl nùs nhơm niam, tơl pràn jak, pin dờn geh pồ mut tàm Mpồl duh broă Làng bol sơnah ƀòn nàng dong sơnah ƀòn bơt bơtàu gơnoar atbồ rềp làng bol, tơrgùm bơtàu tơnguh lơh sa – mpồl bơtiàn tàm ƀòn lơgar. Bơdìh hơ̆ tai, bol hi kờp sền nàng crơng gơs ală jơnum tĕ khà tàm 63 ƀòn mờ kờp sền, cih mat, lơh nền mat cau tĕ khà tàm ƀòn lơgar”.

Jat broă rơndap lơh, tàm dơ̆ tĕ khà nhai 3 tus, càr Gia Lai geh 6 mpồl tĕ khà cau ala mat Quôk hội, kờp dŭ pồ 16 nă cau ala mat. Gơ wèt mờ Mpồl duh broă Làng bol càr, jơh gùt càr geh 18 mpồl tĕ khà, kờp dŭ pồ 85 nă cau al amat, gàr di rơndap tap sèng, khà jat jơnau sồr.

Nàng dơ̆ tĕ khà in geh lơh niam ờdo ờdă, làng bol lơh tờm mờ lơh geh cồng nha, bơh lồi nhai 11 nam 2025, Mpồl Lơh kơnòl broă sùm Tỉñ ủy càr Gia Lai neh bơyai lơh pơrjum lam lơh broă lơh tĕ khà jat broă lơh pờ tơlik tơn tàm internet tơrbŏ tus 135 sàh, sơnah ƀòn. Tus tŭ do, ală mpồl bơyai lơh tĕ khà bơh kâp càr tus sàh, sơnah ƀòn neh geh pồ tơl, gàr bơta ring bal, ndrờm bal tàm sồr lơh mờ lam lơh jat. Mpồl Lơh kơnòl broă sùm Anih duh broă Mặt trận dà lơgar Việt Nam càr kung neh bơyai lơh ală pơrjum pơlam mờng chài lơh broă bè broă lơh yal tơnggit cau tơlik mat tĕ khà, ring bal broă rơndap lơh, tơngume mờ jơnau sồr ală broă cribơyai ring bal jat jơnau cih bơh Adat boh lam dê. Bal mờ hơ̆, broă lơh mblàng yal bè tĕ khà geh lơh pràn, dong cau tĕ khà git loh gơnoar, kơnòl he dê mờ jơnau sồr pal geh bơh cau ala mat làng bol pồ dê.

Tŭ do, ală sàh, sơnah ƀòn tàm càr Gia Lai gam tơrgùm bơto pơlam mờng chài lơh broă ai ală mpồl tĕ khà in, lơh sir mat cau tơlik mat tĕ khà jat tŭ tơngai hơ pơrgon; mờ kung rơcang phan bơna, broă rơndap lơh gàr niam lơngap lơngai rơndap tap sèng, lơngap lơngai mpồl bơtiàn mờ lơh sơnơm drơng ngai tĕ khà in. Bồ nhai 1 nam 2026, Anih duh broă tĕ khà càr Gia Lai neh lam lơh uă mpồl lòt sền mùl màl broă lơh rơcang tàm ală sàh, sơnah ƀòn nàng kờñ di tŭ bơsong kal ke, gàr ală broă rơcang geh lam lơh nền nòn, di jơnau sồr. Lòt sền tàm sơnah ƀòn Quy Nhơn, ồng Thái Đại Ngọc – Kwang geh jơng Đảng Dà lơgar, Ƀí thư Tỉñ ủy càr, Củ tịc Anih duh broă tĕ khà càr Gia Lai sồr: “Cih sră pơ àr cau ngan ngồn, bơta do kuơmàng ngan. Lơh bè lơi nàng gàr bơta niam, kòn bơnus pal di, pal geh tơl ală bơta pal geh, ờ mìng là bè jơnau sồr. Tài do là cau ala mat ai ală rơnàng làng bol in. Den tàng jơh gùt anih lơh broă cíñ trị bơh càr tus sàh, sơnah ƀòn pal lơh nền nòn broă do”.