Drơng kơnòl Cơldŭ lơh broă Quôk hội dê ồng Lê Quang Tùng sền jơnau yal Jơnau rơcăng cih Jơnau lơh nền tàm pơrjum bè kơnòl broă, gơnăp gơnoar loh làng mờ rơndăp tăp sèng bơh Mpồl duh broă Jơi bơtiàn, ală Anih duh broă Quôk hội dê. Đơs ai jơnau đơs bè tơnggume do, Củ tịc Quôk hội ồng Trần Thanh Mẫn cih dờp, đơs niam ngan Mpồl cau cih neh jơh nùs ngan, sơrbăc mhar ngan tàm broă cih, lơh sir sră nggal Jơnau lơh nền tàm pơrjum nàng dan mờ Anih duh broă Lơh kơnòl broă sùm Quôk hội sền swì, ai jơnau đơs. Broă lơh sir, lơh tơngguh tai ală jơnau sồr rơ̆p pơgồp bơnah tơngguh uă jơnau gơtùi lơh jăt, geh cồng nha tàm lam lơh mờ lơh broă bơh ală anih lơh broă Quôk hội dê.

Jăt Củ tịc Quôk hội, Jơnau lơh nền tàm pơrjum pal lơh jăt ală gơnoar broă tờm bơh Mpồl duh broă Jơi bơtiàn dê, ală Anih duh broă Quôk hội dê geh cih tàm Adăt tam gơl, bơtơl bàr pe bơta bơh Adăt Rơndăp Quôk hội dê; gàr geh bơta tàm pơn jăt, ndrờm bal, ring bal mờ tàm pơnring đah ală anih lơh broă.

Củ tịc Quốk hội sền bal ring bal mờ ală tơnggume loh làng; đơs là ală tŭ lam lơh jăt rơ̆p pơn jăt tai kờp sền nền, sền swì, dan tam gơl; mơkung kơ̆p kờñ jơnau lơh nền tàm pơrjum do geh ai lơh jăt mơ tơn nàng lơh jăt. Tơlik nùs nhơm ring bal uă jơnau cih bè rơndăp tăp sèng, bơta pal jăt lơh broă bơh Mpồl duh broă Jơi bơtiàn, ală Anih duh broă Quôk hội dê, Củ tịc Quôk hội đơs là: “Bè kơnòl broă, gơnăp gơnoar loh làng bơh Mpồl duh broă Jơi bơtiàn, ală Anih duh broă Quôk hội dê, tềng đăp măt, kung gam tàm pơdờn mờ dờp jơh bè ờs kơnòl broă, gơnăp gơnoar bơh ală anih lơh broă dê bè lài mờ tŭ lơh jăt rơndăp tăp sèng nàng tam pà gĭt nền loh làng kơnòl broă, gơnăp gơnoar. Broă tơrgùm tam gơl bơh sơnrờp bàr pe broă, tơngume broă lơh đah bàr pe anih lơh broă neh lơh geh bơta tàm pơnring, bơnĕ bơnài; ờ lời wah, ndrờm bè broă, kơnòl broă là di gùng dà lơh broă. Anih duh broă Lơh kơnòl broă sùm Quôk hội dồ nùs bal gùng dà, tơl anih lơh broă bơh Quôk hội dê tơrgùm lùp sền wơl, jăt sền, sền nền lơh broă gơ wèt kơnòl bơh 2 tus 3 Ƀộ, gah tàm Dà lơgar dê nàng gàr geh bơta tàm pơnring, bơnĕ bơnài, pleh tơrgùm broă tàm bàr pe anih lơh broă. Pa do, jăt sền ngai sơlơ geh tơngguh uă, rơgeh, di ală broă jal mhar, geh cau tĕ khà sền gròi”.

Tàm broă ătbồ vụ kơnòl broă ờs mờng nàng lơh geh jơnau sồr gơ tơlik, jơnau lơh nền tàm pơrjum pal gĭt nền loh rlau tai gơrềng đah Duh broă sùm Mpồl duh broă Jơi bơtiàn, duh broă sùm Anih duh broă, Củ tịc Mpồl duh broă Jơi bơtiàn, cau Drơng kơnòl Anih duh broă mờ Cơldŭ lơh broă Quôk hội dê tàm broă ătbồ vụ kơnòl broă ờs mờng.

Củ tịc Quôk hội sồr, tơnơ̆ do tơn, pal tơrgùm mơ tơn ai broă lơh sir ală jơnau cih gơrềng tus rơndăp tăp sèng, broă lơh broă, mpồl lơh broă kơnòl broă ờs mờng dong broă, gàr tơl bơta lơh broă, ờ lơh gơkòl gơrềng tus broă lơh jăt kơnòl broă, gơnăp gơnoar broă bơh ală anih lơh broă dê. Den tàng bè hơ̆, ală anih lơh broă geh gơrềng mhar cih jơnau dan, ai lơh jăt sră nggal jơnau sồr, ătbồ kông cưk, tă ngui priă kơnòl broă ờs mờng bơh Mpồl duh broă Jơi bơtiàn dê, ală Anih duh broă; gàr geh bơta lơh broă bơh Mpồl duh broă Jơi bơtiàn, ală Anih duh broă dê; tam gơl, bơtơl Jơnau lơh nền tàm pơrjum 22 bơh Anih duh broă Lơh kơnòl broă sùm Quôk hội dê bè gơnoar broă, kơnòl broă, gơnăp gơnoar, rơndăp tăp sèng bơh Cơldŭ lơh broă Quôk hội dê.

Củ tịc Quôk hội ồng Trần Thanh Mẫn sồr, Mpồl duh broă Jơi bơtiàn, ală Anih duh broă, ală Vụ sền swì, kơlôi sơnơng nền bè broă lơh kwang bàng mpồl lơh broă he dê, bañ lơh tam gơl; săc rwah kwang bàng tàm ală vụ nàng drơng Mpồl duh broă Jơi bơtiàn, Anih duh broă pal rwah cau lơh geh broă, cau geh kơnòl, cau jak ngan, geh broă lơh jak mờ is ồn pal geh nùs nhơm tam gơl pa.