Mpồl duh broă pơgồp bal đơng pơlam tiah Tây Nguyên là mpồl pơgồp bal làm gah bơh Thủ tướng Cíñ phủ lơh nền crơng gơs, lam lơh gơnăp gơnoar kơlôi sơnơng, sồr lơh, đơng pơlam bal, bơsong ală broă kuơmàng bơh tiah do, làm gah dê bè tàm tơrbŏ bal ù tiah tiah do, bơtàu tơnguh kơ̆ kơljap jŏ jòng sùm tiah Tây Nguyên.

Pơrjum neh lời uă tŭ tơngai nàng cribơyai, mblàng lơh loh, sền sơ wì ală gùng dà, broă lơh, broă dong kờl bơtàu tơnguh lơh sa- mpồl bơtiàn tiah Tây Nguyên mờ ai tơlik 2, 3 gah broă, gùng dà broă lơh, broă dong kờl krơi is ai tiah do in.

Jơnau yal bơh Ƀộ Kế hoạc mờ Đầu tư dê đơs nền: Tây Nguyên là ù tiah kuơmàng ngan bè cíñ trị, lơh sa, niam chài, mpồl bơtiàn, sền gàr dà lơgar, sền gàr lơngăp lơngai bơh gùt lơgar dê, là tiah mờ geh mờr 6 tơlak nă cau gơ wèt jơh 54 jơi bơtiàn oh mi gùt lơgar ơm kis. Tây Nguyên neh lơh geh uă cồng nha kuơmàng ngan bè: GRDP kờp bal tàm dùl nă cau tàm nam 2022 gơguh rlau 11 dơ̆ pơn ndrờm mờ nam 2022, khà gơguh kờp jơh phan lơh gơs tàm ù tiah tiah do dê kờp bal tàm tơngai bơh nam 2002 tus nam 2020 geh mờr 8% pah nam mờ jơnhua ngan rlau jơh pơn drờm mờ ală tiah… Bulah bè hơ̆, broă lơh sa tiah Tây Nguyên dê gam ală bơta ờ niam, ờ pràn, bơtàu tơnguh ờ hềt dipal mờ bơta pràn, bơta ƀuơn, bè: GRDP kờp bal dùl nă cau kung gam tàm khà lơyah ngan rlau jơh tàm 6 tiah lơh sa- mpồl bơtiàn, ờ hềt càr lơi tàm tiah do gơtùi tàm pơn ring is kes priă, gơ hòi gơ jà bơcri priă tơn bơh lơgar ndai lơyah ngan, tơrmù rƀah ờ hềt kơ̆ kơljap, khà hìu bơnhă rƀah, ndrờm bè cau rƀah gam uă, jơnau pơhìn gơbàn rƀah wơl gam uă; bơta yah ngài đah pas mờ rƀah đah ală mpồl jơi bơtiàn lơyài geh tơrmù.

Bơta làng bol trờn ơm kis khat gơboh mut tàm Tây Nguyên ngai sơlơ kal ke; ù lơh sa, ù ơm bơh làng bol jơi bơtiàn dùl êt nă cau dê lơyài geh bơsong. Khà jơm glòm brê gơmù uă ngan mờ ờ lơh geh jơnau kờñ ai tơlik; brê geh is gơmù jơh bal bè bă brê mờ bơta niam brê dê. Dà pơhìn gơtìp soat, bơta trồ prang dờng soat dà gơlik geh nisơna. Uă phan lời wơl niam chài jơi bơtiàn gam ơm tềng đap jơnau pơhìn gơtìp roh huĭ, ờ hềt gơtùi bơsong niam bơta gơ rềng đah sền gàr mờ bơtàu tơnguh. Tàm tơrbŏ bal tàm dơlam is tiah do mờ tàm tơrbŏ bal ală tiah ndai ờ hềt kơ̆, gam cèng bơta ờ ngan ngồn, ờ hềt gơtùi lơh jat jơnau kờñ bơtàu tơnguh…

Dùl bơta gam lơh Lâm Đồng đơs is, ală càr Tây Nguyên đơs bal jê bồ ngan, hơ̆ là broă atbồ, ngui ù geh bơh anih suơn dờng lơh sa suơn sre, brê bơnơm gơtìp kal ke mờ ờ niam, lơh gơbàn pơhì pơhà phan kuơ geh is. Bơta do kờñ ngan pal geh jơnau cih bal, ring bal nàng bơsong. Ồng Trần Văn Hiệp, Củ tịc Ủy ƀan Ñân zân càr Lâm Đồng pà git: “Ù geh bơh ală anih suơn dờng lơh sa suơn sre, brê bơnơm tàm jơnau yal den gam gơtìp kwi kuơ tàm broă bơsong. Tŭ do làng bol sơ gràm, lơh hìu ơm, ai ơpah ờ di mờ jơnau sồr mờ sang tĕ gời, lơh gơbàn pơhì pơhà. Bơta do kờñ pal geh bơta kràñ cê, bơsong bè lơi gơ in niam mờ cèng bơta ring bal đah ală tiah den kơp kờñ gờñ geh jơnau pơlam, bơh Ƀộ Tài nguyên mờ Môi trường tàm lùp, tă pơgồp jơnau đơs ai Cíñ phủ in, hơ̆ sồng Ƀộ Nông nghiệp mờ Phát triển Nông thôn kơlôi sơnơng tus bal tai nàng bol hi in bơsong jơh bơta do, ngan là gơ wèt mờ ală hìu bơnhă neh dờp ơpah bơh lài tus tŭ do”.

Mpồl duh broă pơgồp bal đơng pơlam tiah Tây Nguyên geh crơng gơs nàng kờñ tam gơl pa gùng dà broă lơh đơng pơlam bal tiah do, sơlơ dong lơh sa- mpồl bơtiàn bơh tiah do dê bơtàu tơnguh mhar, kơ̆ kơljap, sền gàr tiah ơm kis mờ sền gàr dà lơgar, sền gàr lơngăp lơngai; là mpồl pơgồp bal làm gah lam lơh jat gơnăp gơnoar dong Thủ tướng Cíñ phủ kơlôi sơnơng, sồr lơh, đơng pơlam, bơsong ală broă kuơmàng, làm gah bè tàm tơrbŏ bal ù tiah tiah do, bơtàu tơnguh kơ̆ kơljap sùm tiah Tây Nguyên. Nghị quyết sồ 23 ngai 06/10/2022 bơh Ƀộ Cíñ trị dê neh git nền bơtàu tơnguh tiah Tây Nguyên pal jat gùng dà tàm tơrbŏ bal ù tiah, tàm tơrbŏ bal tàm dơlam is tiah do, den tàng bơdìh mờ lơh gơs bơta ring bal tàm rơndap tap sèng phan bơna bè gùng lòt, lơh sa suơn sre, lòt nhơl, niam chài- mpồl bơtiàn… ală càr tàm tiah Tây Nguyên kung pal tơrgùm tơnguh bơta niam rơndap ù tiah, lơh bè lơi nàng ngui geh cồng nha ală bơta pràn, ală bơnah priă jền, ngui uă ngan rlau jơh bơta niam, bơta ƀuơn bơh ù tiah ƀòn lơgar he dê.

Đơs pơn dut pơrjum, Phó Thủ tướng Cíñ phủ ồng Trần Lưu Quang, Củ tịc Mpồl duh broă pơgồp bal đơng pơlam tiah Tây Nguyên đơs là, dơ̆ pơrjum do geh sền là bơta sơn đờm nàng cribơyai broă tus bal pa, lơh broă rơndap lơh, tŭ tơngai lam lơh ngan ngồn gơtùi lam lơh geh cồng nha, digơlan là lơyài mơya kơ̆. Tàm hơ̆, pal gờñ gơtùi lơh gơs gùng dà broă lơh krơi is ai jơh gùt tiah do in nàng bơh hơ̆ gơtùi tă bơsong ală kal ke, lơh gơlik bơta gơn kơnờm dong sơlơ chồl pràn tiah Tây Nguyên bơtàu tơnguh: “Bal mờ ală oh mi lơh gơs dùl gùng dà broă lơh krơi is bơh tiah do dê nàng geh bơta ring lơngai mờ bơtàu tơnguh. Tơrgùm tềng đap mat tàm 3 broă, hơ̆ là jơnau tàm tơrbŏ bal gùng lòt tàm dơlam is đah 5 càr tàm tiah do mờ ală tiah rềp bal. Dơ̆ 2 là pơrjum bal gơ hòi gơ jà bơcri priă mờ nùs nhơm bơta kuơ ai tiah do in là dờng rlau. Broă dơ̆ 3 là gròi sền tus broă lơh jơnau kờñ dà lơgar, rơp sơlơ tơnguh, lơh mhar rlau tàm 2 nam gam gơl nàng gơ in thàn mờ broă rơndap lơh neh ai tơlik”.

Phó Thủ tướng ồng Trần Lưu Quang kung tơngkah ală tiah pal gờñ lơh gơs rơndap ù tiah càr mờ rơndap ù tiah tiah do, sền gròi tus bơta gơ rềng tus tiah ơm kis mờ tam gơl trồ tiah. Mờ kung sơlơ tơnguh broă lơh atbồ, sền gàr brê, tơnguh khà priă dờp ơpah sền gàr brê, nàng làng bol tơnguh tai priă jền lơh geh. Sền gròi tus broă sơlơ tơnguh tam gơl sồ, sơlơ tơnguh kă bro phan bơna, tac bro phan lơh gơs bơh suơn sre bơh tàm internet.