Tàm sàh Ia Băng, càr Gia Lai, anih sơn rờp bơh gơl gùng rơndeh lòt mhar Quy Nhơn – Pleiku dê, bulah gam tàm tơngai ơm rlô chờ, sap măi chŏ, măi cò tơnring kung gam ntas nggồr sùm ngai mang. Tơl mpồl rơndeh kong goa tàm pơn jat gơp cò tơnring bơnàng gùng tàm ală anih lơh gơs broă ai ù lơh rơndap broă, lơh gơs nùs nhơm lơh broă jal mhar ngan. Ồng Trương Anh Đài, đơng lam tiah lơh broă bơh dùl mpồl lơh sa kă bro bơt bơtàu dê gam lam lơh rơndap broă lơh dềt sồ 3, gơl lòt gan sàh Ia Băng pà git:

“Nàng tơnguh mhar tơngai hơ pơrgon lam lơh mờ ai tŭ trồ tơngai, kông ty bol hi git nền, geh ù lơh rơndap broă tus tềng lơi den lơh tus tềng hơ̆, lơh 3 dar, 4 dơ̆, lơh sùm ngai mang nàng lơh mhar tơngai hơ pơrgon; broă lơh là sơlơ ai tai măi mok, sơlơ tơnguh tai cau lơh broă, lơh mhar ngan rlau jơh dilah gơtùi lài mờ nhai mìu tus”.

Gơl gùng rơndeh lòt mhar Quy Nhơn – Pleiku jòng mờr 125 kơi sồ, geh tam pà gơs 3 rơndap broă lơh dềt. Tàm hơ̆, rơndap broă lơh dềt sồ 1 mờ sồ 3 neh lơh gơs broă ai ù lơh rơndap broă pơgap bơh 65 tus 67%. Do kung là dùl tàm ală broă lơh dờng, geh tŭ tơngai hơ pơrgon lam lơh mhar bơh càr Gia Lai dê, kơnờm bơh ring bal uă bơh làng bol tiah lam lơh rơndap broă lơh dê. Uă hìu bơnhă neh rơcang lài pơgồp bal, mhar jàu ù lơh rơndap broă lơh nàng drơng broă lam lơh in. Bi Yôh, kòn cau Bahnar ơm tàm ƀòn A Lao, sàh Lơ Pang, geh ù gơ wèt ù ai wơl pà git:

“Hìu bơnhă añ kờñ ngan jơnau lơh nền bơh Dà lơgar dê lơh gùng rơndeh lòt mhar, bơh tŭ sơn đờm lam lơh neh kờñ ngan. Giă tơm wơl priă ai ù dipal den hìu bơnhă añ kung ring bal mơ”.

Tơnơ̆ bơta lam lơh rơndap broă lơh jal mhar tŭ do là gùng uă nam tơlik jơnau đơs, jơnau dan bơh cau tĕ khà mờ ală cau ala mat làng bol pồ càr Gia Lai dê. Sùm tàm tŭ tơngai jŏ jòng, Gùng dà lơgar 19 ndrờm bè là gơl gùng tàm tơrbŏ mìng dùl lơm dah càr Gia Lai mờ Bình Định yau. Broă lòt rê ală gùng kuèl kơh bè An Khê, Mang Yang lơh tŭ tơngai mờ priă tă jun pơndiang, is ồn là gơ wèt mờ phan lơh gơs bơh suơn sre sùm tàm khà jơnhua ngan.

Ồng Nguyễn Hữu Thọ, ơm tàm sàh Đăk Đoa, càr Gia Lai pà git, cau tĕ khà tàm sàh neh uă dơ̆ dan lơh gùng rơndeh lòt mhar tiah đah mat tơngai lik – tiah đah mat tơngai mut tơrbŏ Tây Nguyên mờ tiah kềng gah dà lềng tàm gùl lơgar, is ồn là gùng rơndeh lòt mhar Pleiku – Quy Nhơn. Ală jơnau đơs, jơnau dan do neh geh Mpồl cau ala mat Quôk hội càr Gia Lai cih dờp, jơh nùs yal wơl tus anih cribơyai bơh Quôk hội, Cíñ phủ mờ ală Ƀộ, gah broă lơh dà lơgar dê:

“Rơndap broă lơh gùng rơndeh lòt mhar Quy Nhơn – Pleiku là bơta kơp kờñ bơh làng bol tàm ƀòn lơgar dê bơh lài tus tŭ do, là bơta kơp kờñ bơh jŏ ngan. Cau tĕ khà kung dan mwò Mpồl cau ala mat Quôk hội, kờp bal mờ cau ala mat tàm càr mờ cau ala mat dà lơgar, ndrờm đơs bè bơta kơp kờñ do. Bơh 2 dơ̆ pơrjum Quôk hội khoă XIV mờ khoă XV, ndrờm lơh jat jơnau dan, jơnau đơs mờ Quôk hội, Cíñ phủ nàng lơh jat bơta kơp kờñ bơh làng bol dê”.

Cau tĕ khà mờ làng bol càr Gia Lai ai tơnggŏ bơta chờ hờp ngan tŭ gơl gùng rơndeh lòt mhar Quy Nhơn – Pleiku gam rơhời geh lam lơh, rơhời mpờl gŏ tơnơ̆ uă nam kơp gơn. Broă lơh do geh kơp gơn rơp pơgồp bơnah tă bơsong ală bơta kal ke tàm broă lòt rê, kă bro phan mùl bơh jŏ gơ wèt tàm Gùng dà lơgar 19 mờ uă gùng kuèl, gùng kơh, bơh hơ̆ lơh gơlik bơta ƀuơn rlau ai làng bol mờ mpồl lơh sa kă bro in tàm bơtàu tơnguh lơh sa. Bi Phạm Thị Thu ơm tàm sơnah ƀòn Pleiku, sùm lòt rê lơh sa tàm Quy Nhơn đơs:

“Hìu bơnhă añ sùm lơh sa tàm Quy Nhơn, broă ntrờn lòt rê tàm ală gơl gùng tŭ do kal ke ngan, sùm pal roh bơh 4 tus 5 jơ. Tŭ geh jơnau yal rơp geh gùng rơndeh lòt mhar den añ chờ hờp ngan. Añ geh git là gùng rơndeh lòt mhar do tŭ lơh gơs den rơp tơrmù lơyah tŭ jơ lòt rê, mìng gam mờr 2 jơ. Bè hơ̆ den gơ wèt mờ ală cau lơh sa bè bol hi den ờ huan roh tŭ tơngai, priă jền tàm ală dơ̆ ntrờn lòt rê”.

Gùng rơndeh lòt mhar Quy Nhơn – Pleiku ờ mìng là dùl rơndap broă lơh kuơmàng bơh càr Gia Lai dê mờ gam ai gŏ loh làng bơta kơp kờñ dipal bơh làng bol tàm ƀòn lơgar dê sùm geh cih dờp, iat kơno mờ lơh jat. Ală cồng nha do ờ mìng pơgồp bơnah bơsong ală broă gơlik geh bơh càr dê mờ gam lơh gơlik bơnàng jă nàng Mpồl cau ala mat Quôk hội càr Gia Lai in pơn jat tai lơh niam gơnoar broă tàm tơngai tus. Ồng Châu Ngọc Tuấn, Phó Ƀí thư Tỉñ ủy càr, Lam bồ Mpồl cau ala mat Quôk hội càr Gia Lai pà git:

“Bol hi sùm git wă uă ngan bè gơnoar broă, kơnòl bơh mpồl cau ala mat Quôk hội càr dê ngai pal sơlơ geh sền dờng màng rlau. Mpồl cau ala mat Quôk hội càr Gia Lai ală khoă pơn jat tai rơp đòm jat bơhiàn yau, lơh gơs niam kơnòl dờng màng bơh cau ala mat làng bol pồ dê, pơgồp bơnah bơt bơtàu Việt Nam, tàm hơ̆ geh Gia Lai bơtàu tơnguh mhar, kơ̆ kơljap mờ pas pràn, bềng lìu bơta niam chài”.

Gùng rơndeh lòt mhar Quy Nhơn – Pleiku gam geh lam lơh jal mhar tàm càr Gia Lai là cơng tàng loh làng ngan ai broă, ală bơta kơp kờñ dipal bơh cau tĕ khà mờ làng bol dê neh geh iat kơno mờ rơhời geh lam lơh ngan ngồn gơ gơs ală gùng dà, broă lơh, gơ gơs ală broă lơh ngan ngồn. Bơh hơ̆, pơgồp bơnah lơh gơlik bơta gơn kơnờm bơtàu tơnguh pa ai tiah Tây Nguyên mờ tiah kềng gah dà lềng tàm gùl lơgar in.