Đơs tơn jơh pơrjum, Củ tịc Quôk hội ồng Vương Đình Huệ pà gĭt, tơnơ̆ 1 ngai lơh broă jơh nùs mờ mhar ngan, pơrjum neh lơh sir jơh tơngume broă lơh geh ai mờ 18 jơnau đơs tă pơgồp bal tàm jơnau cribơyai bal.

Củ tịc Quôk hội jờng rơ uă ngan, Hội đồng Ñân zân ală tiah neh tă pơgồp uă tàm cồng nha bal bơh Dà lơgar dê, tàm bơta bơtàu tơnguh lơh sa, mpồl bơtiàn bơh ală tiah dê; đơs sùm, dilah bè nam 2022 neh geh bơta pa tàm broă lơh bơh Hội đồng Ñân zân ală kấp den tus nam do sơlơ đơs nền, bơta pa hơ̆ geh lơh rề ơnàng uă rlau, gơ rề uă rlau, cồng nha niam rlau tai mờ ndrờm bal rlau tai.

Broă lơh bơh Hội đồng Ñân zân ngai sơlơ geh cồng nha, rềp mờ bơta geh ngan, pơgồp bơnah kwơ màng tàm lơh jat kơnòl broă bơtàu tơnguh lơh sa- mpồl bơtiàn. Ală tiah geh broă lơh Hội đồng Ñân zân niam den lùp dồs priă dia Dà lơgar mờ gơguh lơh sa gơguh niam. Hội đồng Ñân zân ală tiah neh jat tàm adat boh lam, lam lơh ală broă lơh lơh adat boh lam, cih jơnau cih, jat sền mờ lơh nền ală broă kwơ màng, đùh sră pin dờn; lơh jat niam broă lơh tam gơl sồ, cribơyai broă mờ lơgar ndai; geh uă tam gơl pa, bơtàu tơnguh tàm broă lơh, kwơ màng là pơrjum bơh Hội đồng Ñân zân; broă lơh bơh ală ƀan, mpồl bơh Hội đồng Ñân zân dê ngai sơlơ geh sền dờng màng; broă lơh wă rò làng bol, cau tĕ khà niam rlau tai mờ jơnau kờñ, bơceh lơh nàng bơtàu tơnguh mờ tài bơta bơtàu tơnguh bơh ală tiah dê; broă lơh yal tơngĭt jơnau geh sền gròi ngan.

Nàng lơh geh cồng nha do, jat Củ tịc Quôk hội ồng Vương Đình Huệ, Hội đồng Ñân zân ală kấp neh lơh jat tàm jơnau đơng lam bơh kấp ủy, Nghị quyết bơh Dà lơgar, Quôk hội, Cíñ phủ dê; bơta sền gròi đơng lam bơh Dà lơgar, Cíñ phủ dê. Kwơ màng, Quôk hội neh ai lơh jat ală Nghị quyết lơh geh cơng tàng adat boh lam, bơta sền sơ wì nàng tam gơl pa kwơ màng broă lơh jat sền bơh Hội đồng Ñân zân dê, ală bơta kòl yan bơh Hội đồng Ñân zân ală càr dê neh geh Thường vụ Quôk hội hơ mờ sră nggal tơl làm. Bơdìh mờ hơ̆ là bơta jòi gĭt, tam gơl pa bơh ală kwang bàng, mpồl bơh Hội đồng Ñân zân dê; broă lơh pơgồp bal niam đah gơnoar atbồ mờ Hội đồng Ñân, pơgồp bal mờ ală ƀan, ngàñ ală tiah, ală anih lơh broă bơh Quôk hội dê...

Tàm tơngai tus, Củ tịc Quôk hội ồng Vương Đình Huệ sồr, Hội đồng Ñân zân jat tàm bơta đơng lam bơh kấp ủy, thường vụ kấp ủy gơwèt mờ bơyai lơh broă lơh bơh Hội đồng Ñân zân dê, do là bơta tờm lơh nền tus broă lơh jat di mờ gơnoar broă, kơnòl broă geh jàu. Củ tịc Quôk hội ồng Vương Đình Huệ, đơs:“Bol añ sồr pơn jat tai sơlơ tơnguh lơh jat gơnoar broă bơh anih lơh broă làng bol pồ ală tiah jat jơnau sồr bơh adat boh lam dê nàng lơh sir niam ngan rlau jơh ală kơnòl broă bơh nam 2024 dê. Tàm hơ̆, pơn jat tai kờp sền, lơh sir ală sră nggal geh gơrềng adat boh lam bơh ală tiah dê. Bơh broă lơh geh ngan bơh he dê, Hội đồng Ñân zân pơn jat tai tă pơgồp uă rlau tai, nền nòn mờ geh kơnòl uă rlau tai ai broă lơh adat mờ ală Nghị quyết, ngan là ală adat geh gơrềng tus rài kis lơh sa, mpồl bơtiàn ală tiah dê. Tàm nam do geh uă ngan Nghị quyết geh bơta krơi is rơ̆p geh sền sơwì mờ ai lơh jat. Bol añ sồr Hội đồng Ñân zân ală tiah, jat tàm ală adat, Nghị quyết neh geh ai lơh jat nàng geh broă rơndăp lơh lam lơh dồ bă jơh nùs gơwèt mờ ală rơndăp broă lơh adat, ngan là rơndăp broă lơh Adat ù tiah nam 2024, Adat kă bro ù tiah hìu đam, Adat hìu ơm, Adat dà, Adat Kăn kươk, Adat mpồl cau tus bal gàr niam lơngap lơngai rơndăp tăp sèng tàm ƀòn lơgar... Tàm ală adat do geh uă ngan ală tơngume geh ngan jàu ai ală tiah in”.

Đơs sùm pal lơh gơs ngan ngồn hơ̆ sồng lơh jat geh ală adat, Nghị quyết bơh Quôk hội dê, Củ tịc Quôk hội sồr Hội đồng Ñân zân ală tiah pal lơh jat mơ bơh tŭ do tơn, tàm hơ̆ geh Nghị quyết bè 3 broă lơh jơnau kờñ Dà lơgar. Mờr tus, Quôk hội rơ̆p bơyai lơh kờp sền jơh ală sră nggal, den tàng, Hội đồng Ñân zân ală tiah pal kờp sền wơl ală sră nggal bơh càr ai lơh jat, sang tĕ ală sră nggal ờ duh pal geh; mơkung kờp sền wơl bơcri priă Dà lơgar dê.

Củ tịc Quôk hội kung tơngkah, Hội đồng Ñân zân pơn jat tai tam gơl pa tơl làm ală broă lơh tàm hơ̆ geh tam gơl pa pơrjum bơh Hội đồng Ñân zân là tờm ngan, sền gròi Hội đồng Ñân zân kấp kơnhoàl, sền gròi tus Hội đồng Ñân zân kấp xã; lơh pràn srơh tàm pơrlòng; tơnguh uă bơta gĭt wă bơh kwang bàng Hội đồng Ñân zân dê, sền gròi broă lơh bơto bơtê, tề lam; sơlơ tơnguh broă làng bol lơh is tàm ală tiah, ngan là ală broă kal ke, yal yă tàm tiah gal cau, broă ờ niam, mơkung tơnguh tam gơl pa broă tìp mat mờ cau tĕ khà.