Tàm càr Dăk Lăk, Mpồl cau ala mat Quốc hội càr pơgồp bal mờ Kwang àng càr bơyai lơh pơrjum cribơyai ai jơnau đơs gơ wèt mờ jơnau rơcang cih Adat Lơh tìs glài kŭp jàm (Hình sự) (tam gơl), Adat rơndap broă anih lơh broă lùp khàu hình sự (tam gơl) mờ jơnau rơcang cih jơnau lơh nền tàm pơrjum bè gùng dà, broă lơh krơi is lơh glài broă lơh tìs adat boh lam gơ rềng tus lơh sa dà lơgar, lơh sa nă să is, ngui jak chài măi mok, tam gơl pa bơceh lơh mờ tam gơl sồ.

Ală cau ala mat ring bal bơta pal geh ai lơh jat ală rơndap lơh adat boh lam, jơnau lơh nền tàm pơrjum nàng kờñ lơh jat jơnau sồr mùl màl. Uă jơnau đơs tă pơgồp rơ wah nền gơnăp gơnoar lùp khàu, sền nền wơl ală jơnau cih bè lơh glài, ờ lùp khàu halà ơm ing lùp khàu kơnòl hình sự, mờ kung sồr bơ tơl bàr pe broă lơh, mat tìs pa.

Tă pơgồp jơnau đơs gơ wèt mờ jơnau rơcang cih Adat Hình sự (tam gơl), ala mat Sờh Sền gàr adat boh lam càr Dăk Lăk đơs là, broă ngui ală jơnau pơrya “mat sơnđan tìs ndrờm bal”, “mat sơnđan tìs kơn jơ̆ rlau”, “mat sơn đan tìs nggờ rlau” tàm sèng 6, Bơta 4 ờ hềt dipal mờ bơta chài crơng gơs adat boh lam: “Mat sơnđan tìs là mat hòi adat boh lam cau tìs dê, ờ di là jơnau pơrya ai tơnggŏ khà kơn jơ̆ cau tìs dê halà broă lơh glài. Bè hơ̆ den tàng, sồr kơlôi sơnơng ờ ngui ală jơnau pơrya do nàng gàr bơta tàm toh bơh jơnau rơcang cih dê".

Gơ wèt mờ jơnau rơcang cih Adat Rơndap broă anih lùp khàu hình sự (tam gơl), uă jơnau đơs yal wơl ală bơta gơ kòl tàm broă lơh lùp khàu tàm kâp hơ đơm, ngan là tŭ lam lơh broă lơh anih lùp khàu bàr kâp. Thượng tá Đặng Quang Hưng - Lam bồ Kwang àng sơnah ƀòn Ea Kao ring bal mờ broă cih gơs adat boh lam wil tơl kơnòl broă, gơnăp gơnoar cau lùp khàu dê là Cau lam bồ halà Phó lam bồ Kwang àng kâp sàh, mờ kung sồr pơn jat tai lơh sir jơnau cih nàng gàr gàr bơta gơtùi lơh jat ngan ngồn: “Kờñ cih loh làng bè jàu lơh, jàu gơnoar, kơnòl bơh tơl nă cau tờm dê mờ gùng dà bơsong tŭ geh bơta tam gơl bè cau lơh broă; mờ kung git mùl màl kơnòl bơh cau geh jàu lơh dê kung bè ală gah dê tàm bơta gơ rềng jàu gơnoar. Broă ờ tơl ală jơnau pal jat git nền cau đơng lam, kơnòl mờ gùng dà ala rơp lơh gơbàn tus ală jơnau pơhìn gơ tàm rơndap rơndồl, gơ kòl tàm tŭ lơh jat jơnau sồr lơh mờ lơh jat ngan ngồn ală broă lơh lah yă”.

Mpồl cau ala mat Quốc hội càr Dăk Lăk cih dờp uă jơnau đơs jơh nùs, di mờ bơta geh ngan. Ală jơnau đơs tă pơgồp rơp geh tơrgùm wơl, pơyua Quốc hội in sền swì tàm tŭ lơh sir ală rơndap lơh adat boh lam, jơnau lơh nền tàm pơrjum yal tàm dơ̆ pơrjum.

Bal mờ càr Dăk Lăk, Kwang àng càr Lâm Đồng kung pơgồp bal mờ Mpồl cau ala mat Quốc hội càr bơyai lơh pơrjum mblàng yal, yal jơnau tơnggit mờ ai jơnau đơs tă pơgồp gơ wèt mờ ală rơndap lơh adat boh lam, jơnau lơh nền tàm pơrjum bơh Ƀộ Kwang àng đơng lam cih gơs. Pơrjum geh bơyai lơh tơn pơgồp bal mờ pờ tơlik tàm internet tus Kwang àng ală sàh, sơnah ƀòn, tiah is ồn tàm càr.

Ală cau ala mat tơrgùm tă pơgồp jơnau đơs gơ wèt mờ jơnau rơcang cih Adat Hình sự (tam gơl), Adat Rơndap broă anih lùp khàu hình sự (tam gơl) mờ jơnau rơcang cih Jơnau lơh nền tàm pơrjum bè gùng dà, broă lơh krơi is lơh glài broă lơh tìs adat boh lam gơ rềng tus lơh sa dà lơgar, lơh sa nă să is, ngui jak chài, măi mok, tam gơl pa bơceh lơh mờ tam gơl sồ. Uă jơnau đơs đơs là, broă tam gơl, bơtơl ală jơnau cih adat boh lam là jơnau sồr jal mhar tàm tŭ tơngai tam gơl sồ, rơndap tap sèng mpồl lơh broă sră pơ àr mờ lam lơh broă lơh gơnoar atbồ ƀòn lơgar bàr kâp, bơh hơ̆ lơh gơs tơngume adat boh lam ndrờm bal, lơh jat jơnau sồr sền gàr lơngăp lơngai, rơndap tap sèng mờ bơtàu tơnguh lơh sa - mpồl bơtiàn.

Ală jơnau đơs jơh nùs, di mờ bơta geh ngan neh geh Mpồl cau ala mat Quốc hội ală càr tơrgùm wơl, pơyua tus Quốc hội mờ ală anih cih in nàng pơn jat tai kơlôi sơnơng, lơh sir ală rơndap lơh adat boh lam lài mờ tŭ yal Quốc hội in sền swì. Bơh hơ̆, pơn jat tai đơs nền gơnoar broă bơh Mpồl cau ala mat Quốc hội dê tàm broă iat, cih dờp jơnau đơs mờ lam nhơm tă mùl màl Tây Nguyên dê tus mờ anih pơrjum.