Củ tịc Quôk hội ồng Trần Thanh Mẫn pà git, do là dơ̆ sơn rờp Quôk hội bơyai lơh anih cribơyai. Ồng đơs nền broă jat sền neh geh Củ tịc Hồ Chí Minh sồr lơh bơh nam 1946. Củ tịc Hồ Chí Minh kung neh jat sền tàm ală ù tiah kuơmàng bè lơh sa, mpồl bơtiàn, lòt rềp làng bol, bal mờ làng bol nàng wă wờng làng bol. Củ tịc Quôk hội ală khoă kung neh sền gròi tus broă jat sền nàng kờñ bơt bơtàu, lơh gơlik mờ sền gàr dà lơgar. Ai jat sền tŭ do là nàng bơt bơtàu bơtàu tơnguh dà lơgar tàm rài pa, rài brồ să jơi bơtiàn dê. Tơngai pa do, Quôk hội khoă 15 sền gròi ngan tus broă lơh jat sền, uă dơ̆ jat sền neh geh lam lơh jơh nùs ngan, geh cồng nha mờ geh yal loh làng mờ cau ala mat Quôk hội, cau tĕ khà mờ làng bol. Jat hơ̆, broă lơh bơt bơtàu, lơh sir mpồl lơh broă bè jat sền geh sền gròi mờ bơta pơgồp bal jơh nùs, di tŭ đah ală anih lơh broă bơh Quôk hội, Cíñ phủ, Anih duh broă Mặt trận dà lơgar, Anih cah rơña làng bol, Anih kơlôi sơnơng sền sơ wì làng bol, anih lơh broă kờp dŭ tă dơ̆ ngui kes priă dà lơgar, anih lùp sền, ală anih lơh ƀău tàm dà lơgar mờ càr, ƀòn dờng.

Jat Củ tịc Quôk hội đơs, broă lơh lùp mờ hơ jơnau lùp gơ gơs là broă lơh jat sền geh cồng nha ngan bơh Quôk hội dê. Tàm ală dơ̆ pơrjum Quôk hội ndrờm geh broă lơh lùp mờ hơ jơnau lùp. Mpồl duh broă jơi bơtiàn, ală anih duh broă bơh Quôk hội dê kung geh ală dar mblàng lơh loh bè ală broă mờ cau tĕ khà, làng bol sền gròi. Tơngai lài, Quôk hội sùm lòt bal mờ Cíñ phủ. Tềng đap bơta đơng lam bồ bơh Đảng dê, Đảng mờ gùng dà broă lơh, jơnau lơh nền di ngan, ai tơlik lài gùng dà bơtàu tơnguh lơh sa – mpồl bơtiàn, gàr niam lơngăp lơngai dà lơgar. Bơh hơ̆, Cíñ phủ yal Adat boh lam, Jơnau lơh nền tàm pơrjum nàng Lơh kơnòl broă sùm Quôk hội mờ Quôk hội lơh nền ală broă bè mpồl lơh broă, lơh adat boh lam, lơh nền ală broă kuơmàng dà lơgar dê.

Củ tịc Quôk hội pà git, tàm dơ̆ pơrjum rềp ndo, Quôk hội khoă 15 neh yal ală adat boh lam, jơnau lơh nền tàm pơrjum mờ bơta tam gơl pa tàm Adat yal sră nggal pơlam lơh jat jơnau cih adat boh lam dê, tàm hơ̆ tam pà kâp, tam pà gơnoar pràn ngan ai Cíñ phủ mờ gơnoar atbồ ƀòn lơgar in jat jơnau sồr lơh bơh Tổng Ƀí thư ồng Tô Lâm dê mờ jơnau đơs: ƀòn lơgar lơh nền, ƀòn lơgar lơh, ƀòn lơgar kong kơnòl: “Lơh bè lơi nàng broă lơh gơnoar atbồ ƀòn lơgar 2 kâp gơtùi lơg jat jơnau sồr tàm tơngai tus, nàng broă lơh jat sền Quôk hội, Anih duh broă Lơh kơnòl broă sùm Quôk hội geh lam lơh ngan ngồn nàng jat sền adat boh lam, jơnau lơh nền bơh Cíñ phủ dê, Thông tư. Pơn yơu 1 nam geh 2 dơ̆ jat sền bơh Quôk hội dê, 2 dơ̆ jat sền bơh Anih duh broă Lơh kơnòl broă sùm Quôk hội dê. Tus do den bol he gơtùi mìng lơh dùl dơ̆ jat sền bơh Quôk hội dê, mơya Anih duh broă Lơh kơnòl broă sùm Quôk hội pal jat sền uă, jat sền sùm, kờp bal mờ nisơna nàng git gŏ ală broă ờ niam, di tŭ tă bơsong ală bơta kal ke”.

Củ tịc Quôk hội pà git, Anih duh broă Lơh kơnòl broă sùm Quôk hội rơp cih dờp ală jơnau đơs bơh ală cau ala mat Quôk hội dê, nàng tus do tam gơl wơl Adat broă lơh jat sền bơh Quôk hội mờ Mpồl duh broă làng bol dê yal Quôk hội in sền sơ wì, ring bal tàm pơrjum dơ̆ 10, Quôk hội khoă 15 nàng gàr ală jơnau lơh nền tàm pơrjum bè jat sền geh lơh jat nền nòn tàm bơta geh ngan.

Củ tịc Quôk hội ồng Trần Thanh Mẫn đơs sùm, pơlam lơh jat nùs nhơm tàm jơnau đơs tàm dơ̆ mut pơrjum dơ̆ 8, Quôk hội khoă 15, Tổng Ƀí thư ồng Tô Lâm neh đơs loh: Kờñ pal gờñ kơlôi sơnơng đal git loh broă lơh jat sền dờng ngan rlau jơh bơh Quôk hội dê dipal mờ bơta geh ngan, pleh gơ tàm rơndap rơndồl mờ broă lơh bơh ală anih lơh broă dà lơgar ndai dê lơh gơbàn pơhì pơhà. Pơn jat tai tơnguh bơta niam broă lơh lùp, hơ jơnau lùp, mblàng lơh loh, jat sền sră nggal adat boh lam, sền gròi tus broă sền sơ wì, sồr lam lơh jat ală jơnau dan tơnơ̆ jat sền. Củ tịc Quôk hội ồng Trần Thanh Mẫn pin dờn là: “Anih cribơyai neh dờp geh uă jơnau đơs bơh bồ tơngoh jak, bơh bơta jơh nùs, geh kơnòl bơh ală cau ala mat Quôk hội, ală cau geh jơnau git wă jrô, cau kơlôi sơnơng jak chài dê, tă pơgồp uă ngan tàm broă lơh sir mpồl lơh broă gơ rềng tus broă lơh jat sền tàm tŭ tơngai pa bơh dà lơgar dê, pơgồp bơnah chồl tơnguh bơta bơtàu tơnguh lơh sa mpồl bơtiàn, sền gàr dà lơgar, sền gàr lơngăp lơngai, bơt bơtàu anih lơh broă cíñ trị sàng goh, kơ̆ kơljap, pràn kơldang, rơcang lài kơryan sa kuề sa kuà, pơhì pơhà, broă ờ niam”.