Đơs tàm dar pơrjum, Củ tịc Quôk hội ồng Trần Thanh Mẫn pà git, tàm dar pơrjum do, Anih duh broă Lơh kơnòl broă sùm Quôk hội ai jơnau đơs cih dờp, mblàng lơh loh, tam gơl 28 jơnau rơcang cih adat boh lam, jơnau lơh nền tàm pơrjum neh geh cribơyai tàm dơ̆ 1 bơh dar pơrjum dê, kờp dŭ yal Quôk hội in ring bal tàm dơ̆ 2. Dar pơrjum kung ai jơnau đơs sơn rờp bè bàr, pe tơngume yal Quôk hội in tàm dơ̆ 2, geh: Adat tam gơl, bơtơl bàr pe bơta bơh ală adat boh lam tàm gah sền gàr dà lơgar; Jơnau lơh nền tàm pơrjum bơh Quôk hội dê bè broă tam gơl halà sang tĕ mpồl atbồ priă jền, priă lơh geh krơi is bơh ală anih lơh broă, mpồl lơh broă sră pơ àr gơnoar atbồ dà lơgar dê; Jơnau lơh nền rơndap tap sèng mpồl lơh broă sră pơ àr gơnoar atbồ kâp càr nam 2025.

Củ tịc Quôk hội ồng Trần Thanh Mẫn sồr: “Tơl tơngume geh sền sơ wì ờ mìng nàng kờñ lơh sir adat boh lam, mờ gam pơgồp bơnah lơh gơlik bơta gơn kơnờm pa ai bơta bơtàu tơnguh dà lơgar dê in mờ gàr niam bơta đơng lam sùm bơh mpồl lơh broă sră pơ àr gơnoar atbồ dà lơgar dê tàm tŭ tơngai pa. Ală anih lơh broă yal, anih lơh broă sền sơ wì mờ ală mpồl geh gơ rềng pơgồp bal jơh nùs, lơh loh ală tơngume gam geh uă jơnau đơs, gàr tơl sră nggal geh ring bal ndrờm ngan ngồn cèng bơta gơ hòi gơ jà mờ gơtùi lam lơh tàm ngan ngồn”.

Tàm dar pơrjum, ală kwang geh jơng bơh Anih duh broă Lơh kơnòl broă sùm Quôk hội dê neh ai jơnau đơs tus mờ jơnau rơcang cih Adat rơndap broă gơnoar atbồ kâp hơ đơm (tam gơl). Anih duh broă lơh kơnòl broă sùm Quôk hội ring bal mờ tơngume cih dờp, tam gơl bơh Cíñ phủ dê. Bulah bè hơ̆, sồr sền sơ wì nền nòn jơnau cih Mpồl duh broă làng bol kâp càr geh tam pà kâp ai Anih duh broă làng bol dồ kâp bal in halà Mpồl duh broă làng bol kâp sàh. Cau lam bồ Anih duh broă Adat boh lam mờ sền gàr adat boh lam ồng Hoàng Thanh Tùng đơs: “Mpồl duh broă làng bol là anih ala mat ai nùs nhơm, bơta kơp kờñ mờ gơnoar lơh tờm bơh làng bol kâp hơ đơm dê. Den tàng, broă tàm jàu ală kơnòl broă, gơnăp gơnoar mờ adat boh lam cih gơ wèt gơnoar, kơnòl bơh Mpồl duh broă làng bol ai Anih duh broă làng bol in là anih lơh broă sră pơ àr gơnoar atbồ dà lơgar tàm kâp hơ đơm là ờ dipal mờ bơta geh ngan, gơnoap gơnoar mờ broă lơh bơh tơl anih lơh broă dê, lơh gơbàn bơta anih lơh broă sră pơ àr gơnoar atbồ lơh ala kơnòl broă, gơnap gơnoar bơh anih lơh broă làng bol pồ tàm kâp hơ đơm dê, ờ dipal mờ jơnau pal jat rơndap broă gơnăp gơnoar dà lơgar geh bơta jàu kơnòl, pơgồp bal mờ sền gròi gơnăp gơnoar”.

Mblàng lơh loh bè bơta do, Ƀộ trưởng Ƀộ Kơnòl broă dơlam is mò Phạm Thị Thanh Trà pà git: “Bol hi jat tàm bàr pe tơngume, lài ngan là tơngume cíñ trị mờ dùl nùs nhơm ai gơnoar bơh Mpồl duh broă Đảng dà lơgar, bơh Ƀộ Cíñ trị dê, tơrgùm cèng bơta wil tơl jơh nàng lam lơh tam pà kâp, tam pà gơnoar đah dà lơgar mờ kâp hơ đơm mờ đah ală kâp gơnoar atbồ kâp hơ đơm. Dơ̆ 2 là kung sơn đờm bơh jơnau sồr ngan ngồn pal tam gơl bơh broă lơh atbồ sră pơ àr gơnoar atbồ ờs mờng gơ gơs đơng lam kâp hơ đơm dồ bă loh làng, làng bol lơh tờm, geh cồng nha drơng broă làng bol. Dilah bè tŭ do den ờ gơtùi rề ơnàng mpồl lơh broă bơh Mpồl lơh broă làng bol dê den kung kal ke ngan”.

Đơs tàm dơ̆ cribơyai, Củ tịc Quôk hội ồng Trần Thanh Mẫn sồr anih cih mờ anih sền sơ wì pơn jat tai kờp sền, jơh nùs tam pà kâp, tam pà gơnoar, nàng tơnơ̆ tŭ jơnau rơcang cih adat boh lam geh Quôk hội ring bal, ală tiah gơtùi lam lơh mơ tơn: “Añ sồr pơn jat tai kờp sền gơ in nền nòn. Bơh tŭ do tus tŭ Quôk hội ring bal gam bơta lơi mờ Cíñ phủ pơn jat tai tam pà kâp ai gơnoar atbồ kâp hơ đơm in tàm adat boh lam dê là bol he pal kờp dŭ nàng tơnơ̆ do tŭ neh ring bal den kâp hơ đơm ờ gŏ đơs là ờ gơtùi lơh tài kòl yan. Adat boh lam kơlôi sơnơng là geh jàu ai Cíñ phủ in cih ờ sơ lơŭ wơl mờ jơnau cih Sơnua boh lam dê nàng bol he lam lơh, ai mpồl lơh broă sră pơ àr gơnoar atbồ in lơh broă”.

Kung tàm dar pơrjum poh lài, Anih duh broă lơh kơnòl broă sùm Quôk hội neh pờ tê ring bal Kơrnuat boh lam tam gơl Bơta 10 bơh Kơrnuat boh lam khà kờp làng bol dê. Jat hơ̆, tơl yô ùr bơklau, cau dồ nă să geh gơnoar lơh nền is bè tŭ tơngai deh kòn, khà kòn mờ bơta yah đah ală dơ̆ deh di mờ sơnam, bơta pràn kơldang să jan, bơta geh ngan bơsram sră, lơh broă, priă lơh geh mờ ròng kòn bơh cau dồ nă să, yô ùr bơklau dê bơh bơta ring bal.