Jat Jơnau lơh nền rơndap tap sèng mpồl lơh broă sră pơ àr gơnoar atbồ kâp càr nam 2025, gùt lơgar rơp geh 34 càr, ƀòn dờng, geh 6 ƀòn dờng gơ wèt dà lơgar mờ 28 càr. Kờp jơh khà kwang bàng, cau lơh broă sa priă nhai dà lơgar lam lơh rơndap tap sèng là rlau 447 rbô nă; kờp hơh khà hìu lơh broă dà lơgar là rlau 38 rbô anih; pơn jat tai ngui mờr 34 rbô anih, jơngkah wơl rlau 4 rbô anih.

Cribơyai tàm jơnum bè Jơnau lơh nền do, ală cau ala mat ring bal mờ ală broă rơndap lơh rơndap tap sèng ală càr, ƀòn dờng gơ wèt dà lơgar nam 2025 mờ gŏ là, ală broă rơndap lơh rơndap tap sèng mpồl lơh broă sră pơ àr gơnoar atbồ kâp càr bơh Cíñ phủ ai tơlik neh lơh jat mờ di mờ ală jơnau sồr lơh, gùng dà ai tơlik lài bơh kâp geh gơnoar dê. Ồng Dương Khắc Mai, mpồl cau ala mat càr Dăk Nông đơs nền, tơmut bal càr là jơnau lơh nền kah yau. Bơta pal đơs là tơnơ̆ tŭ tơmut bal, ală càr, ƀòn dờng rơp rơndap kwang bàng, cau lơh broă sa priă nhai dà lơgar, cau lơh broă mờ bơsong anih lơh broă jơngkah wơl bè lơi: “Bơta kuơmàng ngan rlau jơh là tŭ tơmut bal den bol he pal gàr wơl mpồl kwang bàng geh bồ tơngoh bơsram sră, geh pràn jak lơh broă. Dơ̆ 2 là bè anih lơh broă pal atbồ dồ bă nền nòn, mờ kung ờ lời gơtìp ờ diơng, pal geh broă rơndap lơh nàng tam gơl jơnau kờñ ngui ală anih lơh broă do.”

Jat cau ala mat ồng Trần Hoàng Ngân, mpồl cau ala mat ƀòn dờng Hồ Chí Minh đơs, tơmut bal càr rơp dong ală tiah rơndap tap sèng wơl ù tiah bơtàu tơnguh. Jat ồng đơs, nàng ală càr, ƀòn dờng in gơtùi ngui bơta pràn, lơh broă geh cồng nha tơnơ̆ tŭ tơmut bal den: “Pal lơh bè lơi nàng ală tiah tàm càr in ring bal tàm tơrbŏ bal, gàr niam phan bơna, ờ mìng là phan bơna bè gùng lòt mờ gam jơh bal bè phan bơna sồ tai. Bơta do pal geh gơn kơnờm, mờ dùl tàm ală bơta gơn kơnờm kuơmàng là priă jền. Den tàng añ kung dan sền sơ wì Adat bè kes priă dà lơgar, den bơta pràn bè ù tiah tơngai 5 nam bơh nam 2016 tus nam 2030 bol hi pal lời wơl ală càr, ƀòn dờng in nàng ală càr, ƀòn dờng gơtùi bơcri priă tàm phan bơna do”.

Phó Thủ tướng Duh broă sùm ồng Nguyễn Hòa Bình đơs nền, broă rơndap tap sèng mpồl lơhbroă sră pơ àr gơnoar atbồ kâp càr dơ̆ do là dùl dơ̆ kac màng bè rơndap mpồl cau lơh broă mờ kwang bàng. Jơnau kờñ là bơt bơtàu rơndap tap sèng dipal mờ lơh gơs ù tiah bơtàu tơnguh lơh sa tơl pràn, pơgồp bal bơta pràn ù tiah, jơh bal tiah kơh bơnơm mờ tiah dà lềng. Kờp dŭ, ngai 30/6 do, jơh ală tiah rơp dồ ròt bơyai lơh yal nhàr ù tiah pa bơh càr, sàh dê bal mờ mpồl kwang đơng lam bồ pa jơh bal bè Đảng mờ gơnoar atbồ. Drim ngai 30/6, ală gơnoar broă kâp càr, kâp sàh rơp geh yal, bơh ngai 01/7, mpồl cau lơh broă pa jat broă lơh gơnoar atbồ kâp hơ đơm 2 kâp rơp ngan ngồn lơh broă.

Ai jat Ƀộ trưởng Ƀộ broă dơlam is dà lơgar mò Phạm Thị Thanh Trà đơs, broă rơndap  tao sèng geh sền sơ wì nền nòn, uă gah bơh ù tiah geh is, khà kờp làng bol tus bơta kah yau, niam chài, jơi bơtiàn, pin dờn, broă rơndap lơh bơtàu tơnguh mờ nùs tồr mpồl bơtiàn: “Rơndap tap sèng ală mpồl lơh broă sră pơ àr gơnoar atbồ kâp càr jat bè bơta ù tiah wèt hờ dà lềng dờng mờ ngui bơta pràn lơh sa dà lềng mờ bơta ƀuơn nàng tơmut bal. Ƀộ Cíñ trị, Mpồl duh broă Đảng dà logar, kuơmàng là Cíñ phủ neh rơcang lài jơh ală bơta pal geh, mơya bơta kuơmàng rlau jơh hơ̆ là ală tiah lam lơh rơndpa tap sèng, tơmut bal, lơh jat ală jơnau sồr nàng lam lơh broă lơh gơnoar atbồ kâp hơ đơm 2 kâp pràn ngan”.

Bè hơ̆ den broă rơndap tap sèng wơl ală mpồl lơh broă sră pơ àr gơnoar atbồ kâp càr dơ̆ do ờ mìng là broă kuơmàng tàm broă tơrmù lơyah mpồl cau lơh broă sa priă nhai dà lơgar, ngui geh cồng nha priă jền mờ gam lơh gơlik ù tiah bơtàu tơnguh pa, lơh gơlik bơta gơn kơnờm chồl tơnguh lơh sa – mpồl bơtiàn ală càr, ƀòn dờng. Mờ bơta rơcang lài nền nòn bơh dà lơgar tus kâp hơ đơm, bơta ring bal bơh ală kâp, ală gah broă lơh mờ jơh gùt làng bol dê, broă lơh tơmut bal, rơndap tap sèng mpồl lơh broă sră pơ àr gơnoar atbồ kâp càr nam 2025 hơ pơrgon rơp lơh gơlik dùl muh mat pa ai dà lơgar in, di mờ jơnau sồr bơtàu tơnguh kơ̆ kơljap mờ mut gơ rờm bal jrô ơnàng tàm tŭ tơngai pa.