Sền bal, ală tơngume tam gơl, bơ tơl tàm Jơnau rơcang cih Adat dơ̆ do ndrờm kờñ rề ơnàng, tơnguh bơta kuơ ai cau lơh broă in, gơ hòi gơ jà cau lơh broă blơi Ƀảo hiểm xã hội, gàr ală gơnoar niam ngan rlau jơh ai cau lơh broă in tàm tŭ lơh broă kung bè tơnơ̆ tŭ jơh sơnam rê rlô lơh broă.

Jat jơnau cih bơh Adat Ƀảo hiểm xã hội tŭ do dê, ală cau tă priă Ƀảo hiểm xã hội rlau 35 nam gơ wèt mờ cau lơh broă là cau klau mờ rlau 30 nam gơ wèt mờ cau lơh broă là cau ùr den tŭ jơh sơnam rê rlô lơh broă, bơdìh mờ priă nhai jơh sơnam rê lơh broă pah nhai, khi rơp geh dờp bơnah dong kờl dùl dơ̆ tŭ jơh sơnam rê rlô lơh broă ai tơngai tă priă Ƀảo hiểm xã hội sơrlèt rlau tŭ tơngai ndrờm bal mờ khà dờp priă nhai jơh sơnam rê rlô lơh broă uă ngan rlau jơh là 75%. Mùl màl, khà dong kờl dùl dơ̆ là: Pah dùl nam sơrlèt rlau, rơp geh kờp ndrờm mờ nggùl priă nhai kờp bal. Ồng Nguyễn Duy Cường, Phó Kwang atbồ Vụ Ƀảo hiểm xã hội, Ƀộ Lao động- Thương ƀiñ mờ Xã hội pà git: “Mờ jơnau cih gam geh ngui tŭ do, den bơta geh ngan tàm 2, 3 mpồl lơh broă; 2, 3 mpồl lơh sa kă bro tŭ cau lơh broă tus sơnam rê rlô lơh broă mờ cau geh tŭ tơngai tă priă Ƀảo hiểm xã hội geh khà uă ngan rlau jơh là 75% den khi rơp tơn jơh, nàng lơh sră nggal bơsong sa priă nhai jơh sơnam rê rlô lơh broă mờ anih Ƀảo hiểm xã hội. Tơnơ̆ hơ̆ den hơ̆ sồng khi pơn jat tai tă priă Ƀảo hiểm xã hội, tài khi mblàng là tă bè hơ̆ là neh uă ngan rlau jơh 75% bloh mờ kung neh tơl bơta pal geh nàng geh sa priă nhai jơh sơnam rê rlô lơh broă. Den tàng, jơh sơnam rê rlô lơh broă tơnơ̆ hơ̆ den hơ̆ sồng pơn jat tai kĭ sră pơrgon lơh broă. Hơ̆ là mờ jơnau cih gam ngui tŭ do den tàm broă lơh Ƀảo hiểm xã hội ờ geh jơnau cih gơ rềng tus broă pơn jờng gơ wèt mờ ală cau bè hơ̆ nàng cau lơh broă in pơn jat tai kĭ sră pơrgon, pơn jat tai tă priă Ƀảo hiểm xã hội”.

Bè jơnau cih tơrmù bơta khà nam tă priă blơi Ƀảo hiểm xã hội lơyah ngan rlau jơh nàng geh sa priă nhai jơh sơnam rê rlô lơh broă bơh 20 nam gơmù gam 15 nam gam dờp geh bơta sền gròi bơh mpồl bơtiàn dê. Ồng Nguyễn Duy Cường pà git, jơnau cih do nàng kờñ lơh gơlik tŭ niam ai ală cau blơi jơla in (bơh 45 tus 47 sơnam hơ̆ sồng sơn đờm blơi Ƀảo hiểm xã hội) halà ală cau tă priă ờ geh lơh sùm lơh gơbàn bơta tŭ tus sơnam rê rlô lơh broă kung ờ hềt tơl 20 nam tă priă blơi Ƀảo hiểm xã hội kung geh sa priă nhai jơh sơnam rê rlô lơh broă pah nhai. Bè hơ̆, ală cau do lài do ờ geh sa priă nhai jơh sơnam rê rlô lơh broă, tŭ do rơp geh sa priă nhai jơh sơnam rê rlô lơh broă pah nhai, jat tơngai pơrgon den khà priă nhai jơh sơnam rê rlô lơh broă rơp geh dà lơgar tơnguh mờ tàm tơngai sa priă nhai jơh sơnam rê rlô lơh broă rơp geh kes priă Ƀảo hiểm xã hội blơi Ƀảo hiểm y tế.

Nàng kờñ pơn jờng cau lơh broă pơn jat tai blơi Ƀảo hiểm xã hội tơnơ̆ sơnam rê rlô lơh broă, nàng ờ mìng dong tơnguh khà priă nhai jơh sơnam rê rlô lơh broă, tơnguh gơnoar kuơ ai cau lơh broă in mờ gam pơgồp bơnah sền gàr niam rlau tai ai cau lơh broă in tàm tŭ lơh broă, Jơnau rơcang cih Adat Ƀảo hiểm xã hội (tam gơl) tơlik dan jơnau đơs, mờ 2 rơndap broă, geh tam gơl, bơ tơl jơnau cih bè dong kờl dùl dơ̆ tŭ jơh sơnam rê rlô lơh broă nàng pơn jờng cau lơh broă pơn jat tai tă priă blơi Ƀảo hiểm xã hội tơnơ̆ sơnam rê rlô lơh broă. Rơndap broă dơ̆ 1 cih: Khà dong kờl dùl dơ̆ tŭ jơh sơnam rê rlô lơh broă geh kờp jat khà nam tă priă blơi Ƀảo hiểm xã hội jơnhua rlau khà nam ndrờm bal mờ khà sa priă nhai jơh sơnam rê rlô lơh broă 75%, pah dùl nam tă priă blơi Ƀảo hiểm xã hội den geh kờp ndrờm nggùl dơ̆ bơh khà kờp bal priă nhai dê lơh bơnàng jă nàng tă priă Ƀảo hiểm xã hội.

Rơndap broă dơ̆ 2 cih: Khà dong kờl dùl dơ̆ tŭ jơh sơnam rê rlô lơh broă geh kờp jat khà nam tă priă Ƀảo hiểm xã hội jơnhua rlau khà nam ndrờm bal mờ khà sa priă nhai jơh sơnam rê rlô lơh broă 75%, pah dùl nam tă priă Ƀảo hiểm xã hội den geh kờp ndrờm mờ nggùl dơ̆ bơh khà kờp bal priă nhai lơh bơnàng jă tă priă Ƀảo hiểm xã hội dê. Gơ wèt mờ cau lơh broă neh tơl bơta nàng geh sa priă nhai jơh sơnam rê rlô lơh broă jat jơnau cih tàm Bơta 71 mờ Bơta 72 bơh Adat do dê mờ pơn jat tai tă priă Ƀảo hiểm xã hội den pah nam tă priă Ƀảo hiểm xã hội tơnơ̆ sơnam rê rlô lơh broă jơnhua rlau khà nam ndrờm bal, mờ khà sa priă nhai jơh sơnam rê rlô lơh broă 75% den geh kờp ndrờm 2 dơ̆ bơh khà kờp bal priă nhai lơh bơnàng jă tă priă Ƀảo hiểm xã hội dê. Ồng Nguyễn Duy Cường, Phó Kwang atbồ Vụ Ƀảo hiểm xã hội, Ƀộ Lao động- Thương ƀiñ mờ Xã hội pà git tai: “Tàm Jơnau rơcnag cih Adat Ƀảo hiểm xã hội (tam gơl) den gam sồr ai jơnau đơs 2 rơndap broă. Tàm hơ̆ geh bơ tơl tai dùl rơndap broă cih là: Gơ wèt mờ ală cau lơh broă pơn jat tai lơh broă tơnơ̆ sơnam rê rlô lơh broă, den tơngai tă priă Ƀảo hiểm xã hội tơnơ̆ sơnam rê rlô lơh broă mờ sơrlèt rlau tŭ tơngai tă priă ndrờm bal mờ khà sa priă nhai uă ngan rlau jơh 75% hơ den pah dùl nam tă priă sơrlèt rlau rơp geh kờp là 2 nhai priă nhai ala mờ nggùl dơ̆ priă nhai bè jơnau cih tŭ do. Mờ jơnau cih do, nàng kờñ rơp pơn jờng ală cau lơh broă pơn jat tai tă priă Ƀảo hiểm xã hội tơnơ̆ sơnam rê rlô lơh broă. Broă mờ cau lơh broă pơn jat tai tă priă Ƀảo hiểm xã hội tơnơ̆ sơnam rê rlô lơh broă den: Lài ngan rơp gàr niam rlau tai gơnoar kuơ bơh cau blơi Ƀảo hiểm dê, tài tơnơ̆ do ală khà priă nhai jơh sơnam rê rlô lơh broă digơlan rơp jơnhua rlau; dơ̆ 2 là tàm tŭ lơh broă tơnơ̆ sơnam rê rlô lơh broă, tài cau lơh broă kung gam tă priă Ƀảo hiểm den khi rơp geh gàr ală gơnoar kuơ ndai, ală broă dong kờl ndai, pơn yơu ală broă dong kờl gơ rềng tus kòp jê geh gàr niam rlau”.