Tềng đăp jơnau kờñ uă bè phan ngui bơ̆t bơtàu, Anih duh broă Làng bol càr sồr ală ƀòn lơgar rơcăng lài hòi tơrgùm bơta pràn, pal tăc wil tơl, kơ̆ kơl jăp drà tăc blơi, bañ lời gơlik geh jơnau prăp pồn phan, tơngguh giă. Jơh gùt càr tŭ do geh 89 nơm hìu gơtìp tơrlơm, tơrlah, pơrdô kờñ pal geh bơ̆t bơtàu wơl mờ mờr 300 nơm hìu gơtìp ờdiơng kờñ pal lơh niam wơl. Tus tŭ do, rlau 50 nơm hìu neh geh sơnđờm lơh, 46 nơm hìu gam geh lơh niam wơl tàm 30 sàh, sơnah ƀòn mờ bơta tus bal bơh jơh ală anih lơh broă cíñ trị, mpồl kwang àng, mpồl ling klàng mờ ală mpồl lơh sa kă bro dê.

Anih duh broă Làng bol càr sồr ală gah geh gơnoar sơlơ lòt sền, lơh glài kràñ broă lơh prăp pồn phan, bơcăp giă. Jăt Sờh Bơ̆t bơtàu càr Khánh Hoà, càr dong kờl 60 tơlak đong tơl nơm hìu lơh pa mờ tam pà 500 tấn sơmăng, pơnđơl lơh sir lơh pa lài mờ ngai 15/01/2026 tus mờ lơh niam wơl hìu lài mờ ngai 31/12/2025 do.