Dùl jơnau gơlik geh ai lơh pơnyơu geh lơh tàm dơ̆ pơrjum, tơnơ̆ tŭ iăt Ƀộ trưởng Ƀộ Bơto bơtê mờ Bơsram mblàng sền bè jơnau bơh tài gơbàn bơh jơnau geh ngan tam lơh tam pờng tàm hìu bơsram, oh Đậu Khắc Gia Bảo là cau ala măt tus bơh Mpồl Cau ala măt Quôk hội kơnòm dềt càr Quảng Trị geh jơnau lùp tàm dơ̆ lùp: Ơ Ƀộ trưởng Ƀộ Bơto Bơtê mờ Bơsram, añ neh iăt kơno nền ngan jơnau mblàng sền bơh Ƀộ trưởng dê bè jơnau bơh tài gơlam tus jơnau geh ngan tam lơh tàm pờng tàm hìu bơnhă. Bulah bè hơ̆, añ gŏ Ƀộ trưởng ờ hềt đơs di ngan bè bơta gơrềng bơh bồ tơngoh nùs nhơm dê tàm broă tam lơh tam pờng tàm hìu bơnhă.

Ala măt Ƀộ Bơto bơtê mờ Bơsram hơ jơnau lùp: Añ ưn ngài ngan mờ dồ nùs bal ngan mờ cau ala măt Quôk hội là oh Đậu Khắc Gia Bảo, do kung là bơta ờ hềt dipal, den tàng tàm tơngai tus, bol hi rơ̆p pơgồp bal kơ̆ kơl jăp mờ gah lơh sơnơm nàng sơlơ lam lơh tai mờ bơsong di tŭ rlau ală broă nùs nhơm bồ tơnggoh gơlik geh bơh kơnòm bơsram dê.

Đơs tàm dơ̆ pơrjum lơh pơnyơu bè “Rơcăng lài, kơryan tam lơh tam pờng tàm hìu bơsram”, Ƀộ trưởng Ƀộ Bơto bơtê mờ Bơsram ồng Nguyễn Kim Sơn, đơs là: Hơ jơnau lùp pa do, đơs là lơh pơnyơu mơya broă là broă ờ lơh pơnyơu, hơ̆ là broă geh ngan. Añ gŏ ală oh neh lùp mờ tơnggŏ wờng bè khà kung bè ală broă lơh mờ Ƀộ Bơto bơtê mờ Bơsram dê neh đơs, lam lơh. Bol he pal bal mờ gơ̆p đơs nền dồ bă đơs ngan là, hìu bơsram chờ hờp chờ hờn ờ gơtùi geh anih ai tam lơh tam pờng, bơta ờ niam mờ ală jơnau pơhìn gơ wèt mờ kơnòm bơsram in.

Ai gơ wèt mờ Ƀộ trưởng Ƀộ Lơh sơnơm mò Đào Hồng Lan den đơs, bulah tus bal dơ̆ pơrjum lơh pơnyơu Quôk hội kơnòm dềt, mơya Ƀộ trưởng geh wơl jơnau kơlôi gơlơh bè gam tus bal dồ dơ̆ lùp ngan ngồn. Mò Đào Hồng Lan, đơs: Ală jơnau đơs lùp kung bè hơ jơnau lùp bơh ală cau ala măt kơnòm dê dê là jơh nùs mờ geh kơnòl, tơnggŏ bơta sền gròi tus ală broă bơh kơnòm dềt dê. Bol hi gŏ geh kwơ ngan ngồn gơ wèt mờ jơh bal kơnòm dềt tŭ do. Ală broă gơrềng tus broă ngui jràu, is ồn là jràu pa, jràu điện tử, jràu tơn duh duh mờ ală phan lơh gơdan bè ơlak ƀièr, geh tŭ là geh bal ma túy kung là bơta pơhìn dờng ngan tus pràn kơldang să jan kơnòm dềt dê đơs bal kung bè là bơta niam khà kờp làng bol, gar sơntìl bơh dà lơgar bol he dê.

Mờ gơnoar broă là Cau ala măt Quôk hội kơnòm dềt bơh Mpồl Cau ala măt Quôk hội ƀòn dờng Hà Nội dê, oh Nguyễn Trà My bơsram ơdŭ 8 B3, Hìu bơsram Kâp bàr Vinchool Times City, đơs: Tàm dơ̆ pơrjum ngai do, tơl nă cau neh cribơyai duh hồl ngan mơkung geh uă ngan dơ̆ tàm pơndang niam mờ gơlơh kờñ ngan. Oh gơn kơnờm là ală jơnau đơs tă pơgồp jơnau jơnau đơs bơh oh dê rơ̆p geh ală ƀộ, gah broă kâp dà lơgar iăt kơno mờ sền gròi rlau, geh ală broă lơh bơh ală jơnau đơs bơh bol oh dê, nàng gơtùi tơn jơh ală broă tàm sơnam bol oh dê.

Tơnơ̆ dơ̆ lùp mờ hơ jơnau lùp lơh pơnyơu, Củ tịc Quôk hội ồng Trần Thanh Mẫn jờng rơ mờ đơs niam ngan Đoàn Dà lơgar, Mpồl duh broă Mpồl kơnòm dềt Dà lơgar neh geh jơnau bơceh lơh mờ ală anih lơh broă bơyai lơh dơ̆ pơrjum lơh pơnyơu “Quôk hội kơnòm dềt”. Mơkung đơs sùm, Đảng, Dà lơgar sùm lời bơta sền gròi, dong kờl is ồn tus broă lơh sền gàr, dong kờl, bơto bơtê kơnòm dềt. Jăt Củ tịc Quôk hội đơs, dơ̆ pơrjum lơh pơnyơu “Quôk hội kơnòm dềt” dơ̆ 02 neh săc rwah 2 tơnggume là “Rơcăng lài kơryan tam lơh tam pờng tàm hìu bơsram” mờ “Rơcăng lài kơryan bơta aniai bơh jràu, phan lơh gơdan dê, ngan là tàm tiah hìu bơsram” geh kwơ ngan, geh mpồl bơtiàn sền gròi ngan.