Đơs là khà gơguh 6,5% GDP nam 2023 là lơyah pơndrờm mờ khà 8,83% tàm 9 nhai bơh nam do dê. Bulah bè hŏ, ồng Trần Đức Thuận, mpồl kwang bàng càr Nghệ An đơs nền: khà gơguh lơh sa nam 2022 là chờ hờp ngan mơya ờ gŏ di kơp kơnờm ir khà gơguh lơh sa tàm nam 2023 jơnhua rlau. Tài nam 2023 geh đơs lài cèng uă bơta aniai, bơta lòng tŭ tam lơh đah Nga mờ Ukraine ờ hềt geh tềl tơnggŏ tơn jơh, gơ jat bal mờ giă năng lượng mờ phan sa gơguh jơnhua, roh giă priă gơguh uă mờ priă cồng ai càn gơguh jơnhua: “Tŭ do añ sền gròi ngan tus bơta xăng zờu kung geh uă tam gơl, bol he ờ gơtùi sền ờ sơp là bol he neh gơtùi gàr broă ngui xăng zờu bè pa do. Den tàng broă ai tơlik khà 6,5% jat añ den bol he neh git kơrhia mờ ai tơlik khà 6,5% bè do là dipal”.

Ồng Vũ Tiến Lộc, mpồl kwang bàng ƀòn dờng Hà Nội đơs là, rài lơh sa bol he dê geh bơta gơ wèt uă tàm priă bơcri, tac hờ lơgar ndai, drà kă bro dunia. Tàm lơgar, mpồl lơh sa kă bro gơtìp uă ngan kal ke, bơta pràn chul chồl gơguh lơh sa tờm ngan là tac hờ lơgar ndai, bơcri priă bơh lơgar ndai: “Tàm tŭ tơngai kal ke bè do, Quôk hội ai tơlik dùl khà gơguh lơh sa là 6,5%, den do là dùl khà pơn đơl pràn uă. Dilah ờ geh ală tam gơl ờ niam lơi tai bơh broă tàm dunia dê den bol he gơtùi lơh geh khà ai tơlik do. Ai dilah drà kă bro dunia geh ală tam gơl ờ niam rlau, kal ke rlau, den broă gơtùi lơh geh khà 6,5% là dùl bơta lòng dờng ngan”.

Đơs tus ală broă lơh tàm tơngai tus, Kwang bàng Vũ Hồng Thanh, gơ wèt mpồl càr Quảng Ninh đơs là, dilah bơsong niam ală bơta ờ niam tŭ do, den gơguh lơh sa ờ mìng nam do mờ nam tơnơ̆ kung gơtùi lơh geh cồng nha niam rlau tai: “Bol he pal bơsong ală bơta ờ niam tàm dơlam is tŭ do bơh rài lơh sa dê bè  ai priă bơcri dà lơgar. Dilah ai priă bơcri niam den geh tŭ gơguh lơh sa nam 2022 do dê gam rlau 8%, den bơta lơyài ai priă bơcri dà lơgar tàm nam 2023 pal tơrgùm ai priă bơcri dà lơgar. Bal mờ hơ̆, den bơnah priă 347 rbô tơmàn đông bơh Nghị quyết sồ 43 bơh broă lơh nam priă jền, broă lơh priă jền dong kờl bơtàu tơnguh wơl lơh sa, bơtàu tơnguh lơh sa mpồl bơtiàn pal tơrgùm nàng tàm pơn ring, ai priă bơcri niam”.

Kung tàm poh lài, tŭ cribơyai bè broă lơh bơtàu tơnguh wơl lơh sa mpồl bơtiàn, ală kwang bàng Quôk hội sền gròi tus broă lơh “Gùng pờ internet mờ măi tíñ ai oh in”. Jơnau kờñ bơh broă lơh do dê là ai pà 1 tơlak nơm măi tíñ ai kơnòm bơsram gơ wèt ală hìu bơnhă rƀah in. Bulah bè hơ̆, tŭ do gam rlau 400 rbô măi tíñ ờ hềt geh ai. Bơdìh hơ̆ tai, broă lơh do kung ờ hềt gàr niam gùng pờ internet, geh internet tus jơh ală hìu bơnhă. Ală kwang bàng neh mblàng lơh loh mờ ai tơlik broă lơh tàm tơngai tus. Mò Nguyễn Thị Sửu, mpồl kwang bàng càr Thừa Thiên- Huế sồr tơngai tus bal tơrgùm phan bơna măi mok, kông nghệ yal tơnggit jơnau. Kơp kờñ Ƀộ trưởng Ƀộ Thông tin mờ Truyền thông ai tơlik jơnau đơs di tŭ Cíñ phủ in nàng dong cau geh dờp broă dong kờl: “Ala mờ jơnau rah rài den geh lơh tơrgùm mờ tơrgùm tàm kâp xã halà kâp hơnhoàl, tàm dùl kâp hàñ cíñ là dùl phần mềm bal tàm gùt lơgar. Añ gŏ cồng nha rlau mờ bơta do geh dong kuơ uă ngan ai jơnau tam gơl sồ in, tam gơl sồ hơ̆ sồng là kuơmàng, tam gơl sồ tàm gah bơto bơsram tơnơ̆ lơh sa, niam chài tàm niam chài bơto bơsram”.

Ồng Nguyễn Lâm Thành, mpồl kwang bàng càr Thái Nguyên đơs là, gam uă ngan tiah kal ke tàm ală thôn, ƀòn, tiah làng bol ơm kis ờ geh gùng pờ internet halà gùng pờ internet ờ pràn, ngan là tàm ală tiah kơh bơnơm, tiah nhàr dà lơgar, bồt dà lềng. Tàm tŭ hơ̆, broă lơh “Gùng pờ internet mờ măi tíñ ai oh in” lơyài gam lơh: “Jơnau lài ngan là tài broă git bè bơta geh ngan mờ bơsong ală broă tềng đap jơnau sồr bơh mpồl bơtiàn làng bol dê bè bơta gùng pờ internet ờ hềt lơh ring bal. Broă lơh “Gùng pờ internet mờ măi tíñ ai oh in” lơyài, cồng nha lơh geh ờ jat bè bơta kơp kờñ. Jơh bal gùng pờ internet mờ măi tíñ. Tơngume bè mblàng yal jơnau tàm broă lơh jơnau kờñ dà lơgar là tơngume lơyài ờ hềt geh ai tơlik sră nggal pơlam lơh jat. Bơta do lơh gơbàn lơyài tàm broă lam lơh ngan ngồn”.

Hơ tềng đap Quôk hội, Ƀộ trưởng Ƀộ Thông tin mờ Truyền thông ồng Nguyễn Mạnh Hùng pà git, tŭ do 400 rbô măi tíñ gam ring bal bè broă lơh bơsram pờ tơlik tơn tàm internet tơnơ̆ kòp Kovid-19 bơh Ƀộ Giáo zụk mờ Đàot ạo dê. Tơnơ̆ broă lơh do geh tam gơl rê broă lơh “Gùng pờ internet mờ măi tíñ ai oh in”.