Tàm pơrjum dơ̆ 4, Quôk hội neh lời uă tŭ tơngai nàng cribơyai bè bơta geh ngan mờ cồng nha lam lơh broă rơndap lơh bơtàu tơnguh lơh sa- mpồl bơtiàn, kes priă dà lơgar. Đơs tơn jơh dơ̆ pơrjum, Củ tịc Quôk hội ồng Vương Đình Huệ chờ hờp, đơs niam ală cồng nha kuơmàng, geh pơn rơ, tơl làm neh lơh geh jơh bal bè bơtàu tơnguh lơh sa, mpồl bơtiàn; sền gàr dà lơgar, sền gàr lơngap lơngai; gàr niam rài kis mpồl bơtiàn; gròi sền cau geh màng mờ dà lơgar. Jat sền dơ̆ pơrjum bơh ală anih yal tơnggit jơnau, ồng K’Tân (kòn cau K’Ho) ơm tàm xã Dà Dờng, kơnhoàl Lâm Hà, càr Lâm Đồng đơs: “Pa do, làng bol tàm kơnhoàl Lâm Hà geh jat sền Quôk hội pơrjum dơ̆ 4, Quôk hội khoă 15. Uă ngan bơta kơp kờñ bơh làng bol dê geh Quôk hội cribơyai, sền gròi. Bơh hơ̆ geh dong làng bol jơi bơtiàn kòn cau dùl êt nă cau bơtàu tơnguh lơh sa, broă dong kờl priă nhai ai kwang bàng, công chức là cau jơi bơtiàn kòn cau dùl êt nă cau in niam ngan. Quôk hội pơrjum dơ̆ do cribơyai uă tơngume di mờ nùs nhơm làng bol, làng bol chờ hờp ngan mờ kơp kờñ lơh bè lơi nàng sền gròi, dong kờl cau jơi bơtiàn kòn cau dùl êt nă cau uă rlau tai tàm broă bơto bơtê, pờ ơdŭ bơto pơlam bè bơta chài tam kơphe, tiêu, điều, mắc ca, ròng sur, rơpu, kơnrồ…”.

Tơn jơh pơrjum lồi nam 2022, Quôk hội sồr Ủy ƀan Thường vụ Quôk hội, Cíñ phủ, Thủ tướng Cíñ phủ, Hội đồng Zân tộk, ală Ủy ƀan bơh Quôk hội dê, ală kâp, ală gah broă lơh mhar lam lơh jat ală Nghị quyết neh geh Quôk hội ring bal. Ală kwang bàng Quôk hội gờñ tìp mat cau tĕ khà nàng yal bè cồng nha dơ̆ pơrjum, gàr broă tàm yal jơnau nền nòn, iat, đơs wơl song dơpă ală jơnau đơs mờ bơta kơp kờñ bơh cau tĕ khà dê. Ală kâp, ală gah broă lơh lơh ngan lam lơh geh cồng nha ală broă lơh gàr niam rài kis mpồl bơtiàn, gròi sền rài kis phan bơna, nùs nhơm bơh làng bol dê; rơcang wil tơl ală bơta nàng drơng làng bol in wă rò nam pa 2023 mờ sa tềp bơhiàn yau Quý Mão.

Tàm dơ̆ tìp mat cau tĕ khà tơnơ̆ pơrjum dơ̆ 4, Quôk hội khoă 15, ồng Pang Ting Brăng (kòn cau K’Ho) ơm tàm Tổ zân phố 1, thị trấn Lạc Dương, kơnhoàl Lạc Dương, càr Lâm Đồng đơs là, ală dơ̆ pơrjum bơh Quôk hội dê cribơyai bè broă dong kờl, den tàng làng bol geh dờp wil tơl. Bơh ală dơ̆ tìp mat cau tĕ khà, làng bol neh đơs, geh ală kwang bàng Quôk hội cribơyai bal. Ală broă lơh hơ̆ gam mut tàm rài kis. Ồng Pang Ting Brăng pà git: “Tŭ do, dà lơgar sùm lòt bal mờ cau lơh broă sa, geh ală broă lơh dong kờl cau lơh broă sa. Mùl màl, tàm tiah do neh pờ uă ngan ală ơdŭ bơto pơlam bè khoa họk kỹ thuật, nàng làng bol lơh broă sa in git ngui ală bơta chài kỹ thuật pa tàm broă tam phan, ròng phan. Ală cau lơh broă sa tryăng tryồng tus bal ală ơdŭ bơto pơlam hơ̆ mờ ngui ală jơnau git wă tàm broă lơh sa den ngan là bol he geh mờng chài mờ cồng nha lơh geh kung gơguh rlau. Sơlơ ngai he sơlơ lơh niam rlau, bơta niam phan bơna sơlơ gơguh rlau den tac tàm drà kă bro kung ƀuơn rlau sơl”.

Tơnơ̆ pơrjum dơ̆ 4, Quôk hội khoă 15, lồi nhai 11 nam 2022 pa do, Ủy ƀan Thường vụ Quôk hội neh bơyai lơh pơrjum dơ̆ 17, pờ tê ring bal tam pà priă bơcri bơtàu tơnguh kes priă dà lơgar tơngai bơh nam 2021 tus nam 2025 ai 3 broă lơh jơnau kờñ dà lơgar in. Tàm hơ̆, broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm là mờr 2 rbô 500 tơmàn đông; broă lơh jơnau kờñ dà lơgar tơrmù rƀah kơ̆ kơljap là 2 rbô tơmàn đông; broă lơh jơnau kờñ dà lơgar bơt bơtàu ƀòn lơgar pa là 3 rbô tơmàn đông. Do là ală broă lơh geh gal ngan cau tĕ khà tàm tiah Tây Nguyên sền gròi. Ồng K’Khét Atô, Phó Kwang atbồ Ƀan Zân tộk càr Dăk Nông đơs nền: “Bè broă lơh jơnau kờñ dà lơgar dơ̆ 3 do là dùl broă lơh dờng ngan. Tŭ do tàm Dăk Nông gam lam lơh jat di gùng dà bơh Quôk hội mờ Cíñ phủ dê neh ai tơlik, bol hi kung lơh kràñ cê ngan. Do là dùl broă lơh geh làng bol kơp gơn ngan, tài do là broă lơh di mờ jơnau sồr Đảng dê, di nùs nhơm kơp kờñ làng bol dê. Tŭ do neh geh 10 rơndap broă geh Thủ tướng Cíñ phủ ring bal. Pơn yơu, Sở Văn hóa, Thể thao mờ Zu lịc geh dùl broă lơh lơh gơlik ai làng bol tàm ală ƀòn in bơtàu tơnguh nhơl chờ mpồl bơtiàn, prap gàr wơl bơta niam chài ƀòn lơgar he dê”.

Nàng lam lơh 3 broă lơh do, càr Dăk Nông kờp dŭ tam pà rlau 1 rbô tơmàn đông lam lơh jat ală tơngume: bơt bơtàu ƀòn lơgar pa, bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm mờ tơrmù rƀah kơ̆ kơljap.

Mờ ală broă lơh nền di ngan bơh Quôk hội, Cíñ phủ dê, ală càr Tây Nguyên kơp gơn nam 2023 mờ ală nam pơn jat tai rơp geh bơta bơtàu tơnguh pràn kơldang, nàng Tây Nguyên in brồ guh bal mờ gùt lơgar.