Tàm càr Bạc Liêu, Củ tịc Quôk hội Vương Đình Huệ neh lòt còp, pà phan ai rlau 360 hìu bơnhă geh sră dong kờl bơh dà lơgar, cau geh màng mờ dà lơgar, hìu bơnhă rƀah, cau gơtìp sơnơm khih điôxin lơh aniai, cau lơh phan, cau lơh broă geh rài kis kal ke tàm Hìu niam chài càr Bạc Liêu. Củ tịc Quôk hội Vương Đình Huệ đơs nền, đòm jat bơhiàn tàm kờñ gơboh bal niam bơnĕ bơh jơi bơtiàn dê sùm gròi sền ai làng bol in, kuơmàng pah tŭ lài mờ dơ̆ sa tềp tus, nam pa tus, Đảng, Dà lơgar, Ủy ƀan Mặt trận dà lơgar Việt Nam mờ ală mpồl bal sùm sền gròi, lơh ngan lời ai tơl priă jền, lam lơh uă broă lơh ngan ngồn gròi sền ai ală hìu bơnhă geh sră dong kờl bơh dà lơgar, cau geh màng mờ dà lơgar, hìu bơnhă rƀah, ală cau geh sră dong kờl bơh dà lơgar, cau lơh phan, cau lơh broă geh rài kis kal ke in nàng tơl nă cau, tơl hìu ndrờm geh chờ hờp nam pa, wă rò sa tềp.

Tàm tơngai tus, Củ tịc Quôk hội sồr ală kâp ủy đảng, gơnoar atbồ, Mặt trận dà lơgar mờ ală mpồl bal tàm jơh gùt càr pơlam lơh jat gơ in niam Jơnau sồr sồ 26 bơh Ƀan Ƀí thư dê bè broă lam lơh sa tềp Giáp Thìn 2024: “Rơcang lài ală bơta niam ngan rlau jơh drơng làng bol in chờ hờp nam pa, wă rò sa tềp niam bơnĕ, lơngăp lơngai, tềm pềr. Pơn jat tai sền gròi ai ală hìu bơnhă geh sră dong kờl bơh dà lơgar, cau geh màng mờ dà lơgar, hìu bơnhă rƀah, cau gơtìp sơnơm khih điôxin lơh aniai, cau lơh phan, cau lơh broă geh rài kis kal ke in.. Mờ kung sùm cribơyai, iat ală jơnau đơs bơh làng bol, cau lơh broă dê; kơlôi sơnơng, bơt bơtàu ală gùng dà broă lơh, broă dong kờl, lơh gơlik bơta niam nàng tơl hìu bơnhă, tơl nă cau bơtàu tơnguh lơh sa, brồ guh pơn đơl pràn lik klàs rƀah jŏ jòng sùm. Uă cau ờ gơtùi lik klàs rƀah den rơp tam gơl gơs broă dong kờl mpồl bơtiàn nàng dong kờl làng bol in. Đảng, dà lơgar mờ să tờm añ kơp kờñ là ală hìu bơnhă geh sră dong kờl bơh dà lơgar, hìu bơnhă rƀah, làng bol geh rài kis kal ke pơn jat tai lơh ngan, pơn đơl pràn brồ guh, jơh nùs lơh broă, lơh sa, rơhời bơt bơtàu rài kis hờm ram, gơboh gơbài. Ală oh mi cau lơh phan, cau lơh broă tam pà bal mờ ală kal ke bal dà lơgar dê, kâp hơ đơm mờ mpồl lơh sa kă bro dê; lơh jat jơh nùs ală gùng dà, broă lơh bơh Đảng, bơta dong kờl, adat boh lam bơh Dà lơgar dê; pơgồp bơnah bơsong bơta git gơp lơh broă ring niam kơ̆ kơljap, gơguh jak tàm mpồl lơh sa kă bro, bal mờ mpồl lơh sa kă bro bơtàu tơnguh wơl broă lơh sa”.

Di dơ̆ do, Ủy ƀan Mặt trận dà lơgar Việt Nam, Tổng Liên đoàn Lao động Việt Nam, Mpồl Cữ thập đỏ dà lơgar Việt Nam pà 600 bơnah phan ai ală hìu bơnhă geh sră dong kờl bơh dà lơgar, cau geh màng mờ dà lơgar, hìu bơnhă rƀah, cau gơtìp sơnơm khih điôxin lơh aniai, cau lơh phan, cau lơh broă geh rài kis kal ke tàm càr Bạc Liêu.

Kung tàm poh lài sơl, tàm Tiah lơh sa mờ măi mok Suối Dầu, kơnhoàl Cam Lâm, càr Khánh Hòa, Phó Củ tịc Quôk hội Nguyễn Khắc Định bal mờ mpồl kwang bàng neh lòt còp anih bơyai lơh “Sa tềp bơtòm tơrgùm mat – Nam pa tam pà bal” mờ pà phan ai cau lơh broă tàm càr Khánh Hoà in. Kung di dơ̆ do, neh boyai lơh Broă lơh drà sa tềp Kông đoàn 2024 tàm 5 anih tàm càr. Tàm 5 anih do, geh 10 anih tac phan 0 đông, mờr 200 anih tac tơrmù giă priă ală bơta phan pal geh ai đoàn viên, cau lơh broă in. Bơdìh hơ̆ tai, Liên đoàn Lao động càr Khánh Hoà gam pơgồp bal mờ ală mpồl lam lơh kham pràn kơldang să jan, pơlam adat boh lam bè ƀảo hiểm ai cau lơh phan, cau lơh broă in. Sa tềp Giáp Thìn 2024, Kông đoàn ală kâp tàm càr Khánh Hòa neh tă mờr 50 tơmàn đông nàng lùp còp, gròi sền sa tềp ai cau lơh broă in.

Tàm anih bơyai lơh broă lơh “Sa tềp bơtòm tơrgùm mat – Nam pa tam pà bal” mờ drà kông đoàn bơh Tiah lơh sa mờ măi mok Suối Dầu dê, Phó Củ tịc Quôk hội Nguyễn Khắc Định mờ kwang đơng lam bồ Tổng Liên đoàn Lao động Việt Nam, kwang đơng lam bồ càr Khánh Hòa jàu 400 bơnah phan pà ai cau lơh broă in. Tơm boh bơr mờ cau lơh broă tus bơh ală mpồl lơh sa kă bro tàm Tiah lơh sa mờ măi mok Suối Dầu, ală Kụm lơh sa mờ măi mok tàm càr Khánh Hòa, Phó Củ tịc Quôk hội Nguyễn Khắc Định pơyua jơnau nting bơr gờm chờ sa tềp, lùp còp cau lơh broă, mờ kung kơp kờñ ală hìu bơnhă pơn jat tai lơh ngan lơh broă, sơrlèt gan kal ke, geh dùl rài kis niam rlau. Phó Củ tịc Quôk hội Nguyễn Khắc Định đơs nền: “Kwang đơng lam bồ Đảng, dà lơgar, gơnoar atbồ càr Khánh Hòa sùm iat, git wă, sùm sền gròi tus rài kis bơh cau lơh broă dê. Mờ kơp kờñ ală oh mi sùm tam klac bal, jơh nùs lơh broă lơh sa, bơt bơtàu Tiah lơh sa mờ măi mok, bơt bơtàu càr Khánh Hòa mờ tă pơgồp tàm cồng nha bal bơh dà lơgar dê. Dan nting bơr tus tơl hìu bơnhă cau lơh phan, cau lơh broă tàm càr Khánh Hoà wă rò sa tềp dà lơgar Giáp Thìn ram mhŭ, bơ tòm tơrgùm bal, bềng lìu bơta kờñ gơboh mờ chờ hờp”.