Tus thôn Dà Mpao, sàh Phú Sơn Lâm Hà, càr Lâm Đồng, ƀuơn ngan tìp rùp hin cau ùr K’Ho tơryang tơryồng kềng gah bơr nơ̆. Neh geh tŭ broă tàñ ồi kòn cau ơm tềng đăp bơta pơhìn gơbàn roh tĕ, mơya kơnờm geh dong kờl phan bơna bơh Broă lơh jơnau kờñ dà lơgar tơrmù rƀah kơnhăp kơ̆, uă hìu bơnhă neh gàr niam broă lơh, lơh geh tai priă jền. Pal sền gròi là, broă lơh ờs mờng do gam geh tàm pơrdờn ai rơnàng kơnòm să in. Mò Long Dinh K’Thin pà gĭt, ală kòn ùr mò dê kung neh gĭt tàñ, gơ jal tàm tŭ tơngai ru lơh broă sa suơn sre bal mờ hìu bơnhă lơh geh ală pang ồi kòn cau nàng lơh geh tai priă jền.

“Bàr nă kòn ùr kung gĭt tàñ jơh lơm. Tŭ lơi ru den khai tàñ. Tŭ lơi lòt lơh broă tàm suơn den bol khai ờ gŏ tàñ. Ru ơm tàm hìu den khai dong tàñ. Tàñ phan do là kal ke ngan. Bàr pang do tàñ gơ gơs dùl pang là 2 tơlak 500 rơbô đông”.

Broă lơh tơrmù rƀah kơ̆ kơl jăp tàm tiah làng bol jơi bơtiàn dồ ết nă cau mờ tiah kơh bơnơm neh dong gĭt nđờ rơhiang hìu bơnhă jơi bơtiàn dồ ết nă cau tàm thôn Dà Mpao bơtàu tơnguh broă lơh sa hìu bơnhă dê. Mìng is mờ broă tàñ ồi kòn cau ờ mìng dong cau ùr in geh broă lơh, geh tai priă jền ală tŭ ru ơm tàm hìu lơm mờ gam pơgồp bơnah prap gàr broă tàñ ồi kòn cau ờs mờng. Bi Ha Mi, chuyên viên Cơdŭ lơh broă Niam chài- Mpồl bơtiàn sàh Phú Sơn Lâm Hà pà gĭt, kờñ ală broă lơh jơnau kờñ dà lơgar ngui geh cồng nha, kờñ dong kờl di jơnau kờñ mờ lơh geh ală bơta nàng làng bol in rcang bơtàu tơnguh broă lơh sa.

“Dong kờl bơcri priă tàm ală phan lơh. Geh ală ơdŭ bơto pơlam, cơdŭ bơto broă lơh, geh ală cau bơto pơlam tơn jơh ală bơta mờ làng bol kờñ”.

Bơh broă lơh sa hìu bơnhă tus bơt bơtàu phan bơna ƀòn lơgar, bơta pràn bơh ală broă lơh jơnau kờñ dà lơgar dê gam pơgồp bơnah lơh geh tai bơta tam gơl tàm ală tiah kal ke bơh càr Lâm Đồng dê. Tàm 5 nam do, tiah do gơmù mờr 50 rơbô hìu bơnhă rƀah jat tơl jơnau sồr ală bơta dê.

Tàm sàh Dam Rong 4, tiah kal ke uă ngan, ală broă lơh bơt bơtàu gùng lòt rê, hìu bơsram mờ phan bơna bơt bơtàu drơng broă lơh sa geh sền gĭt là ală ai lơh lài nàng bơcri priă lơh. Ồng Nguyễn Văn Quang, Phó Chủ tịch Anih duh broă Làng bol sàh Dam Rong 4, pà gĭt, nam do sàh geh ai rlau 22 tơmàn đong bơh ală broă lơh jơnau kờñ dà lơgar nàng hời rơ hời lơh geh ală jơnau kờñ kwơ màng bơh làng bol dê.

“Bol añ lơh ngan ngồn wơl jơh ală phan bơna bơt bơtàu nàng bơcri priă lơh phan bơna bơt bơtàu kwơ màng lài, pờ ơnàng gùng lòt rê, lơh niam wơl muh mat ƀòn lơgar. Ală jơnau kờñ gơ jal ngan bè bơt bơtàu phan bơna bơh làng bol dê tàm broă lơh sa, lòt rê den ndrờm lơh geh lơm”.

Nam 2026, càr Lâm Đồng geh ai mờr 900 tơmàn đong priă bơcri dà lơgar lơh ală broă lơh jơnau kờñ dà lơgar bè bơt bơtàu ƀòn lơgar pa, tơrmù rƀah kơ̆ kơl jăp mờ bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Tàm hơ̆, priă kes priă dà lơgar dê là rlau 474 tơmàn đong, priă kes priă ƀòn lơgar dê là rlau 419 tơmàn đong. Càr kung lơh mhar ai rlau 379 tơmàn đong priă tàm ntrờn bơh nam 2025 dê.

Sền gĭt do là kơnòl broă tờm, càr Lâm Đồng sồr ală sờh, gah, ală tiah lơh loh kơnòl, lơh mhar tŭ tơngai lơh jat, mơkung hòi jà tai priă jền mpồl bơtiàn dê. Ồng Hồ Văn Mười, Kwang bàng Đảng dà lơgar, Chủ tịch Anih duh broă Làng bol càr Lâm Đồng, đơs nền:

“Lâm Đồng bol añ sền gĭt do là dùl kơnòl broă kwơ màng ngan. Tŭ do bol añ gam tơrgùm kràñ cê jơh nùs ngan, tam pà tus tàm tơl sờh, gah, ală tiah mờ tam jàu ai ală Phó Chủ tịch kong kơnòl lơh jat tơl bơnah broă bơh he dê. Lâm Đồng hơ tàm nhai 12 rơ̆p ai jơh khà priă do, mơkung rơ̆p tơrgùm hòi jà mpồl bơtiàn lơh bal nàng bal mờ khà priă bơh Dà lơgar dê lam lơh jat niam rlau tai Broă lơh jơnau kờñ Dà lơgar”.

Jat pơlam gùng dà bơh Chính phủ dê, tơngai bơh nam 2026-2035, 4 broă lơh jơnau kờñ dà lơgar geh tơmŭt bal gơ gơs Broă lơh jơnau kờñ Dà lơgar bơtàu tơnguh niam chài- mpồl bơtiàn, ƀòn lơgar, jơi bơtiàn mờ tiah kơh bơnơm. Lâm Đồng gam kờp sền jơnau kờñ, kơnòl broă, rơndăp broă lơh mờ khà priă bơh ală broă lơh gam geh tŭ do dê nàng sền gĭt tơngume pơn jat tai lơh jat, tam gơl niam halà tơn jơh; mơkung pồ tơl mpồl kwang bàng lơh broă đơng lam, lơh ngan ngồn kơnòl broă di pal mờ ală bơta geh ngan mờ bơta pràn tàm pơn drờm priă jền.

Tàm dơ̆ lơh broă mờ càr Lâm Đồng bè bơta lơh jat Tơmŭt bal 2 bơh broă lơh dê, ồng Nguyễn Đình Khang – Bộ trưởng Bộ Jơi bơtiàn mờ Pin dờn jat Yàng đơs sùm jơnau sồr ai priă pơgồp bal geh cồng nha, pleh bơcri lơh lềng làng mờ sền gròi gàr niam, ngui broă lơh bơt bơtàu tơnơ̆ tŭ bơcri priă lơh.

“Sền gròi ai priă bơcri lơh mơya pal pơgồp bal mờ geh cồng nha. Ală tơngume lơi ờ gam geh cau lơh dờp lơh den khin cha tơn jơh mờ tam gơl tus ală kơnòl broă ndai jat di mờ ală jơnau pal jat mờ jơnau sồr. Kwơ màng là tŭ he lơh ală broă lơh do den he neh geh bơcri priă jền tàm ală broă lơh bơt bơtàu kờñ sền sơwì, kờp sền wơl tơnơ̆ dơ̆ bơcri priă lơh nàng ai priă jền kung bè là broă lơh dong kờl nàng lơh broă”.

Bơh broă tàñ ồi kòn cau tàm thôn Dà Mpao tus ală broă lơh bơt bơtàu phan bơna tus tiah sar lơgar ngài, ală broă lơh jơnau kờñ dà lơgar gam pơgồp bơnah tam gơl niam rài kis làng bol càr Lâm Đồng dê. Tơngai pa sồr càr ờ mìng lơh mhar ai priă jền lơm mờ gam pal ngui priă jền di mờ cau, pơgồp mờ bơcri priă lơh phan bơna bơt bơtàu mờ bơtàu tơnguh broă lơh sa, tơnguh priă lơh geh mờ prap gàr bơhiàn niam chài is dê. Do là bơta nàng ală broă lơh in lơh jat geh cồng nha jŏ jòng, lơh geh bơta gơn kơnờm bơtàu tơnguh kơnhăp kơ̆ ai tiah kal ke in.