Rơndap broă lơh sồ 8 neh lam lơh uă broă lơh bơceh lơh, di mờ bơta is ồn bơh tơl tiah dê, cèng wơl ală tam gơl niam ngan tàm tiah jơi bơtiàn dồ êt nă cau mờ tiah kơh bơnơm.

Mờ broă lơh mblàng yal jơnau, tơnguh jơnau git wă, ală Mpồl “Cau lam bồ bơh tam gơl pa dê” mờ “Mpồl mblàng yal jơnau tàm ƀòn lơgar” neh gơ gơs là bơta tờm ngan lơh gơ rề bồ tơngoh jak git wă. Bơh ală dơ̆ pơrjum, lơh lèu, mblàng yal mờ 2 dà đơs là dà yoan mờ dà kòn cau, ală jơnau đơs kờñ pơyua bè ring bal ùr klau, bơta aniai bơh bau gờñ, bau cau rềp jơi nòi mờ tam lơh tam pờng tàm hìu bơnhă dê neh gơmut tàm mpồl bơtiàn. Pơn rơ bè tàm ƀòn Chùa, càr Quảng Trị halà Huổi Ho, càr Điện Biên, bơta bau gờñ mờ bau cau rềp jơi nòi neh gơmù loh làng ngan, uă oh ùr geh lam sồr lòt bơsram wơl. Oh Hồ Thị Bảy ơm tàm bòn Chùa, sàh Hiếu Giang, càr Quảng Trị yal: “Dơ̆ mblàng yal ngai do neh dong oh tơnguh bơta wă wờng, kung bè git bơta chài sền gròi mờ sền gàr is să tờm he dê. Git bơta chài pleh ală broă lơh tìs tàm mpồl bơtiàn nàng he kis niam rlau. Bơh hơ̆ den oh kung git là sơnam pa tàu den broă kuơmàng ngan rlau jơh là bơsram sră, ờ di là tàm kờñ. Oh kung kơp kờñ là bơh dơ̆ mblàng yal ngai do, rơp dong kuơ ờ mìng oh in mờ gam ai ală bơyô in tai”.

Mờ broă lơh dong kờl broă lơh sa, jàu gơnoar lơh sa, Rơndap broă lơh neh dong crơng gơs ală mpồl lơh bal lơh sa, broă lơh càn priă tàm pơdar, bơto broă lơh mờ tàm tơrbŏ bal drà tac phan lơh gơs. Bơh broă ròng sur jù tàm ƀòn lơgar, ròng be, tam tờm chi sơnơm tus tàñ ồi kòn cau bơh yau halà lòt nhơl mpồl bơtiàn, cau ùr lơh geh tai priă jền kơ̆ kơljap jŏ jòng sùm. Bơta do ờ mìng dong tơrmù rƀah, tơnguh niam rài kis mờ gam tơnguh gơnoar broă, jơnau đơs bơh cau ùr dê tàm hìu bơnhă mờ ƀòn lơgar.

Broă lơh dong kờl cau ùr mờ kơnòm dềt geh rài kis kal ke: Broă lơh “Mè ròng” dong kờl priă bơsram, sră kham sơm kòp ờ sa priă halà lơh “Hìu ơm kờñ gơboh” neh gơ gơs là anih kơldìng kơ̆ kơljap ai ală cau geh rài kis kal ke in. Ală broă lơh do ai tơnggŏ bơta niam chài dong kờl kòn bơnus niam ngan, dong cau ùr mờ kơnòm dềt geh tai tŭ niam nàng sơrlèt gan kal ke, kis gơ rờm bal mờ bơtàu tơnguh.

Broă lơh tơnguh pràn jak ai kwang bàng lơh broă Mpồl mờ mpồl bơtiàn in: Ală ơdŭ bơto pơlam bè bơta chài mblàng yal jơnau, atbồ rơndap broă lơh, ngui măi mok yal tơnggit jơnau neh rơcang ai mpồl kwang bàng mờ ală cau lơh broă tờm ngan in geh tơl pràn jak nàng gàr sùm, bơtàu tơnguh mờ lam lơh uă ală broă lơh. Broă jơh ală mpồl tam klac cau ùr tàm ală sàh tiah nhàr lơgar càr Lào Cai geh crăp rơcang măi tíñ, măi lip là dùl bơta ai lơh pơn yơu pơn rơ ngan ai bơta tam gơl sồ tàm broă lơh Mpồl, tơnguh cồng nha lơh broă.

Nàng ală broă lơh bơh Rơndap broă lơh sồ 8 pơn jat tai lơh geh cồng nha mờ gơ rề làm uă, jat mò Nguyễn Thị Minh Hương, Phó Củ tịc Mpồl tam klac cau ùr Việt Nam, ală kâp mpồl pal sùm sền sơ wì, đal git bơta pràn, bơta ờ pràn bơh ală broă lơh. Bơh hơ̆ lơh niam broă rơndap lơh mờ sră nggal pơlam, lơh gơlik bơta ƀuơn ai broă lam lơh uă in. Bơdìh hơ̆ tai, pal bơto bơtê jrô bè bơta chài atbồ, mblàng yal jơnau, jat sền ai kwang bàng ală kâp in, ngan là kâp hơ đơm. Pal ngui niam gơnoar broă lơh tờm bơh mpồl bơtiàn dê, dong cau ùr mờ làng bol là cau crăp rơcang tus bal tàm tơl bơnah broă bơh rơndap broă lơh dê, bơh bơt bơtàu jơnau bơceh lơh tus lam lơh mờ gàr sùm broă lơh. Bơta tus bal jơh nùs bơh mpồl bơtiàn dê là bơta lơh nền tus bơta kơ̆ kơljap bơh ală broă lơh dê. Mò Nguyễn Thị Minh Hương pà git tai: “Bè sền sơ wì bal den bol hi kung sền gŏ là neh geh bơta sồr lơh ring bal bơh dà lơgar tus kâp hơ đơm, ală tiah den kung neh lơh jat broă lơh mờ geh bơta crăp rơcang ngac ngar nàng lam lơh broă gơ in mùl màl mờ dipal mờ ù tiah ƀòn lơgar he dê. Uă broă jàu lơh gơtùi mờ sơrlèt rlau broă rơndap lơh mờ geh ală tam gơl niam ngan bè bơta mờng kwèng kơlôi sơnơng broă lơh bơh làng bol dê, jơh bal cau ùr mờ cau klau, bơh jơh bal cau dờng mờ kơnòm dềt mờ bơh hơ̆ den kung neh pơgồp bơnah bơsong bàr pe broă mpồl bơtiàn jal mhar mờ lơh geh ring bal ùr klau tiah jơi bơtiàn dồ êt nă cau mờ tiah kơh bơnơm”.

Rơndap broă sồ 8 ờ mìng là dùl broă lơh jal mhar mờ là dùl broă rơndap lơh jŏ jòng nàng lơh geh ring bal ùr klau, tơnguh gơnoar broă cau ùr mờ pơgồp bơnah tàm bơta bơtàu tơnguh kơ̆ kơljap bơh tiah jơi bơtiàn dồ êt nă cau mờ tiah kơh bơnơm dê. Mờ broă tơnguh bơta niam mờ lam lơh uă ală broă lơh, ală bơta kuơ ring bal ùr klau rơp geh gơ rề tus làm gùt ală ƀòn, dong cau ùr ngui bơta pràn, bal mờ gơp bơt bơtàu dùl rơnàng tơnơ̆ do niam bơnĕ mờ bơtàu tơnguh ai dà lơgar in.