Củ tịc Quôk hội ồng Vương Đình Huệ đơs wơl, nam 2022, lơgar he neh lơh geh ală cồng nha kuơmàng ngan mờ tơl làm đau. Broă lơh sa dờng pơn jat tai gàr bè ờs bơta kơ̆ kơljap; roh giă priă geh sền gròi, khà giă ngui sa kờp bal gùt nam gơguh 3,15% tàm khà geh jàu bơh Quôk hội dê; gơguh GDP geh 8,02%, là khà jơnhua ngan rlau jơh tàm 10 nam do; ală bơta tàm pơnring dờng bơh rài lơh sa dê geh gàr niam. Quôk hội, Ủy ƀan Thường vụ Quôk hội, ală anih lơh broă bơh Quôk hội dê, Hội đồng Ñân zân ală kâp pơn jat tai geh uă tam gơl pa, tơnguh bơta niam, cồng nha lơh broă: “Broă Quôk hội sền sơ wì, lơh nền 5 mpồl broă dờng, kuơmàng mờ jal mhar tàm pơrjum nisơna dơ̆ 2 kung geh pơgồp bơnah tă bơsong di tŭ uă kal ke, kòl yan tàm bơta geh ngan, mờ kung lơh gơlik bơnàng jă kuơmàng nàng lam lơh kơnòl broă nam 2023 mờ ală nam pơn jat tai”.

Củ tịc Quôk hội ồng Vương Đình Huệ sồr, nam 2023, ală kâp, ală gah broă lơh, mpồl lơh broă, mpồl lơh sa kă bro mờ làng bol pal lơh jat ală nghị quyết, jơnau pơn dut bơh Ƀan Cấp hàñ Đảng dà lơgar dê, Nghị quyết sồ 68 nam 2022 bơh Quôk hội dê bè broă rơndap lơh bơtàu tơnguh lơh sa mpồl bơtiàn nam 2023, kuơmàng pal tam gơl pa bồ tơngoh kơlôi sơnơng, geh broă lơh tus bal pa, broă lơh pa, jơh nùs, rơcang lài, bơceh pa mờ kràñ cê tàm broă đơng lam, pơlam.

Củ tịc Quôk hội tơngkah, pal sơlơ lơh sir broă lơh bơtàu tơnguh, tơrgùm tă bơsong kal ke, dong kờl lơh sa kă bro di tŭ ai làng bol, mpồl lơh sa kă bro in, bơt bơtàu ală ù tiah bơtàu tơnguh mờ bơta pràn chul chồl gơguh lơh sa pa. Sền dờng màng bơtàu tơnguh niam chài dipal mờ lơh sa, cíñ trị, mpồl bơtiàn; mhar kơlôi sơnơng, bơt bơtàu broă lơh jơnau kờñ dà lơgar bè niam chài nàng bơt bơtàu mờ bơtàu tơnguh niam bè nùs nhơm đơng lam bơh Tổng Ƀí thư ồng Nguyễn Phú Trọng dê. Lam lơh niam ală broă lơh gàr niam rài kis mpồl bơtiàn, tơrmù rƀah kơ̆ jơljap, gàr niam tŭ tơngai hơ pơrgon, ring bal mpồl bơtiàn, sền gàr tiah ơm kis, gròi sền rài kis phan bơna, nùs nhơm làng bol dê, ngan là cau geh màng mờ dà lơgar, hìu bơnhă rƀah, ală cau geh rài kis uă kal ke tàm tiah sar lơgar ngài, tiah nhàr dà lơgar, bồt bơlàu, tiah jơi bơtiàn kòn cau dùl êt nă cau.

Bơdìh hơ̆ tai, pal sơlơ tơnguh bơta pràn, lơh kơ̆ kơljap, gàr kơ̆ sền gàr dà lơgar, sền gàr lơngăp lơngai; chồl pràn mờ tơnguh git gơp cribơyai mờ lơgar ndai, tơnguh cồng nha, bơta niam mut gơ rờm bal dunia; gàr niam tiah ơm kis ring lơngai, kơ̆ kơljap, lơh broă bal nàng bơtàu tơnguh mhar mờ kơ̆ kơljap. Hơ̆ là jơnau kờñ bơtàu tơnguh.

Nàng lam lơh jat ngan ngồn mờ geh cồng nha ală broă lơh nền tàm pơrjum nisơna dơ̆ 2, Quôk hội khoă XV, Củ tịc Quôk hội ồng Vương Đình Huệ sồr: “Cíñ phủ, Thủ tướng Cíñ phủ, Ủy ƀan Thường vụ Quôk hội, Hội đồng Zân tộk, ală anih lơh broă bơh Quôk hội dê, ală kâp, ală gah broă lơh, ală anih lơh broă tàm mpồl duh broă dà lơgar, ală kwang bàng Quôk hội lam lơh jat sơrbac mhar, di tŭ ală Adat boh lam, Nghị quyết pa geh ring bal, pơgồp bal broă lơh bồ tơngoh mờ broă lam lơh, kwang bàng nàng kờñ gàr di jat nùs nhơm “bơh đang tus hơ đơm dùl nùs bal”, “bơh đang bơh đơm ring niam” mờ Tổng Ƀí thư ồng Nguyễn Phú Trọng neh uă dơ̆ đơs nền. Kuơmàng, ală kwang bàng Quôk hội mờ ală broă lơh dipal, yal tơnggit sơrbac mhar, tơl làm tus cau tĕ khà gùt lơgar in git bè cồng nha dơ̆ pơrjum dê; iat, tơrgùm mờ yal ală jơnau đơs, bơta kơp kờñ bơh cau tĕ khà dê; jat sền geh cồng nha broă bơsong ală jơnau dan, lah yă, jơnau đơs bơh làng bol dê”.

Bal mờ hơ̆, kung rơcang lài pơgồp bơnah rơcang niam ală bơta drơng làng bol in chờ hờp sơnam pa, wă rò sa tềp bơhiàn yau Quý Mão chờ hờp, niam bơnĕ, ring niam, tềm pềr, lơh gơlik nùs nhơm pa bơh ƀòn lơgar mờ tơl hìu bơnhă, lơh ngan lam lơh jat geh cồng nha Nghị quyết pơrjum dờng dơ̆ 13 bơh Đảng dê; broă rơndap lơh bơtàu tơnguh lơh sa- mpồl bơtiàn nam 2023 bơh ală ngai sơn rờp, nhai sơn rờp nam pa dê.