Kwang gơnoar cih, Kwang atbồ Cơldŭ lơh broă Quôk hội ồng Bùi Văn Cường pà git, quý 1, ală anih lơh broă neh tă pơgồp jơnau đơs, drơng broă bơyai lơh geh cồng nha 2 dơ̆ pơrjum nisơna bơh Quôk hội dê, 8 dơ̆ pơrjum bơh Ủy ƀan Thường vụ Quôk hội dê, sền sơ wì, ring bal mờ ai jơnau đơs gơ wèt mờ 2 adat boh lam, 4 nghị quyết bơh Quôk hội dê, 66 nghị quyết bơh Ủy ƀan Thường vụ Quôk hội dê; bơyai lơh pơrjum kwang bàng Quôk hội lơh broă mìng dùl kơnòl broă ala mat nàng cribơyai, tă pơgồp jơnau đơs bè 8 rơndap lơh adat boh lam yal Quôk hội in sền sơ wì, ring bal tàm pơrjum dơ̆ 7, Quôk hội khoă XV…

Broă lơh tă pơgồp jơnau đơs, drơng broă lam lơh ală broă lơh lơh adat boh lam pơn jat tai geh lam lơh lai, geh sền gròi uă, bơta niam pơn jat tai geh tơnguh, lơh jat Jơnau pơn dut sồ 19 bơh Ƀộ Cíñ trị dê, broă lơh lơh adat boh lam, kơrnuat boh lam nam 2024, broă rơndap lơh sồ 81 bơh Ủy ƀan Thường vụ Quôk hội dê. Bơdìh hơ̆ tai, bơ tơl tai 19 kơnòl broă lơh adat boh lam pa tàm Broă rơndap lơh sồ 81 nàng kờñ di tŭ lam lơh jat ală Nghị quyết bơh Đảng dê mờ lơh jat jơnau sồr ngan ngồn.

Ală broă lơh lơh broă mờ lơgar ndai lơh jat gùng dà ai tơlik lài bơh Đảng, Dà lơgar dê, geh lam lơh dồ bă rơcang lài, jơh nùs mờ geh cồng nha tàm jơh ală gah, lơh broă 2 gah mờ uă gah. Broă lơh kwang bàng, broă lơh bơta kơp kờñ làng bol, broă lơh kơlôi sơnơng jak chài pơn jat tai geh lam lơh niam, ngai sơlơ geh bơta rơndap tap sèng niam.

Tàm quý 2 do, ală anih lơh broă bơh Quôk hội dê rơp lơh sir sră nggal yal Quôk hội in ring bal tàm pơrjum dơ̆ 7 gơ wèt mờ 9 rơndap lơh adat boh lam, 1 jơnau rơcang cih nghị quyết; lơh sir, gàr bơta niam ală jơnau yal sền sơ wì nàng yal Quôk hội in ai jơnau đơs bè 11 rơndap lơh adat boh lam neh geh tàm broă lơh lơh adat boh lam, kơrnuat boh lam.

Tơnơ̆ tŭ iat jơnau đơs tàm pơrjum, Củ tịc Quôk hội ồng Vương Đình Huệ jờng rơ tàm nhai 3 mờ quý 1, ală anih lơh broă bơh Quôk hội dê neh lơh khà broă uă ngan, jak chaì ngan; lơh jat broă rơndap lơh bơh Đảng đoàn Quôk hội dê, mờ kung lam lơh ngac ngar ală broă gơlik geh; broă lơh bơh ală anih lơh broă dê ngac ngar, di mờ bơta geh ngan, lơh jat jơnau sồr lơh bơh Ƀan Ƀí thư, di mờ jơnau cih bơh adat boh lam dê.

Broă lơh bơh Quôk hội dê lam lơh tơl làm tàm ală gah lơh adat boh lam, jat sền mờ lơh nền ală broă kuơmàng dà lơgar dê; broă lơh bơta kơp kờñ làng bol; lơh broă mờ lơgar ndai; broă lơh tă pơgồp jơnau đơs; jat sền, sồr lơh broă bơh Hội đồng Ñân zân dê; lam lơh niam ală dơ̆ pơrjum bơh Quôk hội dê, pơrjum bơh Ủy ƀan Thường vụ Quôk hội dê, ală anih lơh broă bơh Quôk hội dê, ală broă lơh tàm mpồl lơh broă cíñ trị.. Khà, bơta niam ală broă lơh jat jơnau sồr ngan ngồn, di mờ bơta kơp kờñ bơh cau tĕ khà mờ làng bol dê. Ala mat Ủy ƀan Thường vụ Quôk hội, Củ tịc Quôk hội ồng Vương Đình Huệ jờng rơ ală cồng nha mờ ală anih lơh broă bơh Quôk hội dê neh lơh geh, ală kwang bàng công chức neh sùm jơh nùs, pơgồp bơnah tàm cồng nha bal bơh Quôk hội dê.

Tàm tơngai tus, Củ tịc Quôk hội ồng Vương Đình Huệ sồr: “Bè broă lơh bơh nhai 4, quý 2 dê, broă tờm là rơcang lài drơng ai pơrjum Đảng dà lơgar dơ̆ 9, pơrjum Quôk hội dơ̆ 7 mờ lài hơ̆ là pơrjum dơ̆ 32, 33 bơh Ủy ƀan Thường vụ Quôk hội dê. Añ sồr tơnơ̆ dơ̆ pơrjum do, Kwang gơnoar cih, Kwang atbồ Cơldŭ lơh broă Quôk hội kơlôi sơnơng, cih dờp ală jơnau đơs tàm dơ̆ lơh broă nàng kờp sền jơh ală tơngume broă lơh bơh tŭ do tus jơh quý 2. Gơ wèt mờ ală sră nggal adat boh lam mờ sră nggal cèng bơta pơlam lơh jat jơnau cih adat boh lam dê, pal kờp sền tơmut tàm broă lơh bơh pơrjum Ủy ƀan Thường vụ Quôk hội dơ̆ 32, 33 jat 2, 3 jơnau pal jat. Lài ngan là jơh ală tơngume bơh tŭ do tus jơh quý 2, pal lơh lài ai pơrjum dơ̆ 7, Quôk hội khoă XV in. Dơ̆ 2 là jơh ală adat boh lam mờ jơnau rơcang cih nghị quyết, dilah ờ hềt geh tàm broă lơh Quôk hội lơh nền den pal sồr Ƀộ Tư pháp ala mat Cíñ phủ yal nàng Ủy ƀan Thuờng vụ Quôk hội sền sơ wì bơh Ủy ƀan adat boh lam tơmut tàm tơngume dơ̆ pơrjum dê”.

Củ tịc Quôk hội kung tơngkah, ală anih lơh broă bơh Quôk hội dê pal kờp sền broă rơndap lơh, jơnau pal jat bè sền gàr ndơp ndơr jơnau tơnggit, jơnau pal jat prap gàr sră nggal, jơnau pal jat bè sền gàr ndơp ndơr dà lơgar, sền gàr cíñ trị tàm dơlam is, bơta pal jat bè jơnau đơs. Ală mpồl kờp sền mờ sồr kwang bàng, công chức lơh jat nền nòn jơnau sồr bè lam lơh ngan ngồn gơnoar broă công chức mờ kơnòl broă dà lơgar. Ală anih lơh broă bơh Quôk hội dê pal tơnguh nùs nhơm geh kơnòl rlau tai, rơcang lài  rlau tai tàm tơl bơta, mờ kung sơlơ tơnguh tai tàm pơgồp bal bơh jơh tàm dơlam, bơh bơdìh tàm broă lam lơh gơnăp gơnoar, kơnòl broă geh jàu.