Wèt tus Pơrjum dờng XIV ờ mìng là bơta kơ̆p gơn ờ gŏ rơcăng mờ neh mờ gam geh lơh loh làng bơh ală srơh, broă lơh geh kwơ ngan ngồn gơ jăt bal mờ rài kis làng bol dê. Tàm uă ƀòn lơgar càr Dăk Lăk dê, srơh bơ̆t bơtàu bơta mờng kwèng kis niam chài, lơh bơka tiah drà, sền gàr tiah ơm kis, bơ̆t bơtàu mpồl tam klăc dờng jơh gùt jơi bơtiàn geh lơh pràn bơh ală “broă bơ̆t bơtàu nùs nhơm làng bol” chờ gờm Pơrjum dờng. Tàm Jơnum làng bol tiah drà 6A, sơnah ƀòn Thành Nhất, nùs nhơm chờ gờm Pơrjum dờng XIV geh tơnggŏ loh bơh ală srơh bơh ci ƀộ mờ jơnum làng bol tiah drà lam lơh. Ồng Nguyễn Ngọc Thu, Ƀí thư Ci ƀộ, Lam bồ Jơnum làng bol tiah drà 6A, pà gĭt: “Wèt tus Pơrjum dờng Đảng dơ̆ XIV, Jơnum làng bol tiah drà 6A neh lam lơh srơh bơ̆t bơtàu rài kis niam chài tiah làng bol ơm kis. Lơh gùng bồng bi mờ hòi jà làng bol lơh gùng thôn gùng ƀòn àng, tơlir, goh, niam nàng chờ gờm Pơrjum dờng. Lànhg bol kơ̆p gơn ngan mờ dòn kơnờm jơh lơm tàm Pơrjum dờng do mờ chờ hờp ngan. Kơ̆p kờñ là Pơrjum dờng rơ̆p geh cồng nha rlau tai, cèng wơl bơta kwơ ai làng bol in”.

Tàm ală ƀòn làng bol jơi bơtiàn dồ êt nă cau, is ồn là kơnhoàl ù tiah nhàr lơgar, nùs nhơm wèt tus Pơrjum dờng geh pờ àng pràn kơldang, ngan là tàm mpồl đoàn viên ơruh pơnu cèng bơta kơ̆p kờñ ngan brồ guh, ròng să, jòi broă lơh. Tàm ƀòn Drang Phốk, sàh Buôn Đôn, rơnàng kơnòm să neh săc rwah broă chờ gờm Pơrjum dờng bơh ală broă lơh loh làng, gơ jăt bal mờ bơ̆t bơtàu ƀòn jak chài, bơtàu tơngguh kơnhăp jŏ. Bi H’Ly A Knul, Ƀí thư Ci đoàn ƀòn Drang Phốk, sàh Buôn Đôn, càr Dăk Lăk, yal: “Mpồl đoàn viên ơruh pơnu ƀòn Drang Phốk neh lơh loh làng broă lơh pơs wàs ƀòn, mblàng yal làng bol in nàng chờ gờm Pơrjum dờng cau ala măt gùt lơgar dơ̆ XIV Đảng dê. Bol hi kơ̆p gơn pơrjum dờng tus rơ̆p geh uă gùng dà broă lơh dong kờl ai rơnàng kơnòm să tiah nhàr lơgar in geh tŭ niam sơnđờm mŭt lơh broă mờ bơtàu tơngguh lơh sa ai hìu bơnhă mờ ƀòn in”.

Bơh ală broă lơh duh hồl mờ geh kwơ ngan ngồn pà gŏ, Pơrjum dờng XIV là anih kơldìng bơta pin dờn, là tiah ơn pơyua bơta kơ̆p gơn bè ală gùng dà broă lơh geh kwơ ngan ngồn, rềp mờ bơta geh ngan tàm rài kis, is ồn gơ wèt mờ tiah làng bol jơi bơtiàn dồ êt nă cau, tiah sar tiah ngài, tiah nhàr lơgar.

Bal mờ làng bol, mpồl kwang bàng kâp hơđơm, ală cau să tờm tơn lam lơh jơnau sồr, gùng dà bơh Đảng dê mŭt tàm rài kis, kung gam jăt sền Pơrjum dờng mờ uă bơta kơ̆p gơn. Tàm sơnah ƀòn Ea Kao, bơta kơ̆p gơn hơ̆ gơ jăt bal mờ jơnau sồr tam gơl pa bồ tơngoh đơng lam, lơh sir kơrnoăt boh lam, gùng dà broă lơh, lơh gơlik bơta gơn kơnờm ai kwang bàng khin kơlôi, khin lơh, khin kong kơnòl tài bơta bơtàu tơngguh ƀòn lơgar dê. Ồng Đặng Gia Duẩn, Ƀí thư Đảng ủy sơnah ƀòn Ea Kao, càr Dăk Lăk, đơs:

" Pơrjum dờng rơ̆p cribơyai ală broă kwơmàng dà lơgar dê, tàm hơ̆ bol hi kơ̆p kờñ ngan là rơ̆p geh ală sền gròi uă rlau tus kwang bàng kâp sàh, sơnah ƀòn. Bulah là kwang bàng kâp sàh lài do halà kâp càr, kâp kơnhoàl rê den añ kơlôi là tàm tơl kwang bàng kung bè ờs bơta kơ̆p kờñ ngan nàng ai ƀòn lơgar he dê in bơtàu tơngguh. Bè hơ̆ den tàng broă pờ àng ồs kơ̆p kờñ hơ̆ bè lơi den kờñ pal geh bơta dong kờl, pal geh ală gùng dà broă lơh nàng ai kwang bàng bơceh lơh in, gơ jăt bal mờ pà kâp, jàu gơnoar nàng gơtùi dùl bă rơcăng lài dan ală gùng dà broă lơh, gùng dà broă lơh geh gơrềng nàng ƀòn lơgar he dê in bơtàu tơngguh”.

Bơh tiah drà tus ƀòn lơgar, bơh tiah ring tus tiah nhàr lơgar, ală kơ̆p gơn hơ̆ gam tìp bal gơgơs dùl hiòng dà gơlòt bal: bơta pin dờn tàm Đảng, tàm gùng lòt bơtàu tơngguh dà lơgar tàm tơngai tus. Mờ Dăk Lăk, ƀòn lơgar geh uă jơi bơtiàn ơm kis bal, bềng jơnau tơl pràn mơya kung uă bơta lòng, Pơrjum dờng XIV geh làng bol ơn pơyua bơta kơ̆p gơn rơ̆p pờ gơlik ală pơlam gùng jŏ jòng, lơh gơlik bơta gơn kơnờm pa nàng Dăk Lăk đơs is, mờ ală ƀòn lơgar tàm jơh gùt lơgar đơs bal bơtàu tơngguh mhar mờ kơnhăp jŏ tàm tŭ tơngai pa.