Rlau 70 sơnam, ồng Ayun Y Hmoan kung gam jơh nùs ngan tus bal broă lơh Mặt trận tàm ƀòn Tri Gia, sàh Ea Drăng, càr Dăk Lăk. Pah ngai, ồng kung gam sùm lòt tus ală hìu bơnhă nàng git bơta geh ngan rài kis tàm ƀòn, bơh jơnau kàl lơh sa tus broă lơh sa bơh ơruh pơnu dê.

Jat sền Pơrjum dờng cau ala mat Mặt trận dà lơgar Việt Nam dơ̆ XI bơh ală anih yal tơnggit jơnau, ồng Y Hmoan kơp kờñ, Mặt trận ală kâp tơngai lơh broă pa rơp tơrgùm tàm tam gơl pa broă lơh, tơnguh niam broă lơh jat sền, tă pơgồp jơnau đơs mpồl bơtiàn. Gơ wèt mờ ù tiah kơh bơnơm, tiah ngài, tiah jơi bơtiàn dồ êt nă cau, kờñ pal geh tai ală jơnau đơs bơh Mặt trận nàng ală broă lơh, gùng dà broă lơh lam lơh geh cồng nha, ngan ngồn rlau. Jat ồng Y Hmoan, broă pal sền gròi tŭ do là dong kờl broă lơh sa, ai geh broă lơh ơruh pơnu ƀòn lơgar in: “Añ chờ hờp ngan tài làng bol ndrờm lơh jat niam ală jơnau lơh nền, gùng dà broă lơh bơh Đảng mờ Dà lơgar dê, kơnờm bơh hơ̆ mờ ƀòn lơgar sùm ring lơngai. Làng bol tŭ do kơp kờñ ngan rlau jơh là ƀòn lơgar kơ̆ kơljap, geh broă lơh sa, kòn sau geh broă lơh, lơh sa bơtàu tơnguh”.

Là tiah geh broă lơh sa uă ngan kơnờm tàm lơh sa suơn sre, làng bol càr Dăk Lăk kung kơp kờñ Mặt trận dà lơgar ală kâp mờ gơnoar broă ala mat ai jơnau đơs bơh cau tĕ khà, làng bol dê in rơp geh ală jơnau đơs, jơnau dan dipal tus Quôk hội, Cíñ phủ nàng lam lơh ngan ngồn ală gùng dà broă lơh bè lơh sa suơn sre, cau lơh broă sa mờ ƀòn lơgar.

Mờ ù tiah bè càr Dăk Lăk, broă lơh sa suơn sre kung gam pal kong mờ uă bơta aniai tài tam gơl bơh drà kă bro mờ trồ tiah tam gơl nisơna, mơya bơta anih blơi phan lơh gơs phan lơh gơs bơh suơn sre in, bơta sền gàr rềs àr broă lơh sa suơn sre kung gam ờ hềt geh sền gròi dipal. Mò H’Wơn Kmăn, atbồ ƀòn Knach, sàh Dăk Liêng, càr Dăk Lăk geh jơnau dan: “Tàm do rài kis làng bol dê kung gam uă ngan kal ke, bol hi kung kơp kờñ ngan Mặt trận iat ală jơnau đơs bơh làng bol dê nàng yal wơl kâp hơđang in, geh ală gùng dà broă lơh dipal gơ wèt mờ cau dờp bơta dong kờl bơh mpồl bơtiàn, cau ờ sô, dong kờl tơn jơh hìu ing, pà sơntìl chi tam phan ròng nàng lơh sa, dong bơtàu tơnguh lơh sa, gàr kơ̆ rài kis”.

Bal mờ ală broă bè lơh sa, rài kis, jat sền Pơrjum dờng cau ala mat Mặt trận Dà lơgar dơ̆ XI, ală rơnàng làng bol càr Dăk Lăk kung kơp kờñ, ală bơta kơp kờñ, bơta kơp gơn bơh ƀòn lơgar geh iat wil tơl, yal song dơpă mờ tam gơl gơ gơs gùng dà broă lơh ngan ngồn.

Jat ồng Lương Triều Dương, sơnah ƀòn Tuy Hòa, càr Dăk Lăk, bơta kuơmàng ngan rlau jơh kung gam là mpồl kwang bàng lơh broă mặt trận, kwang bàng ƀòn lơgar ngan ngồn rềp làng bol, wă làng bol mờ git iat jơnau đơs bơh làng bol: “Añ mìng kơp kờñ dùl bơta là khi đơs gơtùi den pal lơh gơtùi, pal rềp làng bol, wă làng bol, iat jơnau đơs làng bol dê, kờñ pal lơh ngan kơryan tìs sa kuề sa kuà, bơta bơ thĭ tŭ lơh broă”.

Tàm tŭ tơngai bơta tam gơl sồ geh lơh pràn ngan, tàm uă tiah ngài bơh càr Dăk Lăk dê, ală mpồl Zalo mpồl bơtiàn gam gơ gơs là rbàng tơrbŏ mờng kwèng ngan đah làng bol mờ gơnoar atbồ mờ Mặt trận ƀòn lơgar. Bơdìh mờ ală dơ̆ tìp mat tơn, uă jơnau đơs bơh làng bol dê tŭ do geh dờp bơh điện thoại, mpồl mpồl bơtiàn halà ală jơnum măi mok sồ. Bơh jơnau gùng lòt gơbàn ờ diơng, ờ tơl dà ngui sa tus rơndap tap sèng lơh sră pơ àr gơnoar atbồ, uă jơnau đơs, jơnau dan neh geh pơyua mhar rlau tus gơnoar atbồ ƀòn lơgar.

Jat ồng Phạm Văn Bảy - Phó Củ tịc Anih duh broă Mặt trận Dà lơgar Việt Nam càr Dăk Lăk sồr tam gơl pa broă lơh bơtòm tơrgùm, hòi jà làng bol gam ai tơlik loh rlau gơ wèt mờ ală mpồl Mặt trận ală kâp, ngan là tàm tiah ngài, tiah làng bol jơi bơtiàn dồ êt nă cau. Tàm hơ̆, broă rơcang lài iat jơnau đơs bơh ƀòn lơgar mờ ngui măi mok sồ là jơnau sồr pal geh nàng tơnguh cồng nha lơh broă: “Nàng lơh gơtùi bè hơ̆ den bol he pal ngui măi mok yal tơnggit jơnau, ngui măi mok sồ nàng tàm ală jơnau yal tơrgùm wơl, lam lơh ală broă lơh dồ bă mhar, di tŭ; iat ală jơnau đơs làng bol dê, mờ kung gơtùi yal wơl ală broă lơh tờm tus làng bol in nàng làng bol geh dờp kuơ bơh ală broă lơh dồ bă geh cồng nha rlau”.

Tam gơl pa tơngume, broă lơh jat gùng dà rềp làng bol; wèt uă hờ ƀòn lơgar mờ lơh pràn tam gơl sồ gam là jơnau sồr ai tơlik gơ wèt mờ Mặt trận Dà lơgar tàm tŭ tơngai pa. Bơh cồng nha Pơrjum dờng cau ala mat Mặt trận dà lơgar Việt Nam dơ̆ XI dê, làng bol càr Dăk Lăk kơp kơnờm jơnau đơs bơh ƀòn lơgar rơp pơn jat tai geh iat wil tơl rlau, ală kal ke tàm rài kis geh yal di tŭ rlau mờ ală gùng dà broă lơh ngai sơlơ di mờ bơta geh ngan rlau.