Ală ngai do, mìu dờng jŏ jòng lơh uă sàh kơnhoàl ù tiah đah măt tơngai Lik (gơ wèt ƀòn lơgar càr Phú Yên yau) gơtìp koh gơl lơh ờ dồ êt hìu làng bol ờ geh phan sa, phan ngui sa kờñ pal geh tàm tŭ broă tus dong kờl phan bơna tìp uă bơta gơ kơryan kal ke tài dà dờng tih dơng mhar. Wèt tus tiah dà tih dà lìu, uă mpồl cau, mpồl geh nùs nhơm niam gam sơrbăc mhar dờp, săc rwah, ơn klơm phan ngui sa kờñ pal geh pơyua tus ală kơnhoàl ù tiah gơtìp wềl.

Anih duh broă Mặt trận Dà lơgar Việt Nam càr Dăk Lăk neh jun sră pơyua hòi jà dong kờl làng bol bơsong jơnau gơlời wơl tài bơh trồ tiah lơh aniai, đơs sùm tơl bơta tă pơgồp bulah dềt ndrờm geh bơta kwơ dờng tàm broă dong làng bol sơrlèt bơta roh rui, gờñ kơ̆ kơl jăp wơl rài kis.

Nàng gàr niam ờ gŏ di lời cau lơi gơtìp jơgloh halà gơtìp ngòt rơngơ̆t, gơnoar atbồ ală tiah càr Gia Lai neh sơnđờm ai jơh ală mpồl cau drơng mờ  dong kờl. Ồng Nguyễn Tuấn Thanh, Phó Củ tịc Duh broă sùm Anih duh broă Làng bol càr Gia Lai pà gĭt, càr gam tơrgùm uă ngan rlau jơh tàm broă lơh dong kờl mờ gàr niam lơngăp lơngai ai làng bol in.

Tàm ală tiah ntrờn, mpồl lơh broă geh gơnoar càr Gia Lai kung gàr niam broă lơh ơm lơh broă ngai mang, gàr niam lơngăp lơngai, lơh sơnơm, dong kờl nùs nhơm mờ is ồn là broă sa sào ai gĭt nđờ rơhiang nă làng bol gam pal lik bơh hìu đam. Ală ƀung mi, thùng dà, ồi ram, đèng pil... geh jun sùm tus tơl tiah in. Ờ mìng làng bol tàm càr lơm, uă mpồl geh nùs nhơm niam bơh ală càr rềp bal kung neh tus mờ càr Gia Lai sơl, cèng bal sơnơm tơm ba, ào mìu, phan sa mhar nàng dong kờl làng bol.