Tàm dùl rài đơng lam broă pa, iat làng bol ờ mìng là jơnau sồr cèng bơta geh kơnòl, mờ gam là bơta pal geh lài ngan nàng ai tơlik gùng dà broă lơh di mờ lam lơh jat geh cồng nha. Tài tơl jơnau đơs, jơnau dan cau tĕ khà dê ờ mìng yal bè dùl broă mùl màl, mờ gam cèng ală tềl tơnggŏ bè kal ke lơh sa - mpồl bơtiàn, ală bơta ờ niam tàm tŭ lam lơh ngan ngồn gùng dà, broă lơh, geh tŭ là ală jơnau pơhìn digơlan gơlik geh dilah ờ geh đal git mờ bơsong di tŭ. 

Tàm tŭ tơngai lơgar he gam lơh pràn bơt bơtàu Dà lơgar gơnoar adat boh lam chủ nghĩa xã hội mờ tam gơl sồ dà lơgar, gơnoar broă bơh làng bol kơp kờñ dê ờ gơtùi mìng ơm wơl tàm broă dờp sră yal, pơyua wơl jơnau đơs, jơnau dan halà tơrgùm wơl jơnau yal làng bol, cau tĕ khà dê. Cau lam bồ Quốc hội uă dơ̆ đơs sùm jơnau sồr pal tam gơl pràn gơ gơs bồ tơngoh kơlôi sơnơng rơcang lài git broă gơlik geh, git bơta geh ngan, đal git gờñ broă bơh mùl màl mờ tă pơgồp broă lơh lài mờ tŭ ală bơta ờ niam gơ tơrgùm gơ gơs broă dờng mpồl bơtiàn dê. 

Nàng lơh jat jơnau sồr do, ồng Trần Thanh Mẫn, Chủ tịch Quốc hội sồr: broă lơh làng bol kơp kờñ kờñ pal geh tam gơl pa tơl làm jơh bal bè bồ tơngoh kơlôi sơnơng mờ broă lơh, git gờñ bơta kơp kờñ, nùs nhơm làng bol dê; mờ kung là mpồl tơngkah lài gùng dà broă lơh mờ là bơta đo was bơta niam đơng lam broă dà lơgar: “Broă lơh làng bol kơp kờñ pal lơh jrô rlau tai, ờ mìng ơm wơl tàm broă wă làng bol, bơsong sră yal, pơyua wơl jơnau đơs, jơnau dan. Mờ añ sồr broă lơh bơta kơp kờñ làng bol pal là gah git gờñ nùs nhơm làng bol, là mpồl tơngkah lài gùng dà broă lơh, là bơta đo was bơta niam đơng lam broă dà lơgar. Añ sồr, ờ gŏ di lời làng bol kơp kờñ lòt tơnơ̆ bơta ờ suk làng bol dê. He pal iat, pal kơno, git bơta geh ngan mờ đơs lài. Dơ̆ 2 là hơ jơnau đơs, jơnau dan cau tĕ khà dê pal ngan ngồn rlau. Khà hơ jơnau lùp uă là pal cih dờp ngan, mơya bơta đo was dut ndơl ờ di là geh sră nggal hơ wơl, mờ là broă hơ̆ gơtùi tă bơsong halà ờ, làng bol gŏ di gùng di dà halà ờ”.

Mùl màl tàm tơngai lài ai gŏ, uă jơnau lơh nền, gùng dà broă lơh dờng tŭ lơh jat ngan ngồn tàm rài kis neh gơlik geh ală bơta gơ rềng bơdìh mờ jơnau kờp dŭ lài. Neh geh uă bơta ờ niam mìng geh đal git tŭ neh geh jơnau yal yă, yal khài halà gơ gơs broă dờng geh sền gròi uă tàm mpồl bơtiàn. Tàm tŭ hơ̆, dilah ală jơnau yal bơh kâp hơ đơm geh dờp di tŭ, mblàng wil tơl, den gơtùi tam gơl bơh gờñ, uă broă gơtùi pleh gơ tơrgùm gơs broă dờng, tơrmù ƀà bơta ờ niam gơ lời wơl tus mpồl bơtiàn mờ pơhì pơhà priă jền.

Kờñ kờp dŭ lài di, pal iat wil tơl. Kờñ gùng dà broă lơh lơh jat tàm rài kis, pal tìp mat tơm boh bơr mờ làng bol bơh tŭ bơt bơtàu mờ lam lơh jat.

Do kung là broă kuơmàng nàng gàr bơta bơnĕ bơnài bơta kuơ đah dà lơgar, làng bol mờ mpồl lơh sa kă bro, mờ kung gàr kơ̆ bơta ring bal tàm mpồl bơtiàn.

Dilah lài do, cồng nha broă lơhlàng bol kơp kờñ sùm geh sền swì mờ khà sră yal dờp, khà sră nggal hơ halà khà broă geh bơsong den tŭ do bơta đo was neh geh tơnguh tus dùl bơta pa, dờng rlau: hơ̆ là khà bơsong ngan ngồn broă gơlik geh mờ bơta niam nùs làng bol dê. Gùng dà do kung neh geh ồng Hoàng Anh Công - Phó Kong kơnòl Anih duh broă làng bol kơp kờñ mờ jat sền Quốc hội dê đơs sùm: “Bơta kuơmàng ngan rlau jơh bơh lơh broă làng bol kơp kờñ dê là bơta niam nùs làng bol dê. Lơh bè lơi den lơh, bol he pal cèng wơl bơta kuơ làng bol in, cèng wơl bơta kuơ dà lơgar in. Mờ tŭ làng bol niam nùs den bơh bơta niam nùs làng bol dê là bơta kuơmàng ngan rlau jơh mờ bol hi kờñ lơh geh”.

Tŭ jơnau đơs làng bol dê geh iat kơno mờ jơnau đơs, jơnau dan dipal geh bơsong di tŭ, bơta pin dờn làng bol dê gơ wèt mờ Đảng, dà lơgar mờ ală anih lơh broă làng bol pồ rơp geh gàr kơ̆. Jơnau sồr bơh Chủ tịch Quốc hội dê ai gŏ: tam gơl pa lơh broă làng bol kơp kờñ là tam gơl pa broă lơh đơng lam broă dà lơgar jat gùng dà ai làng bol, mpồl lơh sa kă bro lơh tờm.