Lài ngan, đơs bè bơcri priă jền ai bơtàu tơnguh bơto bơsram tàm tiah kal ke in, cau ala mat ồng Nguyễn Đại Thắng, mpồl càr Hưng Yên geh jơnau sồr:“Añ sồr bơtơl dùl sèng pa tàm Bơta 19 “Dà lơgar ai lài priă jền bơcri mờ geh broă lơh dong kờl ai ală hìu bơsram tàm tiah geh broă lơh sa kal ke, tiah sar lơgar ngài, tiah nhàr lơgar, bồt dà lềng mờ tiah jơi bơtiàn dồ êt nă cau in tàm tŭ tơngai lam lơh tam gơl sồ; gàr bơta ndrờm bal mờ ring bal tàm broă geh ngui anih yal jơnau tơnggit bè bơto bơtê mờ bơsram”. Bè hơ̆ den rơp gơtùi lơh geh cồng nha tàm broă lam lơh broă lơh kung bè bơta ring bal tàm broă ngui măi mok tàm ală hìu bơsram”.

Bè Adat tam gơl, bơtơl bàr pe bơta bơh Adat Bơto bơsram dê, tơngume pal sền gròi ngan là jơnau cih tam gơl, bơ tơl jat gùng dà Dà lơgar lơh gơlik dùl ƀộ sră măi ngui ring bal tàm gùt lơgar. Cau ala mat mò Nguyễn Thị Mai Thoa, mpồl càr Hưng Yên geh jơnau đơs:“Mpồl rơcang cih sră măi kờñ pal sac rơ wah bơnah ai tơnggŏ niam ngan rlau jơh tàm ală ƀộ nàng rơndap tap sèng gơ gơs sră măi pa geh bơta tam gơl, rơndap sap sèng tơrbŏ bal dipal den ƀộ sră măi pa rơp gơtùi ngui niam bơta pràn, bơsong ală bơta ờ niam bơh tơl ƀộ sră măi lài do dê, lơh niam ngan rlau jơh broă ngui sră măi nàng lam lơh tơngume bơto bơsram”.

Tàm tŭ hơ̆, bàr pe nă cau ala mat kơlôi rơcang bè jơnau sồr sơn đờm bơh nam 2026 geh dùl ƀộ sră măi ngui bal ai jơh gùt lơgar in là jal mhar ir. Tềng đap jơnau đơs bơh cau ala mat dê, Ƀộ trưởng Ƀộ Bơto bơtê mờ Bơsram, ồng Nguyễn Kim Sơn pà git:“Broă do Ƀộ neh bơt bơtàu ală jơnau lơh nền. Tàm ală jơnau lơh nền neh geh ală broă rơndap lơh mờ rơp dan jơnau đơs bơh Tổng Ƀí thư dê, yal Thủ tướng in sền swì kĭ ring bal. Ƀộ lơh ngan mhar ngan rlau jơh là tàm nhai 11 rơp geh broă rơndap lơh ngan ngồn mờ rơp geh jơnau yal. Añ dan đơs nền là rơp lơh thàn”.

Bơta tờm kuơmàng tàm jơnau rơcang cih adat bơto bơsram tam gơl là broă tơng gơs ală hìu bơsram làng bol pờ, tơrbŏ bal, bơ tơl broă lơh trung họk broă lơh, ai gơnoar kơnòm bơsram lơh gơs tơngume bơsram kâp pe, mờ gam geh bơto bơtê bơta chài lơh broă, lơh ƀuơn sră pơ àr gơnoar atbồ bơh broă sang tĕ lơh ƀàng jơh bơsram kâp 2 mờ jàu gơnoar lơh ƀằng jơh bơsram kâp pe bơh Kwang lam bồ Sờh Bơto bơtê mờ Bơsram ai Lam bồ hìu bơsram in.

Cau ala mat mò Nguyễn Thị Việt Nga, mpồl ƀòn dờng Hải Phòng đơs bơta geh ngan tàm tơngume bơto bơsram pe kâp tŭ do kơn jơ̆ ir, lơh gơbàn bơta pal bơto bơtơl, bơsram bơtơl tài pơgru ờ gơtùi bơto jơh tơngume jơnau git wă mờ tŭ jơ tàm ơdŭ. Tàm tŭ hơ̆, kơnòm bơsram den ờ geh tơl ală jơnau git wă mờ bơta chài tàm rài kis mpồl bơtiàn:“Bơdìh mờ sră măi den rơndap tap sèng tơngume bơto bơsram kung là bơta kuơmàng ngan. Geh pơgru bơto môn toán đơs là, kơnòm bơsram gơtùi lơh jơnau phương trìñ, ƀất phương trìñ, mơya lòt tàm drà nàng ală oh in kờp tŭ blơi biap, blơi ka den gơ lơh kwi kuơ. Jơnau git wă bè rài kis, bơta chài tàm rài kis ală oh dê ờ huan geh. Den tàng tŭ rơndap tap sèng wơl tơngume bơto bơsram, lơh dùl ƀộ sră mai den pal sền gròi tus bơta do”.

Cribơyai tàm jơnum, ală cau ala mat Quôk hội kung ring bal mờ jơnau sồr sang tĕ lơh ƀằng jơh bơsram kâp 2, mìng cih dờp geh ngan sră yal jơh bơsram kâp 2 bơh Lam bồ hìu bơsram dê lơh. Jơnau cih do dipal mờ tŭ tơngai bơto wơl tus kâp 2, lơh ƀuơn sră pơ àr gơnoar atbồ, tơrmù ƀà bơta kơn jơ̆ pơrlòng kơnòm bơsram in.