Sồr lơh bè broă lơh tĕ khà, Củ tịc Quôk hội ồng Trần Thanh Mẫn sồr rơcang niam ai dơ̆ pơrjum dơ̆ 5 bơh Mpồl duh broă tĕ khà dà lơgar dê in, kờp dŭ lài bơyai lơh lài mờ dơ̆ ơm rlô sa tềp bơhiàn dà lơgar. Mpồl duh broă tĕ khà dà lơgar gờñ geh sră nggal sồr ală càr, ƀòn dờng lam lơh broă lơh tĕ khà tàm dơ̆ ơm rlô sa tềp bơhiàn dà lơgar; cih loh làng ală kơnòl broă mùl màl kờñ lam lơh bơh kâp thôn, ƀòn tus sàh, sơnah ƀòn, càr, ƀòn dờng, gàr bơta đơng lam sùm bơh ƀòn lơgar tus kâp càr, ờ lời gơlik geh bơta sền ờ sơp, lơh aniai tus broă rơcang tĕ khà tài ơm rlô sa tềp.

Lơh jat jơnau sồr lơh bơh Củ tịc Quôk hội dê, pa do, Mpồl lơh broă sồ 2 Mpồl dềt sền gàr lơngăp lơngai, rơndap tap sèng mờ niam ờdo ờdă mpồl bơtiàn bpơh Mpồl duh broă tĕ khà dà lơgar dê bơh Thượng tướng ồng Lê Tấn Tới, Kong kơnòl Anih duh broă sền gàr dà lơgar – lơngăp lơngai mờ Lơh broă mờ lơgar ndai bơh Quôk hội dê neh lơh broă mờ Anih duh broă tĕ khà càr Khánh Hòa bè broă lơh sền gàr lơngăp lơngai, rơndap tap sèng, niam ờdo ờdă mpồl bơtiàn drơng dơ̆ tĕ khà in.

Thượng tướng ồng Lê Tấn Tới sồr: “Ngui niam gơnoar broă bơh mpồl sền gàr lơngăp lơngai rơndap tap sèng tàm ƀòn lơgar, ling grăp ƀòn, do là mpồl rềp làng bol ngan rlau jơh. Añ sồr ù tiah lơi kal ke, ală oh mi jàu kơnòl mpồl lơh broă mù mơ bơh tŭ do tơn, lài mờ sa tềp. Nàng rềp làng bol, iat làng bol đơs, đơs làng bol wă, lơh làng bol in đòm. Ờ di là tus rềp ngai tĕ khà hơ̆ sồng sồr cau tus. Is ồn là pal sền gròi tus tiah kơh bơnơm, bồt bơlàu”.

Tàm càr Dăk Lăk, gah lơh broă geh gơnoar bal mờ làng bol gam rơcang lài kơryan, dră wơl geh cồng nha jơnau yal tơnggit ờ niam, pơgồp bơnah sền gàr nàng dơ̆ tĕ khà in ngan ngồn gơ gơs là ngai chờ bơh cau tĕ khà tàm càr dê. Là cau Phó lam bồ jơnum tam gơl sồ mpồl bơtiàn, ồng Y Sắc Kƀuôr, lam bồ ƀòn Cuôr, sàh Ea Mdroh, càr Dăk Lăk pà git: “Añ mut tàm Zalo, Facebook, sền gŏ ală jơnau yal tơnggit ờ ngan, cau yal tơnggit tìs bè kwang bàng, cau ala mat bơh Quôk hội dê halà cau ala mat Mpồl duh broă Làng bol ală kâp geh pơnđàng den añ jùt mơ. Dà yoan geh, dà Rơđê kung geh sơl. Do là ală jơnau yal tơnggit ờ niam, pơr lơ̆ dră, tŭ sền gŏ den añ jùt mơ mờ tơngkah tơl nă cau lơh jat, ờ lời bol ờ niam sơmờm, lơh gơ rềng tus să tờm mờ hìu bơnhă”.

Dơ̆ tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp, tơngai lơh broă bơh nam 2026 tus nam 2031, càr Dăk Lăk geh mờr 2 tơlak 420 rbô nă cau tĕ khà lòt đùh sră. Nàng dơ̆ tĕ khà in geh lơh niam ờdo ờdă, di jơnau sồr, Anih duh broă Làng bol càr Dăk Lăk neh tơng gơs Anih duh broă tĕ khà kâp càr, 102 Anih duh broă tĕ khà kâp sàh mờ ală mpồl dềt mìng lơh dùl kơnòl, tàm hơ̆ mpồl kwang àng, ling klàng lơh tờm, lam lơh ndrờm bal ală kơnòl broă sền gàr lơngăp lơngai, rơcang lài kơryan bơh gờñ, bơh ngài.

Ồng Trương Công Thái, Phó Củ tịc Anih duh broă Làng bol càr Dăk Lăk đơs nền: “Pơn jat tai sơlơ tơnguh broă lơh git broă gơlik geh, jơh bal tàm internet, is ồn là ală kai, ală broă bơh ală mpồl sò tơm, bol pơr lơ̆ dră dê, ală cau ơm kis lềng geh gơ rềng tus ù tiah càr Dăk Lăk. Bơh hơ̆ di tŭ git gŏ, bơsong ală jơnau yal tơnggit ờ ngan, lơh gơ rềng tus jơnau đơs tàm làng bol bè dơ̆ tĕ khà, mờ kung tă pơgồp jơnau đơs ai Mpồl sồr lơh tĕ khà càr sồr bơsong, pơgồp bơnah gàr niam ờdo ờdă, rơndap yap sèng tàm ƀòn lơgar, ờ lời gơbàn tiah gơlik broă ờ niam, kal ke lơh gơ rềng tus dơ̆ tĕ khà”.

Mờ bơta sồr lơh kràñ cê, ndrờm bal bơh dà lơgar dê, bơta lơh bal crăp rơcang bơh ală càr, ƀòn dờng dê bal mờ nùs nhơm geh kơnòl uă bơh ală mpồl tờm ngan mờ làng bol dê, broă lơh rơcang ai dơ̆ tĕ khà cau ala mat Quôk hội khoă XVI mờ Mpồl duh broă Làng bol ală kâp tơngai lơh broă bơh nam 2026 tus nam 2031 gam geh lam lơh nền nòn, jơh nùs, bơnĕ bơnài.