Tàm hìu ơm pa dờng niam, kra ƀòn ồng Kră Jăn Ha Nhang, ơm tàm thôn Dà Mpao (Đạ Mpao, Dam Pao), sàh Phú Sơn Lâm Hà, càr Lâm Đồng, kung gam lời uă tŭ tơngai ai broă lơh mờ kra ƀòn dê sền là kơnòl bơh he dê: hòi jà làng bol gàr broă lơh ờs mờng. Hìu bơnhă kra ƀòn geh 1 lồ kơphê, pơgăp 100 tờm sầu riêng mờ broă tàñ ồi kòn cau dong rài kis kơ̆ kơl jăp. Mơya bơta mờ kra ƀòn kờñ ngan rlau jơh là tàm ƀlàng jơng hìu he dê tơn, kra ƀòn neh lơh dùl nơm hìu ơm bơhiàn ờs mờng, ràng tơlik cing mồng, phan bơna lơh mờ tê mờ ală phan ngui geh bal mờ rài kis bơh kòn cau K’Ho Cil dê.

Bơh broă lơh bơh he dê, kra ƀòn ồng Kră Jăn Ha Nhang hòi jà làng bol sền gàr bal broă tàñ ồi kòn cau. Mờ chờ hờp ngan là tŭ tàm thôn Dà Mpao, broă tàñ ồi kòn cau kung gam geh uă hìu bơnhă gàr lơh sùm:

 “Tàm do là mờr 300 hìu bơnhă jơi bơtiàn dồ ết nă cau, tàñ ồi kờn cau rlau 225 hìu bơnhă. Ală sau bơh 15 sơnam tus ală mò kra 70, 80 sơnam kung tàñ ồi kòn cau jơh lơm. Ală mò kung kơnờm tŭ tơngai ru kung lơh broă is tàm hìu bè tàñ phan, tàñ ồi kòn cau kung jòi geh tai priă jền tăc geh bơh 300, 400 rơbô đông jat tơl bơta kung geh priă jền sùm sơl”.

 Jơnau tàm Dà Mpao pà gŏ, gàr broă lơh ờs mờng kung là gàr dùl bơnah niam chài tàm rài kis tŭ do dê, ngan là tŭ tàñ ồi kòn cau dong làng bol geh tai priă jền mờ bơto wơl broă tàñ ồi kòn cau ai rơnàng kơnòm să in.

Gơwèt mờ cau geh bơngă pin dờn, bơta pràn pin dờn lài ngan tus bơh broă lơh krơh niam. Tŭ kra ƀòn lơh lài, đơs mờ ală bơta rềp mềr mờ rài kis mờ bal mờ làng bol tă bơsong ală broă geh ngan, jơnau đơs hơ̆ ƀuơn ngan gơ lòt mut tàm mpồl bơtiàn rlau tai. Do kung là bơta mờ gơnoar atbồ kấp hơđơm tàm Phú Sơn Lâm Hà dê cih dờp loh tàm tŭ rơndăp tăp sèng wơl ù tiah làng bol ơm kis, rơndăp tăp sèng wơl mpồl kwang bàng lơh broă mờ ală thôn.

Bi Ha Mi, chuyên viên Cơldŭ lơh broă Niam chài- Mpồl bơtiàn sàh Phú Sơn Lâm Hà, pà gĭt: tàm 4 thôn geh gal làng bol jơi bơtiàn dồ ết nă cau, jơnau đơs bơh kra ƀòn dê geh gơrềng dờng tàm broă mblàng yal, hòi jà làng bol.

“Tàm dơ̆ pơrjum kra ƀòn đơs den làng bol pin dờn uă ngan mờ broă bơto pơlam, broă hòi jà, mblàng yal bơh kra ƀòn dê, mblàng wơl ală broă lơh niam halà lơh sa jak, gàr niam niam chài ờs mờng jơh bal bè chính trị, lơngăp lơngai mpồl bơtiàn. Kra ƀòn kung jơh nùs ngan sơl đơs nùs nhơm bơta kơ̆p kờñ bơh ƀòn lơgar dê”.

Sền gĭt cau geh bơngă pin dờn là rƀàng tàm tơrbŏ bal đah kấp ủy, gơnoar atbồ mờ làng bol, ală nam do, ală kấp ủy, gơnoar atbồ mờ mpồl cau càr Lâm Đồng neh sền gròi lơh jat tơl làm ală broă lơh jat jơnau sồr; tàm hơ̆ geh yal jơnau yal, bơto bơtê bơta gĭt wă; sền gròi rài kis phan bơna mờ nùs nhơm. Mờ kwơ màng ngan rlau là lơh geh ală bơta nàng mpồl do in lơh jat niam gơnoar tàm mpồl bơtiàn tơn.

Tàm sàh kal ke uă ngan Sơn Điền, ồng Trịnh Văn Dũng, Lam bồ Cơldŭ lơh broă Niam chài- Mpồl bơtiàn sàh, pà gĭt: broă pơgồp bal mờ ală kra ƀòn, cau geh bơngă pin dờn geh gàr lơh sùm. Gơnoar atbồ jà cau geh bơngă pin dờn tus bal ală dơ̆ pơrjum, yal jơnau yal bè gùng dà broă lơh bơh Đảng, adat boh lam Dà lơgar dê nàng ală tơngume do geh mblàng yal wơl tus mờ làng bol mờ broă lơh rềp mềr, ƀuơn wă.

“Bơh tàm bồ nam sàh neh lơh broă rơndăp lơh sền gròi cau geh bơngă pin dờn tàm ù tiah do dê kung bè là broă lơh pơgồp bal. Tàm ală dơ̆ pơrjum bơh Đảng ủy, Anih duh broă Làng bol sàh kung jà cau geh bơngă pin dờn tàm ù tiah do dê tus bal ală dơ̆ pơrjum nàng geh tơngume cribơyai, iăt kơno kung bè gĭt loh bè gùng dà broă lơh bơh Đảng, adat boh lam bơh Dà lơgar dê nàng mblàng yal ai làng bol tàm ù tiah sàh Sơn Điền in”.

Bơh hòi jà bơtàu tơnguh lơh sa, sền gàr niam chài tus cri tơrña bơyai tam lah tam ring, mblàng yal adat boh lam, rcang lài kơryan rềs àr mpồl bơtiàn mờ tus bal ală broă lơh atbồ is bè lơngăp lơngai, rơndăp tăp sèng, gơnoar bơh cau geh bơngă pin dờn dê gam geh mat tàm uă bơta bơh rài kis mpồl bơtiàn tàm ală ƀòn lơgar bơh càr Lâm Đồng dê.

Tơnơ̆ rơndăp tăp sèng wơl mpồl lơh broă sră pơ àr gơnoar atbồ, càr Lâm Đồng geh ù tiah dờng ơnàng, mpồl bơtiàn làng bol ơm kis li la, mờ uă tiah làng bol jơi bơtiàn dồ ết nă cau ơm kis. Ồng Bùi Ngọc Sơn, Phó Kwang lam bồ Sờh Jơi bơtiàn mờ Pin dờn jat Yàng càr Lâm Đồng, pà gĭt, broă ngui niam gơnoar bơh ală cau geh mpồl bơtiàn pin dờn sơlơ geh kwơ tàm broă ai gùng dà broă lơh tus rềp rlau tai mờ làng bol mờ yal nùs nhơm bơta kơ̆p kờñ bơh tàm kấp hơđơm dê.

“Tơnơ̆ tŭ tơmut bal càr mpồl cau geh bơngă pin dờn tàm ù tiah càr dê là geh 883 nă. Cau geh bơngă pin dờn tơngŏ gơnoar tàm broă tă pơgồp bơt bơtàu, bơto pơlam, mblàng yal hòi jà làng bol tus bal ală gùng dà broă lơh bơh Đảng kung bè broă lơh adat boh lam bơh Dà lơgar dê. Cau geh bơngă pin dờn mblàng yal ală broă lơh niam den cau niam broă niam, bơto pơlam tàm broă lơh broă lơh, broă lơh ai làng bol in mờ tus bal gàr niam lơngăp lơngai rơndăp tăp sèng tàm ù tiah do dê”.

Tàm pơn jat bal bơta sền gròi bơh Đảng, Dà lơgar gơwèt mờ gơnoar cau geh bơngă pin dờn tàm mpồl bơtiàn, ngai 20/9/2026, Jơnau lơh nền bơh Chính phủ dê sồ 307  ngan ngồn geh lơh jat jơnau sồr nền nòn broă lơh gơwèt mờ cau geh bơngă pin dờn tàm tiah làng bol jơi bơtiàn dồ ết nă cau. Mờ khà dong kờl bè yal tơngĭt jơnau, dong kờl phan bơna, pơndờm pơnđiang nùs nhơm geh tơnguh uă rlau. Do là ală bơta nàng càr Lâm Đồng in pơn jat tai lơh jat niam broă lơh mờ cau geh bơngă pin dờn, mơkung là bơta gơn kơnờm nàng cau geh bơngă pin dờn tàm ală tiah in lơh jat niam rlau tai gơnoar is ồn tàm kấp hơđơm.