Phó Củ tịc Quôk hội ồng Nguyễn Khắc Định pà git, ală adat boh lam geh Quôk hội ring bal neh di tŭ lơh gơs gùng dà, broă lơh ală jơnau lơh nền bơh Đảng dê bè lơh mờ lơh sir gùng dà, broă lơh, tă bơsong di tŭ ală kal ke, lơh gơlik bơta ƀươn ngan rlau jơh ai làng bol, mpồl lơh sa kă bro in. Ủy ƀan Thường vụ Quôk hội sồr Cíñ phủ, ală anih lơh broă gơ wèt Cíñ phủ di tŭ ai tơlik broă rơndap lơh lam lơh jat adat boh lam, nghị quyết. Kươmàng pal mhar lơh, ai tơlik sră nggal cih bè 104 tơngume Adat boh lam jàu Cíñ phủ, ală Ƀộ in cih mùl màl, pơlam lơh jat Adat Ù tiah (tam gơl): “Pơn jat tai ai tơlik mờ lam lơh broă rơndap lơh mùl màl nàng mhar ai ală broă lơh cih tàm ală adat boh lam, Nghị quyết bơh Quôk hội dê ngui ngan ngồn tàm rài kis. Ngan là ală broă lơh cih pa, krơi is, ală broă lơh cih geh ai ngui gờñ rlau mờ tơngai ai ngui bal bơh adat boh lam dê. Mhar lơh mờ ai tơlik jat gơnăp gơnoar ală sră nggal cih mùl màl, pơlam lơh jat gơ wèt mờ mờr 400 tơngume geh jàu tàm ală adat boh lam mờ Nghị quyết. Gàr bơta gơtùi lơh jat ngan ngồn, ring bal, ndrờm bal mờ ală sră nggal adat boh lam geh gơ rềng, ờ lời gơtìp gơ tàm rơndap rơndồl, gơlik geh kòl yan tàm broă lam lơh jat”.

Phó Thủ tướng Cíñ phủ ồng Trần Lưu Quang pà git, tơnơ̆ tŭ tơn jơh ală dơ̆ pơrjum bơh Quôk hội dê, ală ƀộ, anih lơh broă ndrờm mờ ƀộ đơng lam cih gơs ală adat boh lam, nghị quyết neh tă pơgồp jơnau đơs yal Thủ tướng Cíñ phủ in ai tơlik halà ai tơlik jat gơnăp gơ noar ală Broă rơndap lơh nàng lam lơh jat ală adat boh lam, nghị quyết geh Quôk hội ring bal: “Nàng jơnau cih mùl màl ală adat boh lam, Nghị quyết geh ring bal tàm pơrjum dơ̆ 6 mờ pơrjum nisơna dơ̆ 5, Cíñ phủ, Thủ tướng Cíñ phủ, ală Ƀộ trưởng, kwang atbồ anih lơh broă ndrờm mờ Ƀộ geh kơnòl ai tơlik 56 sră nggal, 29 Nghị địñ, 5 Kơrnuat mờ 22 Thông tư nàng cih mùl màl 10 adat boh lam mờ Nghị quyết. Tŭ do, ală ƀộ geh jàu đơng lam cih gam lam lơh jat di  jơnau cih bơh Adat ai tơlik sră nggal pơlam lơh jat jơnau cih adat boh lam mờ bơta pơn đơl pràn lơh ngan uă nàng kờñ gàr jat tơngai hơ pơrgon mờ bơta niam sră nggal dê”.

Thứ trưởng Ƀộ Tài nguyên mờ Môi trường ồng Lê Minh Ngân pà git, Adat Ù tiah (tam gơl) geh uă tơngume pa, cèng bơta tam gơl pa kươmàng, pơgồp bơnah tàm jơnau kờñ lơh sir gùng dà, broă lơh, tơnguh cồng nha atbồ mờ ngui ù. Tơnơ̆ tŭ Adat geh ai tơlik, Ƀộ neh tơrgùm lơh sir ală sră nggal cih mùl màl, pơlam lơh jat adat boh lam jat gơnăp gơ noar: “Gơwèt mờ Adat Ù tiah, Ƀộ Tài nguyên mờ Môi trường geh tam pà kơnòl đơng lam cih 10 sră nggal, geh 6 Nghị địñ mờ 4 Thông tư. Tŭ do, ală anih lơh broă gam mhar lơh jat di mờ broă rơndap tap sèng, jơnau cih bơh Adat ai tơlik sră nggal pơlam lơh jat jơnau cih adat boh lam, nàng ai tơlik jat gơnăp gơ noar alà yal kâp geh gơ noar in ai tơlik tàm nhai 5 nam 2024. Mìng is gơwèt mờ Nghị địñ bè broă lơh sơgràm dà lềng rơp geh yal tàm nhai 3 nam 2024 jat broă rơndap lơh tơrmù lơyah nàng geh ai ngui bơh ngai 01 nhai 4 jat di tơngai ai ngui geh cih tàm Adat boh lam”.

Nàng tơnguh cồng nha broă lam lơh jat ală Adat boh lam, Nghị quyết, Kwang atbồ Ủy ƀan Lơh sa ồng Vũ Hồng Thanh sồr Cíñ phủ jơh nùs sồr lơh broă ai tơlik ală sră nggal cih mùl màl lơh jat adat boh lam tàm nam 2024, gàr niam jat tơngai hơ pơrgon, bơta niam, ring bal mờ ală adat boh lam geh gơ rềng pa geh Quôk hội ring bal bè Adat Ù tiah, Adat kă bro ù tiah hìu đam, Adat ală Ngân hàng: “Gơwèt mờ Adat Ù tiah, Adat kă bro ù tiah hìu đam, Cíñ phủ jơh nùs sồr lơh broă ai tơlik ală sră nggal cih mùl màl lơh jat adat boh lam tàm nam 2024; mhar jàu kơnòl broă gơ jat bal mờ tŭ tơngai mùl màl lơh gơs jat ală sră nggal do; di tŭ ai mờ rơcang lài ală bơta gàr niam ai broă lơh jat Adat Ù tiah, Adat kă bro ù tiah hìu đam mờ ală sră nggal cih mùl màl; di tŭ lơh jat jơnau sồr ngan ngồn, tơnguh cồng nha atbồ mờ ngui ù tiah bè jơnau kờñ ai tơlik tŭ lơh Adat boh lam; sồr lơh, kờp sền ală kơrnuat boh lam ndai geh gơ rềng sồr tam gơl, bơ tơl dilah pal lơh”.