Nam 2024, mờ gơnoar broă là anih lơh broă să tờm tơn tă pơgồp jơnau đơs, drơng broă Quôk hội, Anih duh broă Lơh kơnòl broă sùm Quôk hội, Mpồl duh broă Jơi bơtiàn, ală Anih duh broă Quôk hội, ală Mpồl gơ wèt Anih duh broă Lơh kơnòl broă sùm Quôk hội, Cơldŭ lơh broă Quôk hội neh lam lơh, lơh jăt mờ lơh sir uă jơnau sồr, kơnòl broă kơn jơ̆ ngan, tàm hơ̆ geh ală tơngume nisơna, pa, kal ke, kal ke ngan. Cơldŭ lơh broă Quôk hội neh di tŭ tă pơgồp jơnau đơs, drơng broă bơyai lơh geh cồng nha 6 dơ̆ pơrjum Quôk hội dê, tàm hơ̆ geh 04 dơ̆ pơrjum ờ bè ờs mờ 2 dơ̆ pơrjùm bè ờs mờng; 33 dar pơrjum bơh Anih duh broă Lơh kơnòl broă sùm Quôk hội dê; 7 Pơrjum kwơmàng bơh Anih duh broă Lơh kơnòl broă sùm Quôk hội dê; bal mờ uă broă lơh ndai bơh Củ tịc Quôk hội, ală Phó Củ tịc Quôk hội.

Mờ ală lơh ngan dờng ngan, nam 2024, Cơldŭ lơh broă Quôk hội neh pơgồp bal tă pơgồp jơnau đơs, drơng broă Quôk hội ring bal 31 adăt, 17 jơnau lơh nền tàm pơrjum jơnau pal jăt, ai jơnau đơs gơ wèt 21 rơndăp broă lơh adăt…pơgồp bơnah di tŭ lơh gơs adăt boh lam ală jơnau sồr, gùng dà broă lơh Đảng dê, lơh geh jơnau sồr tàm bơta geh ngan mờ rài kis dê, pơgồp bơnah kwơmàng tàm broă lơh sir adăt boh lam, ală kơrnoăt boh lam, lơh jăt ală jơnau kờñ lơh adăt boh lam bơh tơngai lơh broă dê mờ ai tơl bơta bơtàu tơngguh lơh sa- mpồl bơtiàn bơh dà lơgar dê in.

Đơs sồr lơh tàm Pơrjum tơn jơh broă lơh nam 2024, lam lơh kơnòl broă nam 2025 bơh Cơldŭ lơh broă Quôk hội dê, Củ tịc Quôk hội ồng Trần Thanh Mẫn cih dờp mờ jờng rơ broă lơh bơh Cơldŭ lơh broă Quôk hội dê, ală anih lơh broă, mpồl lơh broă neh geh uă lơh ngan, pơnđơl pràn, bơsong geh bơnah broă uă broă lơh bal mờ cồng nha niam rlau. Đơs sùm nam 2025 là nam geh lơh Pơrjum dờng Đảng ƀộ ală kâp, wèt tus Pơrjum dờng cau ala măt gùt lơgar dơ̆ 14 bơh Đảng dê; rơcăng ai dơ̆ tĕ khà Cau ala măt Quôk hội khoă 16 mờ tĕ khà cau ala măt Mpồl duh broă Làng bol ală kâp tơngai lơh broă bơh nam 2026- 2031,…tài bè hơ̆, Củ tịc Quôk hội ồng Trần Thanh Mẫn sồr Cơldŭ lơh broă Quôk hội, Đảng ủy anih lơh broă mờ Mpồl Ala măt cau lơh broă (kông đoàn) pơn jăt tai lơh jăt nùs nhơm geh kơnòl, tam klăc, bơceh lơh nàng lơh sir niam kơnòl broă geh jàu: “Tềng đăp măt là pal pơn jăt tai tam gơl pa gùng dà lơh broă, “lơh tam gơl pa wơl” mpồl lơh broă ală anih lơh broă Quôk hội dê, mhar lơh sir ală broă rơndăp tăp sèng tơrmù ală Anih duh broă Quôk hội dê, ală mpồl lơh broă anih lơh broă Anih duh broă Lơh kơnòl broă sùm Quôk hội, ală vụ, mpồl lơh broă, mpồl gơ wèt Cơldŭ lơh broă Quôk hội jăt jơnau sồr bơh Dà lơgar dê”.

Củ tịc Quôk hội ồng Trần Thanh Mẫn kung sồr pal kờp sền nền wơl, dan tam gơl, bơtơl ală adăt, jơnau lơh nền tàm pơrjum gơrềng tus rơndăp tăp sèng, tơrmù mpồl lơh broă, tam gơl bơtơl Tơngume jơnau pal jăt dơ̆ pơrjum, Jơnau pal lơh jăt lơh broă bơh Anih duh broă Lơh kơnòl broă sùm Quôk hội dê. Mơkung pơn jăt tai lơh niam rlau tai, tam gơl pa, pơn jăt tai tơngguh uă cồng nha, tă pơgồp jơnau đơs, drơng broă niam ală Dơ̆ pơrjum; Kwang bàng, đảng viên, cau lơh broă pal lơh jăt niam adăt boh lam, duh rơngòt adăt boh lam, niam chài anih lơh broă; lơh pràn rơcăng, dră wơl sa kwề sa kwà, pơhì pơhà, ờ niam.

Đơs sùm, Ƀộ Cíñ trị neh ai lơh jăt Jơnau lơh nền tàm pơrjum 57 bè tam gơl pràn bơtàu tơngguh jak chài, măy mŏk, tam gơl pa bơceh lơh mờ tam gơl sồ dà lơgar dê, Củ tịc Quôk hội sồr pal lơh pràn ngui măy mŏk yal tơnggĭt jơnau mờ tam gơl sồ tàm broă lơh bơh Coldŭ lơh broă Quôk hội dê gơ jăt bal mờ lơh tam gơl pa ală broă lơh sră nggal gơnoar ătbồ, pal lơh geh bơta ƀươn ƀoài, tơngguh bơta tàm tơrbŏ, tam pà jơnau yal tơnggĭt, ală jơnau yal tơnggĭt di tŭ, geh cồng nha.

Củ tịc Quôk hội dòn kơnờm, mờ bơta lơh ngan tă pơgồp ờ gŏ ơm rlô bơh ală kwang bàng, viên cưk ală anih lơh broă Quôk hội dê, is ồn tàm tŭ tơngai pa tŭ do, tŭ jơh ală anih lơh broă cíñ trị gam lơh jăt Jơnau lơh nền tàm pơrjum sồ 18, gơ sồr tơl nă kwang bàng, đảng viên bơh Đảng ủy, mpồl ala măt cau lơh broă pal kơ̆ kơl jăp, kơnhăp bơta pin dờn, dòn kơnờm tàm bơta đơng lam bồ bơh Đảng dê nàng lơh jăt geh cồng nha ală jơnau kờñ neh ai.

Củ tịc Quôk hội kung sồr, kwang bàng, viên cưk lam lơh jăt kràñ Jơnau sồr bơh Ƀan Ƀí thư dê bè broă bơyai lơh Sa tềp bơhiàn dà lơgar dê nam Ất Tỵ 2025, pal dipal mờ bơta geh ngan, wil tơl, di jơnau sồr, lơngăp lơngai mờ bơsong ală jơnau gơlik geh, ngan là tàm dơ̆ sa tềp bơhiàn dà lơgar dê; sồr Cơldŭ lơh broă Quôk hội sền gròi, trăng gàr sa tềp ai kwang bàng, kông cưk, viên cưk anih lơh broă in geh dồ dơ̆ sa tềp ram mhŭ, chờ hờp chờ hờn, niam bơnĕ, lơngăp lơngai, tềm pềr.