Mpồl cau ala mat Quốc hội càr Gia Lai bơh ồng Châu Ngọc Tuấn, Phó Bí thư Tỉnh ủy càr, Lam bồ Mpồl cau ala mat Quốc hội càr lơh cau lam bồ mpồl pa lam lơh jat sền broă atbồ, ngui jơtài dà lơgar là hìu lơh broă tàm ù tiah sơnah ƀòn Quy Nhơn.

Tŭ do Anih duh broă Làng bol sơnah ƀòn Quy Nhơn atbồ 5 hìu lơh broă, mờ kờp jơh bă ù rlau 5 rbô 757 thơk vuông. Broă rơndap hìu lơh broă ai cau lơh broă sră pơ àr gơnoar atbồ in tơnơ̆ rơndap tap sèng sền bal là di pal mờ jơnau kờñ mùl màl. Geh 4 tàm kờp jơh 5 hìu lơh broă gam geh rơndap, ngui drơng broă lơh bơh Anih duh broă Làng bol sơnah ƀòn mờ ală anih lơh broă, mpồl lơh broă dê in, gàr broă ờ gơtìp ơm ing. Bơh sền wơl sră nggal ù tiah, jơh bal 5 hìu lơh broă neh geh sơnah ƀòn sền swì bè adat boh lam.

Bulah bè hơ̆, broă lơh atbồ, ngui jơtài dà lơgar kung gam bàr pe bơta kal ke. Bàr pe sră pơ àr adat boh lam, sră pơ àr ù tiah, sră pơ àr jak chài măi mok ờ hềt wil tơl; jơnau yal tơnggit phan bơna geh dờp bơh uă gah, bơh uă tŭ tơngai den tàng kờñ pal pơn jat tai lơh niam, kờp dŭ mờ yal. Bàr pe hìu lơh broă ngui jŏ nam geh tềl tơnggŏ gơbàn ờ diơng, kờñ pal lơh niam wơl, tàm tŭ priă jền den gam gơ wèt tàm bơta pràn tàm pơnring kes priă.

Đơs pơn dut dơ̆ jat sền, Lam bồ Mpồl cau ala mat Quốc hội càr Gia Lai ồng Châu Ngọc Tuấn pà git, Gia Lai là dùl tàm 12 càr, ƀòn dờng geh Anih duh broă Lơh kơnòl broă sùm Quốc hội sac rơ wah jat sền dờng ngan rlau jơh mìng dùl tơngume bè broă lam lơh gùng dà broă lơh, adat boh lam atbồ, ngui jơtài dà lơgar là hìu lơh broă tơnơ̆ rơndap tap sèng cau lơh broă sră pơ àr, mpồl lơh broă sră pơ àr gơnoar atbồ. Mpồl cau al amat Quốc hội càr sồr sơnah ƀòn Quy Nhơn pơn jat tai sền wơl, lơh sir sră nggal adat boh lam gơ wèt mờ ală hìu, ù; sơlơ sền swì, jat sền broă atbồ, ngui phan dà lơgar. Is ồn, kờñ pal sền nền wơl ală hìu niam chài, anih pơrjum mpồl bơtiàn tàm ală jơnum làng bol tiah drà gam jơngkah wơl tơnơ̆ rơndap tap sèng, gàr lơh jat jơnau kờñ tơrgùm mat làng bol dê, pleh bơsong phan jat gùng dà lơh gơ rềng tus anih pơrjum bal.

Tàm càr Dăk Lăk, Mpồl cau ala mat Quốc hội càr kung lam lơh jat sền broă lam lơh gùng dà broă lơh do tàm sơnah ƀòn Buôn Ma Thuột. Tơnơ̆ tŭ lơh broă broă lơh gơnoar atbồ ƀòn lơgar 2 kâp, Anih duh broă Làng bol sơnah ƀòn Buôn Ma Thuột, càr Dăk Lăk dờp atbồ 64 hìu, ù, tàm hơ̆ geh 13 hìu tŭ do gam jơngkah, ờ hềt geh rơndap ai ngui. Broă bơsong ală phan do gơtìp uă ngan bơta gơ kòl. Ồng Trịnh Vũ Quang - Kwang lam bồ Anih tờm lam lơh broă drơng ala broă lơh dà lơgar atbồ sơnah ƀòn Buôn Ma Thuột pà git, sơnah ƀòn gam gơtìp bơta gơ kòl tàm broă git nền giă ai ơpah tŭ 2 thông tư Ƀộ Priă jền mờ Ƀộ Bơt bơtàu dê ờ ndrờm bal, mờ geh jơnau pơlam krơi is: “Jat Thông tư Ƀộ Bơt bơtàu dê cih, nam ngui gơ krơi mờ Thông tư 141 Ƀộ Priă jền dê. Pơn yơu jơtài dà lơgar là broă lơh ngui tàm rài kis làng bol kâp 3 tơngai ngui là 50 nam, mơya sền swì bơta gơ klàr phan jat Thông tư 141 Ƀộ Priă jền dê den mìng geh 25 nam. Bè hơ̆ den tàng, bơta kuơ phan gam ngui dê là gam geh kuơ, mơya bơta gơ klàr den gam wơl tŭ tơngai lơyah ngan. Den tàng, lơh gơbàn kal ke tàm broă git nền giă ai ơpah”.

Bơh mùl màl do, mpồl jat sền ai tơlik broă tờm: kờñ pal git nền jơtài dà lơgar jơngkah wơl là bơta kơn jơ̆ bè atbồ halà priă jền bơtàu tơnguh. Broă ngui jơtài dà lơgar jơngkah wơl ală ƀòn lơgar dê rơp lơh nền tus gùng dà broă lơh tàm tơngai tus. Mò Lê Đào An Xuân, Phó Lam bồ Mpồl drơng mìng dùl kơnòl Mpồl cau ala mat Quốc hội càr Dăk Lăk cih dờp bơta jơh nùs mờ kràñ cê sơnah ƀòn Buôn Ma Thuột dê. Gơ wèt mờ ală kal ke, gơ kòl mờ jơnau dan, jơnau đơs ƀòn lơgar dê, Mpồl cih dờp, tơrgùm wơl tàm tŭ jat sền tàm ală sàh, sơnah ƀòn ndai nàng yal Quốc hội in. Broă atbồ, ngui jơtài dà lơgar là hìu lơh broă tơnơ̆ tŭ lơh jat jơnau lơh nền rơndap tap sèng cau lơh broă sră pơ àr mờ mpồl lơh broă sră pơ àr gơnoar atbồ là broă dờng, gam geh cau tĕ khà, làng bol gùt lơgar sền gròi: “Broă ngui jơtài, is ồn là hìu lơh broă tơnơ̆ rơndap tap sèng den kờñ pal lam lơh geh cồng nha, pleh pơhì pơhà. Quốc hội rơp lam lơh jat sền dờng ngan rlau jơh tàm nam do gơ wèt mờ jơh ală càr, ƀòn dờng bè tơngume do”.

Bơh jat sền mùl màl tàm càr Gia Lai mờ càr Dăk Lăk, ală bơta gơ kòl tàm atbồ, ngui hìu lơh broă mờ jơtài dà lơgar tơnơ̆ rơndap tap sèng neh geh đal git loh rlau. Do kung là bơta tờm nàng ală mpồl cau ala mat Quốc hội tơrgùm wơl, sồr lơh sir gùng dà broă lơh, gàr jơtài dà lơgar geh atbồ nền nòn, ngui di jơnau kờñ, geh cồng nha, pleh pơhì pơhà mờ drơng niam rlau rài kis làng bol dê in.