Là dùl tàm ală hìu bơnhă geh rài kis kal ke geh dờp hìu nùs kờñ gơboh bơh Mpồl Cau ala măt Quôk hội càr Dăk Lăk dê pơgồp bal mờ Anih Priă jền Ling klàng dê jàu pà, ồng Y Nguyên Niê ơm tàm ƀòn Jung B, xã Ea Ktur, kơnhoàl Cư Kuiñ, càr Dăk Lăk dê ngoh rơngăc ngan. Hìu bơnhă ờ geh cau, pơ ùr ồng dê gơtìp kòp kơn jơ̆ neh sang rài pơgăp mờ do 02 nam. Oh kòn den lòt lơh broă ngài hìu, lời wơl nă să ồng mờ 2 nă sau dềt ờ hềt gĭt wă bơta lơi. Jơh ală priă jền dơ̆ ngui bơh hìu bơnhă dê mìng kơnờm jơh lơh tàm sươn kơphê kra neh jŏ sơnam bal mờ broă lòt dong lơh hìu tŭ geh tŭ ờ bơh ồng dê. Hìu lơh mờ mpàng ing lơm, sèt ñhăt dà mìu neh gĭt nđờ nam kung ờ jai sơl geh priă jền nàng lơh niam, lơh kơnhăp wơl. Bè hơ̆ den tàng tŭ geh dong kờl 80 tơlak đong nàng lơh hìu pa, ồng brơn brài ngan tus gơhòr dà măt, ngar măt sùm mang àng tơn. Sền gŏ pah ngai hìu geh lơh, bơta chờ hờp tàm ồng gơ sơlơ geh sùm tai. Ồng Y Nguyên Niê, yal: Lài do, hìu sèt ñhăt dà mìu jơh, tŭ do dà lơgar dong kờl hìu bơnhă añ lơh hìu. Añ ưn ngài Đảng, Dà lơgar neh sền gròi.

Geh jàu hìu nùs kờñ gơboh dồ dơ̆ bal mờ ồng Y Nguyên Niê tàm lồi nhai 09 pa do, mò H’Sang Pang Ting ơm tàm ƀòn Buốc, xã Nam Ka, kơnhoàl Lăk, càr Dăk Lăk kung chờ hờp ngan gĭt lơh. Hìu bơnhă mò là hìu rƀah, ù lơh sa ờ geh uă, ờ geh broă lơh broă sa kơ̆, mìng lòt lơh apah lơh mờng lơm. Jơh dùl hìu 8 nơm bơr sa tàm tŭ priă lơh geh tŭ geh tŭ ờ, den tàng mò kung ờ gŏ khin kơlôi tus broă lơh niam wơl hìu mpàn neh sơrling sơ wĕ jơh uă ngan. Tŭ geh dờp jàu hìu pa, mò H’Sang ngoh rơngăc ngan đơs: Rài kis hìu bơnhă añ lài do kal ke ngan, hìu mìng là hìu lơh ing lơm. Tŭ do geh ală kâp sền gròi dong kờl ai hìu bơnhă añ in geh hìu niam tre bè do să tờm añ mờ hìu bơnhă añ dan hơ rơ̆p lơh ngan pơnđơl lơh sa nàng bơtàu tơngguh lơh sa hìu bơnhă lik klàs bơh rƀah.

Mò Lê Thị Thanh Xuân, Phó Kwang ătbồ Mpồl Cau ala măt Quôk hội càr Dăk Lăk dê pà gĭt: Bal mờ ală broă lơh broă lơh ờs mờng, Mpồl sùm sền broă lơh sền gàr niam lơngăp lơngai rài kis mpồl bơtiàn in là kơnòl nàng kờñ tàm sơm băt tê bal mờ mặt trận dà lơgar ală kâp, ală mpồl cíñ trị- mpồl bơtiàn nàng sền gròi niam rlau rài kis ală cau kal ke, ngan là ală cau geh bơta dong kờl bơh mpồl bơtiàn dê, hìu rƀah, jơi bơtiàn dồ êt nă cau tàm tiah sar lơgar ngài…dong khi brồ guh tàm rài kis, pơgồp bơnah kơ̆ kơl jăp bơta lơngăp lơngai rơndăp tăp sèng tàm ƀòn lơgar. Mò Lê Thị Thanh Xuân, đơs: Bơh bồ tơngai lơh broă tus tŭ do, bol hi neh hòi jà, lơh geh 22 nơm hìu, kờp mờ priă 1 tơmàn 400 tơlak đong. Priă jền ờ uă mơya neh dong ai bơta lơh gơrề uă bè nùs nhơm Đảng, Dà lơgar dê sùm sền gròi tus cau geh rài kis kal ke nàng hơ̆ sồng lơh gơrề uă bơta pin dờn bơh làng bol, bơh cau tĕ khà dê gơ wèt mờ Đảng mờ Dà lơgar. Bơh hơ̆, bal mờ Đảng mờ Dà lơgar lơh jăt niam broă lơh sền gàr niam lơngăp lơngai rài kis mpồl bơtiàn nàng ờ dồ nă cau lơi gơtìp lời ơm wơl hờ ngkời.

Pa do ngan rlau jơh tàm lơh broă lơh ờs mờng tàm pơrjum dơ̆ 08, Quôk hội khoă XV gam geh lơh tàm Hà Nội, Mpồl Cau ala măt Quôk hội càr Dăk Lăk neh geh uă jơnau đơs tă pơgồp kwơmàng nàng kờñ tă bơsong ală kal ke, gơkòl tàm càr. Mùl màl, bè broă lam lơh rơndăp broă lơh Rbàng 110 rềp nhàr bal mờ càr Gia Lai mờ neh lơh geh bơnah broă 88%, gam 12% gam tŭ do gam ơm ing tài gơkòl măt ù mờ priă ai bơh sră tăc sră tềm pềr priă Cíñ phủ dê. Càr Dăk Lăk neh geh pơyua Ƀộ Gùng lòt rê Jun pơndiang phan dà lơgar in nàng sền swì, pơn jăt tai bơcri priă lơh sir broă lơh rbàng do, pleh pơhì pơhà. Kung tàm dơ̆ pơrjum do sơl, Mpồl Cau ala măt Quôk hội càr Dăk Lăk neh yal wơl dồ jơnau krơi sơƀơi bơh bơta geh ngan càr dê là càr geh bơta nàng bơtàu tơngguh bè đèng càl, đèng măt tơngai, mơya tŭ do ală rơndăp broă lơh đèng măt tơngai bơh càr Dăk Lăk dê ndrờm bè pal tàm ala gơ̆p tăc đèng nàng jun đèng tus gùng che đèng dà lơgar dê, tài bơh phan bơna jun dờp đèng ờ geh niam; dan mờ Cíñ phủ, Ƀộ Lơh sa mờ măy mŏk mờ Kă bro phan pal sền gròi bơ̆t bơtàu ală phan bơna bơh gùng che đèng dê. Bal mờ hơ̆, Mpồl Cau ala măt Quôk hội càr Dăk Lăk kung sồr Ƀộ Lơh broă, Cau ling sồt să mờ Mpồl bơtiàn mờ Ƀộ Bơto bơtê mờ Bơsam pal geh sền swì cồng nha lơh broă bơh ală anih tờm bơto broă lơh, bơto bơtê sùm dê nàng geh bơto pơlam rơndăp tăp sèng wơl ală mpồl do tàm bơta mùl màl, lơh geh jơnau kờñ tơngguh uă cồng nha lơh broă bơh ală mpồl broă lơh dà lơgar dê lơh.