Tàm dơ̆ tìp mat, Mpồl cau ala mat Quôk hội càr Lâm Đồng yal mờ cau tĕ khà càr dê jơnau kờp dŭ bè tŭ tơngai, tơngume dơ̆ pơrjum dơ̆ 10, Quôk hội khoă XV. Tàm dơ̆ pơrjum kờp dŭ bơyai lơh bơh ngai 20/10 tus ngai 12/12, Quôk hội rơp sền swì, lơh nền 43 rơndap lơh adat boh lam, jơnau lơh nền tàm pơrjum gơ wèt broă lơh bơt bơtàu adat boh lam; 12 mpồl tơngume bè lơh sa – mpồl bơtiàn, kes priă dà lơgar, jat sền mờ ală broă kuơmàng ndai; mờ kung geh 13 mpồl tơngume ală anih lơh broă pơyua jơnau yal nàng cau ala mat Quôk hội in kơlôi sơnơng. Cau tĕ khà Lâm Đồng ai tơnggŏ bơta pin dờn tàm bơta đơng lam bơh Đảng, jat sền bơh Quôk hội, bơta đơng pơlam kràñ cê ngan bơh Cíñ phủ dê tàm bơtàu tơnguh lơh sa – mpồl bơtiàn, sền gàr lơngăp lơngai dà lơgar dê; cih dờp ală broă lơh ngan sơrlèt gan kal ke bơh càr dê lơh geh khà gơguh lơh sa 9 nhai bồ nam geh 6,8% mờ rề dia geh mờr 23 rbô 600 tơmàn đong, ndrờm 84% khà kờp dŭ càr dê, gơguh rlau 19% pơndrờm dùl tŭ bal mờ nam lài; đơs niam broă lơh tơn jơh hìu ing, hìu ồm sèt nhăt dà mìu mờ broă ờ tă priă bơsram ai kơnòm bơsram in bơh Đảng, dà lơgar dê.

Sền gròi tus gah bơto bơtê mờ bơsram, cau tĕ khà càr Lâm Đồng đơs là, kờñ pal sền swì, ờ gàr tai dơ̆ pơrlòng jơh bơsram kâp pe tài uă ngan ală càr pah nam ndrờm geh khà gơ kờn pơrlòng jơnhua ngan. Kờñ pal lơh jat mhar jơnau sồr lơh bơh Ƀộ Cíñ trị dê kờp sền broă lam lơh jơnau bơto bơsram pe kâp, gàr lơh gơlik dùl ƀộ sră măi ring bal gùt lơgar; Sền swì broă ờ huan ai kơnòm bơsram ngui điện thoại tàm hìu bơsram, bơta uă ir kơnòm bơsram tàm dùl ơdŭ tàm tiah Dà Làc, bal mờ bơto bơtê jơnau git wă, ală hìu bơsram pal sơlơ sền gròi tus broă bơto bơtê nùs nhơm kơnòm bơsram in.

Cau tĕ khà tàm ală sàh tiah sar lơgar ngài tàm càr dan geh sền gròi bơcri priă lơh gùng lòt nàng gàr bơta ƀuơn tàm rài kis mờ chồl tơnguh kă bro. Gơ wèt mờ broă lam lơh gơnoar atbồ ƀòn lơgar 2 kâp, cau tĕ khà càr Lâm Đồng đơs nền, tơnơ̆ mờr 3 nhai lơh broă, ală tiah neh lam lơh ring bal lơh geh uă cồng nha kuơmàng, bơh sơn rờp drơng wơl niam làng bol in. Bulah bè hơ̆ jat cau tĕ khà ồng Lê Văn Thái ơm tàm sơnah ƀòn Lâm Viên – Dà Làc đơs gam bàr pe bơta gơ kòl, bơta ờ niam kờñ pal geh bơsong di tŭ nàng mpồl lơh broă rsă pơ àr gơnoar atbồ in lơh broă niam rlau: “Broă rơndap ai kwang bàng, cau lơh broă sa priă nhai dà lơgar bè tŭ do ờ hềt dipal mờ khà kờp làng bol lơh gơbàn bơta kơn jơ̆ broă lơh uă. Kwang bàng, cau lơh broă sa priă nhai dà lơgar pal bơsong khà broă uă den tàng lơh gơ rềng tus bơta niam, cồng nha kơnòl broă geh jàu mờ lơh gơ rềng tus bơta niam drơng broă làng bol in. Dan ală cau ala mat Quôk hội, dan Quôk hội, Cíñ phủ mờ ală ƀộ, gah broă lơh dà lơgar geh gơ rềng mhar kơlôi sơnơng, tam gơl nàng geh gùng dà tam pà cau lơh broă sa priă nhai dà lơgar kâp sàh jat khà kờp làng bol, bă ù mờ bơta is ồn bơh tơl tiah dê".

Tàm dơ̆ tìp mat mờ cau tĕ khà, ồng Y Thanh Hà Niê Kđăm, Kwang geh jơng Đảng dà lơgar, Ƀí thư Tỉñ ủy càr, Kwang lam bồ Mpồl cau ala mat Quôk hội càr Lâm Đồng cih dờp 16 jơnau đơs jơh nùs bơh cau tĕ khà dê gơ wèt mờ bơta bơtàu tơnguh bơh càr dê. Is ồn tàm ù tiah dờng ơnàng, geh uă bơta pràn dờng ngan bơh càr Lâm Đồng dê tơnơ̆ tŭ tơmut bal 3 càr Dăk Nông, Bình Thuận mờ Lâm Đồng. Ala mat Mpồl cau ala mat Quôk hội, Anih duh broă Làng bol càr Lâm Đồng bal mờ ală sờh, gah broă lơh geh gơnoar bơh càr dê kung neh hơ tơn bàr pe jơnau dan mùl màl bơh cau tĕ khà dê gơ wèt kơnòl bơh gơnoar atbồ mờ gah he atbồ.