Mpồl lơh broă neh jàu phan pà Sa tềp pà 200 hìu rƀah là làng bol jơi bơtiàn dồ êt nă cau bơh sàh Ia Rvê dê, pơgồp bơnah pơndờm pơnđiang làng bol wă rò Sa tềp chờ hờp, ram mhŭ, bơtơl tai bơta pin dờn mờ gơn kơnờm brồ guh tàm rài kis. Ồng Hoàng Duy Chinh đơs nền Đảng, Dà lơgar mờ Quôk hội sùm sền gròi broă lơh jơi bơtiàn, sền gàr rài kis mpồl bơtiàn tàm kơnhoàl ù tiah nhàr lơgar; añ sồr ƀòn lơgar pơn jăt tai sền gròi rài kis Làng bol, đòm jăt tam klăc, prăp gàr bơhiàn niam chài krơi is. Dồ ngai bal, mpồl còp, nting bơr sa Tềp kwang bàng, cau ling Pôs đồng Sền gàr tiah nhàr lơgar Yok M’Bre.

Ồng Hoàng Duy Chinh cih dờp, đơs niam ngan ală lơh ngan bơh mpồl lơh broă dê tàm ătbồ, sền gàr gơnoar tờm, lơngăp lơngai nhàr lơgar dà lơgar mờ tus bal bơ̆t bơtàu ală anih lơh broă cíñ trị kâp hơđơm, trăng gàr rài kis Làng bol tàm ù tiah do dê.