Ồng Nguyễn Văn Bang, Cau lam bồ Kông ty TNHH MTV Nhất Bang, ƀòn dờng Pleiku gŏ, bơta pơn rơ bơh Jơnau lơh nền tàm pơrjum dê là neh ai tơlik lài gùng dà broă lơh tam gơl niam anih kă bro jat gùng dà loh làng, kơ̆ kơljap mờ đềt mềr mờ mpồl lơh sa kă bro. Mùl màl, broă tơrmù khà dơ̆ lùp sền, sền sơ wì mpồl lơh sa kă bro gơmù gam ờ rlau 1 dơ̆ dùl nam, chồl pràn ngui tam gơl sồ, tơrmù ƀà bơta sền sơ wì tơn mờ lơh glài kràn ală broă lơh gơbàn kal ke là ală bơta geh ală mpồl lơh sa kă bro jờng rơ uă ngan.

Broă tam gơl bơh lài mờ sền sơ wì gơs tơnơ̆ sền sơ wì, sang ală bơta kòl yan geh mut tàm drà kă bro rơp lơh gơlik ù tiah bơtàu tơnguh ngan ngồn rlau ai mpồl lơh sa kă bro in. Kuơmàng là broă dong kờl priă cồng ai càn ai ală rơndap broă lơh tơlir in, ờ sa dia, tơrmù dia ai mpồl lơh sa kă bro sơn đờm mut lơh broă bơceh lơh mờ tơn jơh dờp ơpah dia, priă ai bơh priă lơh geh bơh nam 2026.

Ồng Nguyễn Văn Bang jờng rơ jơnau pal jat lơh glài adat boh lam jat gùng dà lơh lài broă lơh glài mờ priă, lơh glài broă làng bol ala mờ hìñ sự, ờ yă wơl ờ niam, sền gàr jơtài dipal bơh mpồl lơh sa kă bro dê mờ Jơnau lơh nền tàm pơrjum sồ 198 neh đơs loh: “Mờ gùng dà, broă lơh tŭ do,añ pin dờn là, priă bơcri ai ală mpồl lơh sa kă bro dimơ mờ dềt in, ngan là ơruh pơnu sơn đờm mut lơh broă rơp geh tam gơl uă ngan. Añ pin dờn là, lơh sa nă să is rơp bơtàu tơnguh pràn kơldang tài geh Đảng, Dà lơgar sền gròi, mờ ală mpồl ai càn priă, anih priă jền rơp lơh gơlik bơta niam nàng mpồl lơh sa kă bro geh càn priă dồ bă sơrbac mhar mờ ƀuơn rlau”.

Jơnau lơh nền tàm pơrjum sồ 198 ai tơnggŏ loh làng bơta sền gròi bơh Đảng, Dà lơgar dê gơ wèt mờ tiah lơh sa nă să is, sền do là dùl bơta gơn kơnờm bơtàu tơnguh kuơmàng bơh dà lơgar dê tàm rài pa. Ồng Phan Thanh Thiên, Củ tịc Mpồl cau lơh sa kă bro kơnòm să càr Gia Lai pà git: do là dùl tŭ niam dờng ngan nàng gah mpồl lơh sa kă bro nă să is git. Jơnau lơh nền tàm pơrjum sồ 198 gam geh ală mpồl lơh sa kă bro càr Gia Lai dờp mờ uă bơta kơp kơnờm. Khi sền gŏ tàm hơ̆ dùl jơnau hơ pơrgon cíñ trị pràn kơldang, dùl broă rơndap lơh bơtàu tơnguh jŏ tơngai, mờ rlau mờ hơ̆ là dùl tŭ niam nàng tă bơsong ală kòl yan neh geh tàm tŭ tơngai jŏ jòng. Bulah bè hơ̆, ồng Phan Thanh Thiên, Củ tịc cau lơh sa kă bro kơnòm să càr Gia Lai đơs là, pal geh gơnoar broă lơh nền bơh gơnoar atbồ ală kâp dê tàm broă lam lơh jat, nàng kờñ ai Jơnau lơh nền tàm pơrjum ngan ngồn gơ gơs là bơta chồl tơnguh ai bơta bơtàu tơnguh kơ̆ kơljap jŏ jòng sùm bơh lơh sa nă să is dê: “Añ dan kwang đơng lam bồ càr sền gròi uă rlau tai tus ală mpồl lơh sa kă bro nă să is, kung bè mpồl cau lơh sa kă bro kơnòm să càr Gia Lai. Lài ngan, ală gùng dà, broă dong kờl pal loh làng, dong mpồl lơh sa kă bro geh dờp mhar rlau ală rơndap broă lơh, sră nggal adat boh lam. Mờ kung pal lơh gơlik bơta ƀuơn nàng mpồl lơh sa kă bro in geh ai càn priă dong kờl priă cồng, dong kờl ală bơyô kơnòm să tàm gùng sơn đờm mut lơh broă mờ bơtàu tơnguh mpồl lơh sa ka bro. Bal mờ hơ̆ là broă lơh ală broă lơh hòi jà kă bro, pờ ală ơdŭ bơto bơtê bè đơng pơlam, tam gơl sồ, nàng kờñ tơnguh pràn jak tàm pơrlòng ai mpồl lơh sa kă bro tàm càr in”.

Jơnau lơh nền tàm pơrjum sồ 198 pa geh Quôk hội ring bal ờ mìng lơh gơlik dùl tap pa ai lơh sa nă să is Việt Nam in mờ gam sòl pơnđàng bơta pin dờn mờ bơta kơp kơnờm brồ guh bơh ală mpồl lơh sa kă bro dê, ngan là tàm ală tiah geh uă bơta pràn bè càr Gia Lai. Tŭ ală broă lơh cèng bơta tam gơl pràn geh lam lơh ngan ngồn mờ ală broă lơh kràñ cê mờ ring bal bơh gơnoar atbồ ală kâp, anih kă bro rơp gơ gơs loh làng, geh cồng nha rlau, lơh gơlik bơnàng jă nàng lơh sa nă să is ngan ngồn gơ gơs là bơta gơn kơnờm kuơmàng tàm tŭ tơngai bơtàu tơnguh dà lơgar. Mờ nùs nhơm rơcang lài tam gơl pa, ală mpồl lơh sa kă bro càr Gia Lai gam pơgồp bal bơta pràn, dùl nùs bal nàng lơh bơta kơp kơnờm gơ gơs ngan ngồn, tă pơgồp jơh nùs tàm bơta bơtàu tơnguh kơ̆ kơljap jŏ jòng sùm bơh càr mờ gùt lơgar dê.