Lài ngan pal đơs nền, broă lam lơh 3 Broă lơh jơnau kờñ dà lơgar (bè bơt bơtàu ƀòn lơgar pa, tơrmù rƀah kơ̆ kơljap jŏ jòng sùm mờ bơtàu tơnguh lơh sa- mpồl bơtiàn tiah làng bol jơi bơtiàn dồ êt nă cau mờ tiah kơh bơnơm) tàm ală càr Tây Nguyên tàm ală nam do neh cèng wơl cồng nha bơh sơn rờp. Phan bơna geh lơh niam, rài kis làng bol dê ngai sơlơ geh tơnguh niam. Kra ƀòn ồng Anưk – cau tĕ khà ƀòn Tuơh Ktu, xã Glar, kơnhoàl Đăk Đoa, càr Gia Lai pà git: “Rài kis tŭ do neh tam gơl uă ngan. Làm gùt ală thôn ƀòn ndrờm tam gơl niam bơnĕ ngan, lài do gùng lòt bŏ lơm bè, thul kơmbuh, ờ krơi bè wàng ròng sur, hìu ơm den sèt, đèng ngui den ờ geh. Tŭ do geh gùng sàng goh, geh hìu bơsram, hìu sơnơm, ồs đèng sòl àng làm gùt ală tiah. Să tờm añ kung lòt sền tàm càr Dăk Lăk gŏ tam gơl niam ngan. Mờ pa do añ kung lòt gan tiah Đak Bơt, Kon Giang, mù tus Kơbang tơn, sền gŏ rài kis tam gơl niam ngan. Dơ̆ 2 tai là tàm lơh broă lơh sa den làng bol neh git ngui măi mok, bơta chài pa. Rài his rờm ram, wil tơl neh rê tus mờ gùt thôn ƀòn, hìu lơi kung geh rơndeh măi, jơh bal mờ tiah sar lơgar ngài.,.. Jơh ală là kơnờm bơta dong kờl bơh Đảng, dà lơgar dê”.

Bulah bè hơ̆, tàm 3 broă lơh jơnau kờñ dà lơgar den Broă lơh bơtàu tơnguh lơh sa mpồl bơtiàn tiah làng bol jơi bơtiàn tiah kơh bơnơm kung gam kal ke ngan rlau jơh. Tàm pơrjum nisơna dơ̆ 5 lồi nam pa do, Quôk hội neh ai tơlik Nghị quyết bè gùng dà broă lơh krơi is lam lơh broă lơh jơnau kờñ dà lơgar. Nghị quyết geh 6 tap, cih 8 gùng dà broă lơh krơi is nàng kờñ tă bơsong jơh ală kal ke, kòl yan, pơn jat tai lơh gơlik bơta ƀuơn nàng ală tiah in tơnguh mhar tơngai lam lơh, ai priă bơcri ală broă lơh jơnau kờñ dà lơgar tàm tơngai tus. Phó Thủ tướng Cíñ phủ Trần Lưu Quang đơs là, do là gùng dà broă lơh pràn kơldang ờ hềt geh bơh lài tus tŭ do: “Jơnau pal jat bơh 8 broă dê là tam pà kâp pràn, sơlơ tơnguh tai pràn jak kâp hơ đơm, lùp sền, jat sền. Tam pà kâp ai kơnhoàl, xã in sền gơtùi lơh halà ờ. Tàm hơ̆ kung geh bơta kwi kuơ, ờ khin lơh. Den tàng pal sền sơ wì broă lơi gơtùi lơh, broă lơi ờ gơtùi, kes priă dà lơgar dê pal atbồ nền nòn, bulah 1 đông. Bal mờ hơ̆, do ờ di là gùng dà broă lơh ai lơh tơrlòng lài, mờ là gùng dà broă lơh krơi is”.

Ală kwang bàng Quôk hội neh ring bal uă mờ gùng dà broă lơh lam lơh tơrlòng lài tam pà kâp ai kâp kơnhoàl in tàm broă atbồ, lam lơh ală broă lơh jơnau kờñ dà lơgar jat rơndap broă: “Hội đồng Ñân zân kâp kơnhoàl geh lơh nền tam gơl broă rơndap lơh tam pà priă bơcri dà lơgar, priă tă lơh sùm đah ală broă lơh jơnau kờñ dà lơgar tàm broă rơndap lơh bơcri priă dà lơgar di mơ tơngai, broă rơndap lơh bơcri priă pah nam, kờp dŭ lài tă dơ̆ ngui kes priă dà lơgar pah nam neh geh kâp geh gơnoar jàu”. Kwang bàng ồng Tạ Văn Hạ, Mpồl kwang bàng càr Quảng Nam đơs: “Mờ 8 gùng dà broă lơh lam lơh tơrlòng lài do, jat añ den rơp lơh gơlik bơta tam gơl pràn nàng broă tơnguh mhar tơngai lam lơh 3 broă lơh jơnau kờñ dà lơgar. Do là bơta mờ jat añ den pal sền sơ wì bè lơi tŭ  sac rơ wah, neh hòi là lam lơh tơrlòng lài den pal cèng bơta ala mat, digơlan là ƀòn lơgar, ƀòn dờng, tiah drà, tiah kơh bơnơm,… jơh ală bơta hơ̆ tŭ bol he gơtùi tơn jơh den broă dong kờl hơ̆, gùng dà broă lơh hơ̆ pal cèng bơta tơrgùm jơh ală bơta bơh ală gah broă mờ ală tiah dê”.

Kwang bàng Quôk hội mờ cau tĕ khà gùt lơgar kơp kờñ Nghị quyết bè pàr, pe gùng dà broă lơh, broă dong kờl krơi is lam lơh ală broă lơh jơnau kờñ dà lơgar geh Quôk hội ring bal rơp geh uă tam gơl, lơh gơlik bơta niam nàng ù tiah kơh bơnơm gơtùi ngui bơta pràn mùl màl, tam gơl pràn brồ guh. Ồng U Minh Nam, Phó Kwang atbồ Ƀan Jơi bơtiàn càr Kon Tum pà git: “Bơh bơta hơ̆, bol hi rơp pơlam ală tiah bơt bơtàu broă rơndap lơh mùl màl, git nền broă lơh ngan ngồn. Mờ kung tơnguh gơnoar broă bơh kâp ủy, gơnoar atbồ kâp hơ đơm dê tơrgùm lam lơh ală kơnòl broă mùl màl. Pơn jat tai lam lơh jat ngan ngồn ală gùng dà broă lơh, broă dong kờl krơi is neh geh Quôk hội ring bal halà neh geh Cíñ phủ, ală Ƀộ, gah broă lơh dà lơgar lơh nền. Dơ̆ 3 là lam lơh kờp sền, pồ tơl wơl Mpồl đơng lam Broă lơh jơnau kờñ dà lơgar ală kâp, nàng kờñ sơlơ tơnguh tai gơnoar broă bơh ală kwang bàng tàm mpồl đơng lam dê”.

Cau tĕ khà gùt lơgar đơs bal, tiah Tây Nguyên đơs is kơp kờñ, tơnơ̆ tŭ Nghị quyết geh Quôk hội ring bal, Cíñ phủ mờ gah lơh broă geh gơnoar rơp gờñ ai tơlik ală Nghị địñ, thông tư, sră nggal pơlam lơh jat nàng adat boh lam mhar lơh geh cồng nha, ngui ngan ngồn tàm rài kis.