Lơh jat Kơrnuat sồ 45 bơh Thủ tướng Cíñ phủ dê, tơngai bơh nam 2019 tus nam 2021, 19 anih lơh ƀău, sră ƀău tus bal neh lơh jat jơnau kờñ mờ gùng dà mblàng yal; sùm git, tam gơl pa tơngume mờ broă lơh mblàng yal jơnau tơnggit; tơnguh bơta niam jơnau tơnggit, jơnau cih, rùp hin, đơs song ngan tơl bơta rài kis bơh làng bol jơi bơtiàn kòn cau dùl êt nă cau mờ tiah kơh bơnơm, tiah uă kal ke dê; broă bơka, cih niam, loh làng, di mờ bơhiàn ờs mờng, nùs nhơm, bơta krơi is niam chài bơh làng bol kòn cau dê… Bơdìh mờ ală cồng nha loh làng tàm broă lơh mblàng yal, kung gam 2, 3 bơta kal ke, ờ niam, bè: Làng bol kòn cau geh dờp broă dong kờl uă ngan là ơm kis tàm tiah sar lơgar ngài, tiah gùng lòt gam uă kal ke, phan bơna pal geh ờ tơl, den tàng broă pà sră ƀău geh tŭ gam lơyài, ngan là tŭ kàl mìu dà kŏ dà cò, trồ tiah lơh aniai nisơna. Tơngume 2, 3 bơta sră ƀău geh tŭ ờ hềt ring bal jat bă tiah mờ ală gah; 2, 3 jơnau cih, jơnau yal… ờ hềt dipal mờ bồ tơngoh git wă, nùs nhơm mờ bơta kơp kờñ bơh làng bol kòn cau dê. Broă lơh pơgồp bal tàm broă lam lơh jat đah ală anih lơh broă dà lơgar mờ kâp hơ đơm ờ hềt nền nòn. 2, 3 tiah ngan là kâp xã, thôn ờ hềt atbồ niam sră ƀău; broă lơh sền sơ wì, jat sền ờ hềt geh lơh sùm…

Ƀộ trưởng, Củ ñiệm Ủy ƀan Zân tộk ồng Hầu A Lềnh pà git, jơnau kờñ bơcri priă ngan ngồn tiah làng bol jơi bơtiàn kòn cau dùl êt nă cau mờ tiah kơh bơnơm là uă ngan, mơya broă lam lơh gam uă kòl yan, lơh gơ rềng tus broă ai priă bơcri. Mờ broă lơh tơrlòng lài pà rơdiô ai tiah jơi bơtiàn kòn cau dùl êt nă cau, tiah kơh bơnơm, tiah uă kal ke, tiah nhàr dà lơgar in, ồng Hầu A Lềnh pà git: “Rơndap broă lơh do geh Thủ tướng Cíñ phủ kĭ kơrnuat ring bal tàm nam 2017, tus nam 2018, Thủ tướng Cíñ phủ kĭ kơrnuat jàu priă bơcri, mơya tơnơ̆ tŭ jàu priă bơcri den tus nhai 8 nam 2019 Ủy ƀan Zân tộk hơ̆ sồng lơh gơs sră nggal nàng rơ wah cau lam lơh rơndap broă, mờ tơnơ̆ tŭ rơ wah cau lơh rơndap broă ing den ờ geh cau lơh rơndap broă lơi geh tơl bơta. Bal mờ hơ̆ kung tàm tơngai hơ̆, Ủy ƀan Zân tộk gam yal mờ Quôk hội ai tơlik broă lam lơh tơrgùm jơh ală bơta bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm, tàm hơ̆ neh tơrgùm phan iat, sền ai tiah jơi bơtiàn kòn cau dùl êt nă cau in tàm rơndap broă sồ 10, kung ndrờm bè broă lơh ndai ờ hềt lam lơh. Nam 2020- 2021, Ƀộ Tài cíñ ờ jàu priă lam lơh rơndap broă lơh lơh tơrlòng do tai, den bol hi pal kơp kơrnuat jàu priă bơh broă lơh jơnau kờñ dê. Tus tŭ do, neh jàu priă bơcri bơh broă lơh jơnau kờñ dê, tàm hơ̆ geh bơnah 10, Ủy ƀan Zân tộk đơng lam ală anih lơh broă ờs mờng kờp sền mờ pơn jat tai lam lơh rơndap broă lơh do mờ priă bơcri bơh kes priă nam 2022 dê”.

Tŭ do, uă tiah jơi bơtiàn kòn cau dùl êt nă cau mờ tiah kơh bơnơm neh geh sră nggal đơng lam lam lơh broă lơh pà 2, 3 bơta sră ƀău gơ wèt Broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm, tơngai bơh nam 2021 tus nam 2030, tơngai dơ̆ 1: bơh nam 2021 tus nam 2025. Jat hơ̆, Ủy ƀan Ñân zân ală càr jàu Ƀan Zân tộk càr đơng lam, pơgồp bal mờ ală sở, mpồl, gah lơh broă geh gơ rềng, Ủy ƀan Ñân zân ală kơnhoàl rơcang lài kờp sền, pah nam lơh rơndap broă jat sền, sền sơ wì, gròi sền broă pà sră ƀău tàm ù tiah càr dê, gàr di cau, di khà mờ di tŭ tơngai jat jơnau sồr. Tơrgùm jơh mat ală cau geh pà, khà tơl bơta sră ƀău tus xã, thôn, hìu bơsram mờ ală mpồl lơh broă cíñ trị- mpồl bơtiàn, cau geh bơngă pin dờn tiah jơi bơtiàn kòn cau dùl êt nă cau mờ tiah kơh bơnơm tàm càr jat mat tơl bơta sră ƀău geh dờp tàm Kơrnuat sồ 45 bơh Thủ tướng Cíñ phủ dê. Sở Thông tin mờ Truyền thông đơng lam, pơlam sền sơ wì, jat sền, sền sơ wì broă pơndiang, pà ală sră ƀău gàr di tŭ, di cau, di khà, di anih. Mìng is Ủy ƀan Ñân zân ală kơnhoàl sơlơ pơgồp bal mờ ală mpồl cau, mpồl cíñ trị- mpồl bơtiàn: Geh kơnòl atbồ, ngui, lơh gơlik bơta niam nàng ală đoàn viên, cau tàm mpồl in ndrờm geh sền, geh iat, mờ kung ngui lơh sră nggal nàng mblàng yal, bơto pơlam tàm ală dơ̆ pơrjum bal…

Pa do, Ủy ƀan Zân tộk pơgồp bal mờ 2, 3 ƀộ, mpồl, gah broă lơh dà lơgar bal mờ Ủy ƀan Ñân zân ală càr, ƀòn dờng bơyai lơh pơrjum pờ tơlik tàm internet gùt lơgar tă pơgồp jơnau đơs tàm Jơnau rơcang cih rơndap broă “Pơn jat tai lam lơh broă lơh pà 2, 3 bơta sră ƀău mờ kơlôi sơnơng tam gơl pa broă lơh yal tơnggit jơnau dipal mờ bơta geh ngan krơi is bơh tiah jơi bơtiàn kòn cau dùl êt nă cau mờ tiah kơh bơnơm, tiah uă kal ke dê” tơngai bơh nam 2023 tus nam 2025.

Tàm pơrjum, ală kwang bàng đơs nền: Kơrnuat sồ 45 bơh Thủ tướng Cíñ phủ dê là broă lơh krơi is, pơgồp bơnah mblàng yal gùng dà, broă lơh bơh Đảng mờ Dà lơgar dê, là anih nàng làng bol in bơsram, đòm jat mờng chài bal mờ gơp, cih dờp jơnau đơs bơh làng bol dê nàng tam gơl, bơ tơl, bơt bơtàu broă lơh ai tiah jơi bơtiàn kòn cau dùl êt nă cau mờ tiah kơh bơnơm in. Tàm tơngai tus, kơp kờñ ƀộ, gah broă lơh dà lơgar, ală tiah pal tơnguh bơta niam, tam gơl broă lơh, yal ală bơta mờ làng bol kờñ mơya pal dipal mờ gùng dà, broă lơh bơh Đảng mờ Dà lơgar dê. Lơh jat ală Nghị quyết bơh Đảng, Quôk hội, Cíñ phủ dê nàng drơng làng bol in, sền sơ wì jơnau kờñ làng bol dê nàng git làng bol kờñ ñchi.

Ƀan Zân tộk ală càr kung dan Ủy ƀan Zân tộk pơn jat tai ai tơlik jơnau đơs mờ Thủ tướng Cíñ phủ lơh nền pà ờ sa priă ƀău, sră ƀău ai tiah jơi bơtiàn kòn cau dùl êt nă cau mờ tiah kơh bơnơm in tơngai bơh nam 2022 tus nam 2025; tơnguh khà bơta sră ƀău ai ală Mpồl cíñ trị- mpồl bơtiàn thôn, ƀòn, ală hìu bơsram kòn cau in; mờ kung rề ơnàng cau geh dờp sră ƀău ai anih lơh broă kòn cau ală kâp, kwang bàng drơng broă lơh kòn cau kâp xã in (ngan là ală bơta ƀău, sră ƀau kơlôi sơnơng, tơngume ờs mờng, gah broă lơh ờs mờng).

Jat mò Hoàng Thị Hạnh, Thứ trướng, Phó Củ ñiệm Ủy ƀan Zân tộk đơs, tŭ do, Ủy ƀan Zân tộk neh ai tơlik ală bơta tam gơl pa bè tơngume, broă lam lơh yal tơnggit jơnau dipal mờ bơta krơi is bơh tiah jơi bơtiàn kòn cau dùl êt nă cau mờ tiah kơh bơnơm, tiah uă kal ke dê. Bè tơngume, ală ƀău, sră ƀău jat tàm jơnau kờñ bơh ƀău he dê lơh gơlik ală tơngume cèng bơta ờs mờng ai ală cau geh dờp broă lơh dong kờl in, nàng kờñ bơsong broă yal ală jơnau tơnggit tàm rơndap rơndồl, rah rài, ờ gơtùi gròi sền, tơrmù lơyah ngan rlau jơh bơta lơh ờ gơ kờñ, pơhì pơhà kes priă. Bè broă yal tơnggit jơnau: sồr lơh App ờs mờng tàm internet tiah jơi bơtiàn kòn cau dùl êt nă cau mờ tiah kơh bơnơm nàng yal ală jơnau tơnggit niam ngan geh tơrgùm bơh ală ƀău, ală tơngume tus cau sền. Bơdìh hơ̆ tai, jơnau cih, jơnau yal tơnggit sồ tờm bơh ală ƀău, sră ƀău dê geh ngui kông nghệ sền is mờ dà yoan mờ 2, 3 dà đơs kòn cau nàng yal jơnau tơnggit di tŭ tus ală tiah lòt rê kal ke, tus tơl nă làng bol, anih atbồ bơh điện thoại ngac ngar, măi tíñ mờ ală phan iat- sền ndai: “Broă lơh mblàng yal jơnau bơh bol he dê pal jơh nùs sơlơ tơnguh rlau tai, rềp mềr rlau tai, di mờ bơhiàn bơh yau làng bol kòn cau dê, nàng cau kờñ tam pà bal. Mờ bơta tam pà bơh 2 gah do ờ cèng bơta ờ kuơ mờ pal sơn đờm bơh plai nùs. Mblàng yal ƀău đơs, ƀău rùp mờ ală anih lơh broă ndai, bơh ală anih yal tơnggit jơnau do là anih nàng lơh gơ rề di tŭ ngan rlau jơh, mờ tus mờ tiah jơi bơtiàn kòn cau dùl êt nă cau gam geh tai 2, 3 bơta hơ̆ là dà đơs, dà yoan den là pal geh bloh, mơya nàng niam rlau tai, rềp mềr rlau tai mờ nàng cau in tơrgùm rlau tai den tŭ do anih sơñio rùp Việt Nam, anih jơnau đơs Việt Nam geh ală gah pờ tơlik bơh làng bol kòn cau dê, gam wơl ƀău lip den pal geh uă broă lơh krơi is, ngan là rùp hin, dà đơs…”.

Ngui bơta bơta bơtàu tơnguh bơh gùng dà sră ƀău uă bơta dê, tơngai tus, broă lơh pà sră ƀău ai làng bol kòn cau in pal lơh ngan ngồn, bơsong bơta ƀău, sră ƀău lip lơyài tus tê cau sền, roh bơta duh hồl, bơta gơlik geh pah ngai, prap wơl tàm anih lơh broă bè neh geh tŭ gơlik geh tàm 2, 3 tiah. Ờ mìng yal tơnggit jơnau tus làng bol kòn cau, mờ broă dong kờl gam pal dong làng bol tàm lơgar mờ dunia geh tai tŭ niam git jơnau yal bè tiah làng bol jơi bơtiàn kòn cau dùl êt nă cau dùl bă sơrbac mhar, geh tơngume tờm, niam, ngan ngồn, cồng nha mblàng yal jơnau geh sơlơ tơnguh.