Tổng Ƀí thư ồng Tô Lâm đơs sùm: bơto bơsram, lơh sơnơm mwò niam chài là ală broă tờm ngan bơh dà lơgar dê, ờ mìng là jơnau kờñ mờ gam là bơta gơn kơnờm nàng bơtàu tơnguh kòn bơnus tai – do là bơta pràn kuơmàng ngan rlau jơh bơh dà lơgar dê. Tổng Ƀí thư đơs là, ală broă lơh jơnau kờñ dà lơgar tàm tơngai lài gam rah rài, gơ tàm rơndap rơndồl, priă jền kung rah rài ờ tơrgùm bal, ờ hềt gơtùi lơh loh jơnau kờñ tờm mờ ờ hềt git loh anih lơh broă pal kong kơnòl tờm. Gơ wèt mờ lơh sơnơm, Tổng Ƀí thư sồr tam gơl broă tờm gơ gơs sền gàr pràn kơldang să jan bơh sơn rờp mờ rơcang gàr lài, bơsong jơh ală bơta bè tiah ơm kis, dà sàng, kloh niam ờdo ờdă phan sa – ală bơta tờm ngan lơh gơlik kòp jê. Dilah ờ gơtùi bơsong tơn bơh chờm, bulah bơcri priă lơh tai git nđờ nơm hìu sơnơm kung ờ gơtùi drơng tơl jơnau sồr sơl: “Gơ wèt mờ lơh sơnơm, kuơmàng là sền gàr pràn kơldang să jan bơh chờm, pal tam gơl gơs rơcang gàr lài. Ai tŭ do gam lơh uă tàm broă kham sơm kòp, gơ lơh bè mìng crùh ồs sa lơm gời – tài rơcang gàr lài ờ pràn den tàng kòp gơbàn uă. Pal git nền tơl broă mùl màl, bơta lơi là bơta ờ niam. 5 nam tai, bol he gơtùi tơn jơh halà ờ. Pal git loh bè hơ̆. Kòp jòr bơsiă gơlik mhàm tàm dunia neh jơh bơh jŏ, lời gơ bơtờp tềng lơi kung hoàc ngan priă. As sồt klờm bè lơi, gơ bơtờp bè lơi. Jat añ den broă lơh dà lơgar pal lơh tàm ală broă mùl màl, ală jơnau kờñ bè hơ̆”. 

Bè bơto bơsram, Tổng Ƀí thư đơs sùm kờñ pal bơcri priă di broă tờm tàm phan bơna, mpồl cau lơh broă, mpồl cau pơgru, jơnau bơto bơsram, rơndap tap sèng wơl ală hìu bơsram, kờp dŭ khà cau pơgru sa priă nhai dà lơgar jat khà kơnòm bơsram, tơnguh bơta niam cau pơgru, ngan là pràn jak đơs dà Mỹ mờ pràn jak bơto ală môn mờ dà Mỹ. Tổng Ƀí thư đơs nền, tơl broă lơh pal wèt tàm jơnau kờñ dut ndơl hơ̆ là làng bol geh dờp kuơ ngan ngồn, geh bơsram sră, geh sền gàr pràn kơldang să jan, geh kis niam ờdo ờdă mờ niam chài kòn bơnus. Mìng tŭ hơ̆, den ală broă lơh bơtàu tơnguh hơ̆ sồng ngan ngồn geh kuơ.

Ai jơnau đơs bè jơnau lơh nền bơcri priă Broă lơh jơnau kờñ dà lơgar lơh pa, tơnguh cồng nha bơto bơsram tơngai bơh nam 2026 tus nam 2035, Củ tịc Quôk hội ồng Trần Thanh Mẫn đơs là, tàm tơngai tŭ do, kong bơta gơ rềng pràn ngan bơh dơ̆ tam gơl lơh mờ măi mok 4.0 dê, bơta gơguh pràn ngan bơh bồ tơngoh jak kòn bơnus lơh gơs AI mờ jơnau kờñ bè cau lơh broă geh bơta niam uă. Den tàng, broă lơh ờ mìng ơm wơl tàm broă bơto niam, bơsram jak jat broă lơh ờs mờng bơh yau mờ gam pal là dùl dơ̆ tam gơl bè bồ tơngoh kơlôi sơnơng mwò phan bơna, brơ lơh nàng bơto bơtê mờ bơsram in bơtàu tơnguh: “Broă lơh kờñ pal geh broă rơndap lơh jŏ tơngai, gơtùi kờp dŭ lài gùng dà bơtàu tơnguh bơh mpồl bơtiàn, drà lơh broă tàm tơnơ̆ do dê. Broă lơh jơnau kờñ dà lơgar den kờñ pal bơsong niam bơta tờm jal mhar cèng bơta tam gơl pràn bơh gah bơto bơsram dê. Jat añ den tơrgùm tàm tam gơl sồ, bơto bơtê broă lơh geh bơta niam uă halà bơto bơsram tiah sar lơgar ngài nàng geh broă lơh bơcri priă dipal. Dơ̆ 2 là pal gàr priă jền, gùng dà broă lơh priă jền atbồ, sền sơ wì, jat sền. Priă ờ uă mơya lơh bè lơi nàng sră pơ àr mhar, dipal, lơh bè lơi tàm tŭ tơngai lam lơh ờ geh hoàc huơr, ờ gơlik geh broă ờ niam”.

Jat Củ tịc Quôk hội đơs, tơnơ̆ tŭ Quôk hội ai tơlik broă lơh kờñ pal rơcang ală sră nggal pơlam lơh jat, jàu kâp loh làng tàm broă lam lơh jat mờ ai priă bơcri di tŭ. Do là broă kuơmàng ngan rlau jơh tàm mùl màl. Bơdìh hơ̆ tai kờñ pal sùm sền sơ wì, jat sền. Củ tịc Quôk hội đơs sùm, do là 2 broă lơh gơ rềng tơn tus làng bol, dilah lam lơh niam den làng bol rơp geh 4 bal hơ̆ là làng bol git, làng bol bơyai, làng bol sền sơ wì mờ làng bol dờp kuơ.