-Ơ mò, tơnơ̆ 5 nam lam lơh Rơndap broă lơh 8, mò gơtùi đơs cồng nha lơh gơtùi mờ ală mờng chài ai geh tàm tŭ lam lơh rơndap broă lơh là ñchi taih?

Mò Nguyễn Thị Minh Hương: Cồng nha bơh Rơndap broă lơh 8 dê geh 9 broă jàu den neh geh 4 broă jàu lơh gơtùi mờ sơrlèt rlau broă jàu uă ngan, geh tŭ geh ală uă jàu lơh geh rlau 200%. Gam 5 broă jàu gam wơl, bol hi kờp dŭ rơp lơh geh tàm lồi nam 2025 do, hơ̆ là jơh tơngai dơ̆ 1 rơp lơh gơtùi. Mìng gam 1 broă jàu kal ke nàng gơtùi lơh. Bơta do ai gŏ cồng nha bơh rơndap broă lơh dê, mờ uă ngan ală broă jàu ndrờm lơh gơtùi mờ sơrlèt rlau broă jàu.

Ală broă jàu lơh geh uă sùm gơ jat bal mờ broă lơh mpồl bơtiàn, pơn yơu bè broă lơh “Anih pin dờn” halà ală mpồl mblàng yal jơnau mpồl bơtiàn. Bơta do ai tơnggŏ bơta lơh jat jơh nùs nhơm bơh làng bol dê, bơta neh dong ală broă lơh bơh rơndap broă lơh dê lơh geh cồng nha niam rlau. Dùl tàm ală mờng chài lơh gơs cồng nha tàm tơngai dơ̆ 1 bơh rơndap broă lơh dê là bơta tus bal bơh ală kâp gơnoar atbồ dê mờ kuơmàng là bơh làng bol dê. Bơh bơta tus bal làng bol dê neh dong ală broă lơh bơh rơndap broă dê di mờ jơnau kờñ bal mờ bơta kơp kờñ khi dê, bơh hơ̆ kung dong bol hi pơn jat tai tam gơl ală broă lơh gơ in dipal rlau”.

-Tàm tơngai bơh nam 2026 tus nam 2030 bơh Broă lơh jơnau kờñ dà lơgar dê, Rơndap broă lơh 8 rơndap geh ală bơta tam gơl mờ broă lam lơh lài bè lơi, ơ mò?

Mò Nguyễn Thị Minh Hương: Tŭ do, bơceh lơh bơh Broă lơh jơnau kờñ dà lơgar dê kung rơp geh ală tam gơl sơl. Mơya bulah bè lơi, Mpồl tam klac cau ùr Việt Nam kung đal git là,broă pơgồp bal ùr klau pal là broă geh lơh sùm tàm jơh ală broă lơh bơh Broă lơh jơnau kờñ dà lơgar bè bơtàu tơnguh lơh sa mpồl bơtiàn tiah jơi bơtiàn dồ êt nă cau mờ tiah kơh bơnơm dê. Bơta do ndrờm mờ broă, bilah geh Rơndap broă lơh 8 halà ờ geh Rơndap broă lơh sồ 8, ală broă lơh kung rơp kờñ geh pơgồp bal bơta ùr klau.

Pơn yơu gơ wèt mờ ală broă lơh bơtàu tơnguh lơh sa mpồl bơtiàn, kung gam pal geh ală broă lơh dong kờl is ồn ai cau ùr in, bè ală mpồl lơh broă bal halà mpồl lơh sa kă bro bơh cau ùr lơh tờm. Halà gơ wèt mờ ală broă gơ rềng tus sền gàr pràn kơldang să jan pal geh ală tơngume is ồn nàng dong kờl cau ùr in bè pràn kơldang deh dùh, ròng siam cau mè mờ kơnòm dềt. Đơs bal, bol hi kung gam rơp sồr pơgồp bal bơta ùr klau tàm jơh ală broă lơh bơh rơndap broă lơh dê mờ tơnguh pràn jak ai cau ùr in kung bè ală kwang bàng ƀòn lơgar in.

Ơi, dan ưn ngài mò uă ngan!