Tàm xã Snay Anhchit, kơnhoàl Chum Kiri, càr Kampot, lơgar Campuchia, làng bol kis uă ngan kơnờm tàm broă lơh sa suơn sre, ơm ngài mờ tiah tờm den rài kis phan bơna, nùs nhơm mờ ală bơta sền gròi pràn kơl dang să jan gam bơrngơl gơla mờ gơtìp uă ngan  kal ke, siơ̆u siar. Mò Chanol sền gŏ mpồl ling Việt Nam tus kham kòp, pà sơnơm ờ sa priă ai mò mờ làng bol in tàm tiah do, mò ngoh rngăc ngan, đơs: “Añ kòp uă ngan mơya ờ geh priă jền nàng sơm kòp, tŭ do kơno geh mpồl ƀák sĩ bơh Gah đơng lam mpồl ling klàng càr Kiên Giang tus kham kòp mờ pà sơnơm ờ sa priă, pà phan ai làng bol tàm do in, añ chờ hờp ngan. Añ ưn ngài uă ngan.

Tàm tŭ lơh kơnòl broă, mpồl lơh broă tìp uă ngan kal ke tài bơh trồ tiah, rơndeh rơndồ ntrờn lòt, krơi is jơnau đơs, mơya tềng đap ală bơta kal ke bòl glar bơh làng bol lơgar gơ̆p bơyô dê, tơl nă cau tàm mpồl sùm tàm pơndờm pơnđiang bal bơsong bơta kal ke nàng lơh sir niam ngan kơnòl broă. Ƀák sĩ Trần Thu Quỳnh, lơh broă tàm Hìu sơnơm dờng càr Kiên Giang, đơs: Să tờm añ gơ lơh kơlôi sơnơng, kwi kwơ ngan tài bơh dơ̆ sơnrờp să tờm añ lòt kham kòp tàm lơgar gơ̆p bơyô dê. Bulah gam uă kal ke tàm broă ntrờn lòt, sơnơm tơm ƀa kung bè phan bơna măy mok gah lơh sơnơm dê, mơya bơh dơ̆ lòt do añ gŏ ală bơta lơh sơnơm làng bol tàm tiah do dê gam gơtìp uă ngan kal ke, să tờm añ là ƀák sĩ bal mờ ală oh mi lơh sơnơm tàm mpồl kung pơnđơl pràn lơh ngan jơh bơta pràn he dê nàng dong kờl bè sơnơm tơm ba ai làng bol tiah do in, kung bè pơgồp bơnah tơrmù ƀà bơta kơn jơ̆ ai gah lơh sơnơm tàm tiah do in.

Thiếu tá Hoàng Trọng Thiên, Kwang atbồ Hìu sơnơm ling klàng gơwèt Gah đơng lam mpồl ling klàng càr Kiên Giang, pà gĭt: Đơs bal là ală bơta tŭ tơngai rcang kung gam kwi kwơ ngan sơl, ờ hềt lơh niam mơya broă lơh den oh mi kung pơnđơl pràn lơh ngan mờ tŭ geh bơta dong kờl jơh nùs bơh mpồl lơh broă lơgar bơyô kung bè làng bol tàm tiah do, mpồl ling lơh pôs đồng dê, dơ̆ lòt kham sơm kòp geh cồng nha niam bơnĕ ngan.

Tàm do, mpồl y, ƀák sĩ Gah đơng lam mpồl ling klàng càr Kiên Giang neh kham mờ pà rlau 300 bơnah sơnơm ờ sa priă ai kwang bàng mờ làng bol tàm tiah do in, tơl bơnah sơnơm kờp priă 100 rơbô đong. Mờ tàm tơl tiah tus kham kòp mờ pà sơnơm, mpồl kung jàu pà 60 bơnah phan ai ală hìu bơnhă geh rài kis kal ke in, tơl bơnah phan pà kờp priă 500 rơbô đong. Broă lơh do neh lời wơl uă ngan nùs nhơm niam bơnĕ gơwèt mờ gơnoar at bồ ală tiah mờ làng bol lơgar gơ̆p bơyô dê bè rùp hin cau ling klàng Việt Nam dê tàm rài pa. Mò Sui Kết, làng bol kơnhoàl Chum Kiri, càr Kampot pà gĭt: Añ chờ hờp ngan geh mpồl y ƀák sĩ tus pà phan mờ kham kòp, pà sơnơm ờ sa priă, ờ geh bơta lơi tàm pơndrờm geh ờ, dilah geh dơ̆ tơnơ̆ den tus dong kờl bol añ tai, tài bơh tàm tơngai do, làng bol bol añ gam gơtìp uă ngan kal ke, bulah phan pà ết mơya neh dong bol añ geh phan ngui niam ngan tàm tŭ kal ke do.

Bơh nam 2015 tus tŭ do, Gah đơng lam mpồl ling klàng càr Kiên Giang neh lam 6 mpồl kham kòp mờ pà rlau 3 rơbô 500 bơnah sơnơm ai làng bol tàm uă xã, kơnhoàl gam gơtìp uă kal ke tàm Campuchia in mờ kờp priă rlau 400 tơlak đong. Tơl jơnau lùp còp, tơl bơnah sơnơm, tơl phan pà geh jàu hơ̆ ngan là ală bơta nùs nhơm bơt bơtàu tai bơta tam klăc lơh bơyô đah ling klàng mờ làng bol 2 lơgar dê. Đại tá Tếp Âm, Đơng lam phó tiểu khu Ling klàng Kampot pà gĭt:  “Geh bơta jàu bơh kấp hơđang ai añ in pơgồp bal mờ mpồl y, ƀák sĩ dong kờl is càr Kiên Giang tus kham, pà sơnơm  mờ pà phan. Bơh broă lơh pơgồp bal mờ mpồl ƀák sĩ càr dê, Mpồl ờs drơng broă K92, mpồl neh lòt kham, pà sơnơm tàm ù tiah xã Snay Anhchit in. Añ jờng rơ, chờ hờp mờ ưn ngài mpồl y ƀák sĩ càr Kiên Giang uă ngan.

Broă lam mpồl y, ƀák sĩ tus kham kòp mờ pà sơnơm ờ sa priă ai làng bol xã Snay Anhchit in là broă lơh lơh geh kwơ ngan rlau jơh bơh mpồl ling phàu crong càr Kiên Giang dê, pơgồp bơnah bal mờ gơnoar atbồ, ală tiah lơgar gơ̆p bơyô sền gròi rài kis làng bol in. Bơh hơ̆, kung dong nàng mpồl K92 tŭ do gam jòi tơrgùm, rồ tờ ƀồc ntìng cau ling chơ̆t màng ling dong kờl is mờ kwang bàng jak chài Việt Nam chơ̆t phi să tàm ù tiah tam lơh lơgar Campuchia dê lơh sir niam ngan kơnòl broă neh jàu, jun cau ling bal neh chơ̆t phi să rê wơl mờ ù mè dê. Do kung là dơ̆ nàng sơlơ lơh niam rlau tai bơta tam klăc đềt mềr bal, sền gàr kơ̆ kơljap mờ sơlơ tơnguh rlau tai bơta gĭt gơ̆p tam klăc lơh bơyô bal đah 2 càr Kiên Giang mờ Kampot đơs is, đah dà lơgar mờ làng bol Việt Nam mờ Campuchia đơs bal.

Đại tá Cao Minh Tâm, Phó Cíñ ủy Gah đơng lam mpồl ling klàng càr Kiên Giang pà gĭt tai: Broă lam pà sơnơm mờ pà phan ai làng bol tàm càr Kampot bơh Gah đơng lam mpồl ling klàng càr bal mờ Hìu sơnơm dờng càr Kiên Giang dê mờ jơnau kờñ lơh geh ală bơta ƀuơn ngan rlau jơh nàng sền gròi rài kis làng bol tàm ù tiah càr Kampot đơs bal mờ kơnhoàl Chum Kiri đơs is nàng sơlơ lơh niam rlau tai bơta tam klăc lơh bơyô bal đah 2 jơi bơtiàn Việt Nam mờ Campuchia kung bè đah càr Kiên Giang mờ càr Kampot.