Pà kâp atbồ geh sền là bơta tờm ngan nàng tơnguh cồng nha lơh jat adat boh lam tàm gah broă lơh sa suơn sre, is ồn là tàm ală càr geh broă lơh sa dờng. Cau ala mat ồng Phạm Văn Hòa, mpồl càr Đồng Tháp đơs là, broă jàu gơnoar ai ƀòn lơgar in tàm atbồ lơh gơlik phan siam ròng phan in là pal geh, dong tơrmù ƀà sră pơ àr mờ tơnguh bơta kong kơnòl: “Añ sồr pà kâp tơn uă ai ƀòn lơgar in bè broă ai wơl, lơh sră cơng tàng geh tơl bơta nàng lơh gơlik phan siam ròng phan, ờ duh pal là Ƀộ lơh. Jàu ai Củ tịc Anih duh broă làng bol kâp càr in geh gơnoar lơh sră ai gơnoar, ai wơl sră ai gơnoar, dilah ƀòn lơgar geh tơl bơta den ƀòn lơgar pal kong kơnòl tờm”.

Bulah bè hơ̆, bal mờ broă jàu gơnoar, uă cau ala mat đơs sùm kờñ pal sơlơ tơnguh tai pràn jak mờ cau lơh broă tàm kâp ƀòn lơgar, ngan là tàm mpồl lơh sơnơm phan ròng ƀòn lơgar, tiah gam gơtìp ờ tơl tơnơ̆ tŭ rơndap tap sèng, tơrmù mpồl cau lơh broă sră pơ àr gơnoar atbồ. Cau ala mat mò Chu Thị Hồng Thái, mpồl càr Lạng Sơn đơs loh bơta ờ niam tàm ală mpồl lơh sơnơm phan ròng ƀòn lơgar tŭ uă sàh, kơnhoàl ờ gam kwang bàng lơh broă mờng chài tai, tàm tŭ jơnau rơcang cih den jàu tai uă kơnòl rơcang lài kơryan kòp bơtờp rê kâp sàh in.

Mò sồr kờñ pal cih loh làng mờ sồr pal jat bè broă rơndap ai mpồl cau lơh sơnơm phan ròng tàm 2, 3 ƀòn lơgar, nàng kờñ gàr cồng nha rơcang kơryan kòp bơtờp tàm ròng phan: “Gơ wèt mờ adat lơh sơnơm phan ròng den añ geh jơnau đơs là anih cih adat boh lam mờ anih sền sơ wì kung kơlôi sơnơng nàng ai tơlik jơnau cih sồr 2, 3 ƀòn lơgar pal geh cau lơh sơnơm phan ròng. Gơ wèt mờ ală jơnau cih tàm jơnau rơcang cih adat boh lam do den añ gŏ là uă ngan kơnòl bơh broă lơh sơnơm phan ròng kâp kơnhoàl dê là ntrờn rê kâp sàh jơh mờ lài do den geh ci kụk lơh sơnơm phan ròng, anih lơh sơnơm phan ròng tàm kâp kơnhoàl tai. Tŭ do ờ gam tai ală mpồl do den kâp sàh cau lơi lơh broă hơ̆ taih”.

Mùl màl ai gŏ, ală mpồl lơh sơnơm phan ròng gơtùi pơn yơu là “tồr, là mat, là 2 đah jơng” bơh gah ròng phan dê, lơh sơnơm phan ròng dilah ờ tơl den rơp lơh gơlik bơta ha pah tàm broă gròi sền kòp bơtờp. Den tàng, broă tam pà kâp pal gơ jat bal mờ pơlam ngan ngồn bè cau lơh broă, jơnau sồr mờ kơnòl bơh gơnoar atbồ ƀòn lơgar dê. Bal mờ hơ̆, cau ala mat mò Nguyễn Thị Sửu, mpồl ƀòn dờng Huế đơs là: Pà kâp uă ai ƀòn lơgar in kờñ pal pơgồp bal mờ mpồl đơng lam pơgồp bal ring bal nàng gàr bơta ndrờm bal mờ pleh gơ tàm rơndap rơndồl gơnăp gơnoar, ngan là tàm gah tam phan mờ lơh broă sa suơn sre hữu kơ: “Tŭ tơrgùm dùl 2 Ƀộ Broă lơh sa suơn sre mờ Tiah ơm kis, bol he kờñ pal tơrgùm dùl anih lơh broă đơng lam pơgồp bal nàng atbồ gơ lòt sùm bơh dà lơgar tus kâp hơ đơm. Añ sồr crơng gơs Mpồl đơng lam pơgồp bal dà lơgar bè Broă lơh sa suơn sre Hữu kơ mờ Siñ họk, lơh mpồl lam lài sồr lơh ring bal, pleh bơta tơl ƀòn lơgar lơh dùl gùng, lơh ờ ndrờm bal mờ cồng nha lơh geh lơyah”.

Ală jơnau đơs bơh cau ala mat dê ai gŏ bơta ndrờm bal: Pà kâp ờ mìng là jàu gơnoar, mờ gam là jàu gơnoar gơ jat bal mờ đơng lam pơgồp bal, gròi sền mờ kong kơnòl. Tŭ ƀòn lơgar geh sơlơ tơnguh tai gơnoar atbồ, gơ jat bal pal là pràn jak lơh ngan ngồn, mpồl anih yal jơnau tơnggit tơrgùm dùl mờ mpồl jat sền loh làng nàng gàr lơh geh cồng nha tàm ngan ngồn.