Cribơyai tàm hìu pơrjum bè bàr pe tơngume gam geh jơnau đơs krơi is bơh jơnau rơcăng cih Adăt Sền gàr adăt boh lam cau ờ hềt dờng in, ală cau ala măt ring bal uă ngan tŭ jơnau rơcăng cih Adăt cih bơto bơtê tàm Hìu bơsram bơto bơtê sền gàr là broă lơh bơsong lơh glài tam gơl gùng mờ cih loh tơl nă cau geh jăt ngui broă lơh bơsong do. Ồng Phạm Văn Hoà, Cau ala măt gơ wèt Mpồl Cau ala măt Quôk hội càr Đồng Tháp, đơs: Broă lơh bơsong bơto bơtê hìu bơsram bơto bơtê sền gàr dipal ngan tàm bơta geh ngan bơh dà lơgar he dê tŭ do, lơh bè lơi gơ wèt mờ ală jơnau dilah ală oh lơh tìs kơn jơ̆ halà kơn jơ̆ ngan den ờ gơtùi gơtìp krơ̆ jàm. Tài bơh dilah gơtìp krơ̆ jàm tàm tơngai anih lơh broă lùp khàu, yal yă cah rña den digơlan bơh 9 tus 12 nhai, tơnơ̆ hơ̆ jun lòt den añ sơnơng là ală oh kung gơtìp jàm ing rao, den tàng bơh chờm dilah ơm tàm bơnah jăt ngui ai gơnoar tam gơl gùng den añ sơnơng là pal tam gơl gùng.

Ală cau ala măt sồr pơn jăt tai kờp sền wơl dồ bă nền nòn ală jơnau cih loh làng bè lơh glài jăt ngui gơ wèt mờ cau ờ hềt dờng gàr geh lơh gơs adăt boh lam geh sồr gàr geh bơta pơhìn, rơcăng lài kơryan cau lơh tìs, mơkung yờ tơngguh bơta niam chài kòn bơnus, wèt tus bơta niam tàm bơsong cau ờ hềt dờng lơh tìs. Mơkung pal geh broă dong kờl nàng cau ờ hềt dờng in gĭt wă bè broă lơh tìs, geh bơta gơjrañ sang glài kah rơngal wơl, lơh is, tam gơl, bơsong tìs ờ di. Ồng Nguyễn Tạo, Cau ala măt gơ wèt Mpồl Cau ala măt Quôk hội càr Lâm Đồng đơs wih đơs wơl: Bơta pal jăt sùm sùm bơh jơnau rơcăng cih dơ̆ do dê adăt nàng kờñ jơnau kờñ bơto bơtê, dong kờl ală cau ờ hềt dờng lơh tìs, lơh tam gơl wơl jơnau neh rlau lơh tìs gơgơs là làng bol geh kwơ ai mpồl bơtiàn in. Bulah bè hơ̆, Bơta 40 jơnau rơcăng cih ờ hềt đơs tus broă cau ờ hềt dờng gĭt wă bè broă lơh tìs bơh he dê geh bơta gơjrañ sang glài kah rơngal wơl, lơh is, tam gơl, bơsong ală jơnau neh rlau lơh tìs bơh he dê. Dilah jăt ngui ală broă lơh bơsong lơh glài tam gơl gùng gơ wèt mờ cau ờ hềt dờng mờ ờ lơh jăt jơnau sồr pal geh mờ tơl pal yal bơh nti den rơ̆p lơh ai khi in pơn jăt tai gơ tơmŭt tàm gùng lơh tìs. Bè hơ̆, bol he rơ̆p ờ lơh geh jơnau kờñ bơh adăt do dê là nàng kờñ bơto bơtê khi gơgơs là kòn bơnus geh kwơ ai mpồl bơtiàn in.

Uă ngan jơnau đơs dùl nùs bal mờ jơnau rơcăng cih Adăt pal cah is dơ̆ lơh tìs geh cau ờ hềt dờng lơh tìs nàng bơsong. Bulah bè hơ̆, ồng Lê Tất Hiếu, Cau ala măt gơ wèt Mpồl Cau ala măt Quôk hội càr Vĩnh Phúc, sơñio là: cau lơh tìs là cau ờ hềt dờng gam pơn jăt tai gơguh tai, uă dơ̆ lơh tìs cau ờ hềt dờng ăt gơnoar broă cau tờm lam lơh, cau tờm lam bồ…Den tàng bè hơ̆, tŭ cah rña pal geh jơnau khài, tàm lùp bơh jơh ală cau gơtìp yă dê. Ồng Lê Tất Hiếu, đơs: Dilah cah is den jơh bal ală cau gơtìp yă là cau ờ hềt dờng mờ cau gơtìp yă là cau tàm mpồl bal ndrờm pal geh măt bal tàm jơh bal bàr dơ̆ cah rña. Is ồn rlau tai, tŭ dơ̆ lơh tìs pal bơsong broă gơrềng tus broă làng bol tàm dơ̆ lơh tìs lơh glài kŭp jàm. Pơnyơu bè broă tam pìt tam phà bè tơm wơl hoàc hươr den rơ̆p bơsong tàm dơ̆ cah rña lơi taih. Dơ̆ cah rña cau ờ hềt dờng halà dơ̆ cah rña cau neh dờng taih. Bơta 40 cih gơjăt bơta dipal mờ lơh, dilah tơl bơta cah is den pal cah is dilah is ồn ờ gơtùi cah is den ai gơnoar gơjăt tàm bơta dipal mờ lơh mờ ờ cah is dơ̆ lơh tìs.

Ală cau ala măt sồr khà tơrgùm jơh bơta lơh glài bal sồr tam gơl wơl jăt gùng: ờ gŏ uă rlau ir 12 nam jàm gơ wèt mờ cau bơh tơl 14 sơnam tus hơđơm 16 sơnam mờ ờ gŏ di uă rlau ir 18 nam jàm gơ wèt cau bơh tơl 16 sơnam tus hơđơm 18 sơnam mờ jăt ngui ring bal gơ wèt mờ tơl cau lơh tìs. Cih bè hơ̆ nàng gơ in gàr geh bơta tam pà geh broă dong kờl lơh glài đah cau ờ hềt dờng lơh 01 tìs mờ cau ờ hềt dờng lơh uă tìs; gơ kung ờ gŏ tơngguh kơn jơ̆ kơnòl lơh glài pơndrờm mờ jơnau cih bơh Adăt lơh tìs lơh glài jàm dê; mờ gơ kung ờ lơh gơlik ală jơnau gơ kal ke pa tàm tơrgùm jơh bơta lơh glài.