Tàm dơ̆ lơh broă, tơnơ̆ tŭ iat ala mat Cíñ phủ mờ Mpồl kwang bàng jat sền yal Jơnau yal dùl êt bè broă lam lơh jat mờ Jơnau yal dùl êt bè sền sơ wì bơh sơn rờp bơh Mpồl kwang bàng jat sền dê bè Nghị quyết sồ 88 mờ Nghị quyết sồ 51 bơh Quôk hội dê bè tam gơl pa tơngume bơto bơsram, sră măi 3 kâp, ală kwang bàng tàm Mpồl kwang bàng jat sền mờ kwang ala mat neh cribơyai bè ală tơngume tàm 2 jơnau yal. Tàm hơ̆, geh ală broă broă, bè: sền sơ wì Broă lơh tơrgùm jơh ală bơta mờ ală tơngume môn bơsram; Bơta tam gơl pa broă lơh bơto bơtê, broă lơh sền sơ wì cồng nha bơto bơsram; Broă cih, sền sơ wì, ring bal, lip mờ giă sră măi; Bơta geh ngan mờ jơnau đơs, jơnau dan gơ wèt mờ broă mpồl cau pơgru 3 kâp; Phan bơna bơto bơsram drơng broă lam lơh jat tơngume bơto bơsram pa.

Đơs tàm dơ̆ lơh broă, Phó Củ tịc Duh broă sùm Quôk hội ồng Trần Thanh Mẫn đơs nền, ală jơnau đơs neh đơs song dơpă, jơh nùs mờ geh kơnòl uă. Mpồl kwang bàng jat sền cih dờp wil tơl mờ rơp kơlôi sơnơng, lơh sir Jơnau rơcang cih jơnau yal cồng nha jat sền mờ jơnau rơcang cih Nghị quyết nàng Ủy ƀan Thường vụ Quôk hội in ngan ngồn lam lơh jat sền mìng dùl tơngume tàm pơrjum nhai 8 tus.

Gơ wèt mờ jơnau đơs bơh Mpồl kwang bàng jat sền mờ ala mat ală anih lơh broă, ƀộ, gah broă lơh cribơyai tàm dơ̆ lơh broă, sồr Cíñ phủ kơlôi sơnơng, cih dờp wil tơl nàng lơh sir jơnau yal mblàng lơh loh, bơ tơl pơyua Mpồl kwang bàng jat sền in. Phó Củ tịc Duh broă sùm Quôk hội ồng Trần Thanh Mẫn sồr Cíñ phủ pal sền gròi tus 5 tơngume, kơnòl broă tờm, tàm hơ̆ geh bơta bè mpồl cau pơgru: “Bè mpồl cau pơgru, do là bơta tờm ngan nàng gàr bơta lơh geh cồng nha bơh broă lam lơh jat tơngume bơto bơsram 3 kâp pa. Sồr Cíñ phủ đơng lam ală ƀộ geh gơ rềng kờp sền, sền sơ wì wil tơl bè rơndap tap sèng, bơta geh ngan, jơnau kờñ tơnguh mpồl cau pơgru tàm tơngai tus mờ geh broă lơh dipal, di tŭ nàng bơsong bơta ờ tơl cau pơgru mờ khà cau sac rơ wah lơh pơgru; sơlơ bơto bơtê, pơlam cau pơgru lơh jat jơnau sồr bơh tơngume bơto bơsram 3 kâp nam 2018”.

Phó Củ tịc Duh broă sùm Quôk hội ồng Trần Thanh Mẫn kung sồr Cíñ phủ sền gròi, đơng lam kờp sền, sền sơ wì bơta geh ngan mờ đơs lài jơnau kờn bè phan bơna, măi mok bơto bơsram; geh broă lơh dong ală tiah tă bơsong kal ke, kòl yan tàm broă lam lơh jat. Pơn jat tai ai lài, lam lơh nền nòn broă rơndap ai kes priă ai gah bơto bơtê mờ bơsram in jat jơnau sồr; mờ kung sơlơ tơnguh rlau tai bơta lùp sền, sền sơ wì broă lam lơh tam gơl pa tơngume, sră măi.

Lài hơ̆, tàm nhai 4 nam 2023, Mpồl kwang bàng jat sền bơh Ủy ƀan Thường vụ Quôk hội dê kung neh lơh broă mờ Ƀộ Giáo zụk mờ Đào tạo bè broă lam lơh jat Nghị quyết sồ 88 mờ Nghị quyết sồ 51 bơh Quôk hội dê bè tam gơl pa tơngume bơto bơsram, sră măi 3 kâp. Mpồl kwang bàng jat sền gŏ là, gam 2, 3 bơta pal lơh loh, tàm hơ̆ geh broă gàr tơl priă jền ai broă lam lơh broă lơh in kung bè bơta gơtùi lơh geh cồng nha ngan ngồn bơh jơnau sồr hòi jà jơh gùt mpồl bơtiàn tus bal tàm broă lơh bơto bơsram. Mò Vũ Thị Lưu Mai, Phó Kwang atbồ Ủy ƀan Priă jền- Kes priă bơh Quôk hội dê geh jơnau đơs: “Tàm uă gah den bol hi gơtùi hòi jà priă jền tă pơgồp bơh gùt mpồl bơtiàn, mơya gơ wèt mờ gah bơto bơsram den broă hòi jà ală gah lơh sa krơi is tus bal den kung pal kong mờ uă ngan kal ke. Bè hơ̆ den tàng, dilah bol he lơh jat jơnau sồr hơ̆ là hòi jà priă jền tă pơgồp bơh mpồl bơtiàn ƀuơn halà kal ke bè lơi den kung sồr Cíñ phủ pal hơ jơnau lùp bè bơta gơtùi lơh geh cồng nha tàm broă hòi jà priă jền tă pơgồp bơh mpồl bơtiàn dê gơ wèt mờ broă lam lơh jat 2 Nghị quyết bơh Quôk hội dê”.

Tàm nhai 6 pa do, Củ tịc Quôk hội ồng Vương Đình Huệ neh đơng lam dơ̆ lơh broă bơh Kwang đơng lam bồ Quôk hội mờ Mpồl kwang bàng jat sền bơh Ủy ƀan Thường vụ Quôk hội dê bè “Broă lơh jat Nghị quyết sồ 88 mờ Nghị quyết sồ 51 bơh Quôk hội dê bè tam gơl pa tơngume bơto bơsram, sră măi 3 kâp”. Do là dùl tàm 4 tơngume mìng dùl lơm jat sền bơh Quôk hội, Ủy ƀan Thường vụ Quôk hội dê tàm nam 2023. Củ tịc Quôk hội đơs niam Mpồl kwang bàng jat sền neh lam lơh jat jơh nùs ngan ală Nghị quyết bơh Quôk hội mờ bơh Ủy ƀan Thường vụ Quôk hội dê, lơh jơh nùs ngan mờ bơta đơng lam nền nòn, geh kơnòl mờ sră nggal bơh Kwang atbồ mpồl kwang bàng jat sền, Phó Củ tịc Duh broă sùm Quôk hội ồng Trần Thanh Mẫn dê.