Đơs tơn jơh pơrjum gùt lơgar lam lơh jat adat boh lam, Nghị quyết bơh Quôk hội khoă XV dê, Củ tịc Quôk hội ồng Vương Đình Huệ sồr Cíñ phủ lơh jăt niam rlau tai gơnoar broă, kơnòl lam lơh jat Sơnua boh lam, adat boh lam, nghị quyết bơh Quôk hội dê; di tŭ pơlam, geh broă lơh bơsong geh cồng nha ală broă gam geh kòl yan, ờ niam, gàr niam lơh jat jơnau sồr bơh bơta geh ngan dê mờ di jơnau cih bơh adat boh lam, nghị quyết dê. Sơlơ tơnguh rlau tai, tam gơl pa broă lơh mblàng yal, bơto bơtê adat boh lam dipal mờ tơl mpồl cau, tơngume, ù tiah, ngan là gơ wèt mờ tiah làng bol jơi bơtiàn dùl êt nă cau mờ tiah kơh bơnơm.

Củ tịc Quôk hội sồr, tơrgùm lơh sir broă ai tơlik, gàr bơta iam 83 sră nggal cih mùl màl broă lơh jat ală adat boh lam, nghị quyết pơlam lơh jat jơnau cih adat boh lam bơh Quôk hội khoă XV dê. Gơ wèt mờ 8 adat boh lam geh lơh jat tàm nam 2024, khà sră nggal cih mùl màl kờp dŭ geh ai tơlik là uă ngan, gơguh tus 68 sră nggal. Bè hơ̆ den tàng, Củ tịc Quôk hội sồr: “Sồr Cíñ phủ geh broă rơndap lơh ngan ngồn, rơndap tap sèng broă lơi lơh lài dipal, bơcri priă jền nàng lơh, ai tơlik wil tơl, gàr bơta niam ală sră nggal, gàr geh cồng nha mờ tŭ tơngai lơh jat adat boh lam, nghị quyết dê, ngan là mờ adat geh ai lơh jat bơh ngai 01/01/2024. Di tŭ git gŏ ală jơnau cih tŭ lơh jat gơbàn kòl yan, kal ke, ờ ring bal, gơ tàm rơndap rơndồl, ờ dipal nàng tam gơl, bơ tơl jat gơnăp gơnoar halà sồr tam gơl, bơ tơl, ai tơlik pa sră nggal pơlam lơh jat jơnau cih adat boh lam, yal mờ Quôk hội bè cồng nha sền sơ wì tàm pơrjum dơ̆ 6 (geh lơh tàm nhai 10 nam 2023). Lơh sir tơngume adat boh lam bè bơsong kơnòl mờ lơh glài kràñ, di tŭ ală mpồl bal, cau dùl nă să lời gơlik geh broă lơh tìs tàm broă lơh, ai tơlik sră nggal pơlam lơh jat jơnau cih adat boh lam”.

Gơ wèt mờ ală anih lơh broă bơh Quôk hội dê, Củ tịc Quôk hội tơngkah pal pơn jat tai tơnguh bơta rơcang lài, geh kơ nòl bơh Ủy ƀan Thường vụ Quôk hội, ală anih lơh broă bơh Quôk hội dê tàm broă jat sền, sồr lơh mờ sền sơ wì Cíñ phủ, ală anih lơh broă, mpồl lơh broă geh gơ rềng lam lơh jat ală adat boh lam, nghị quyết bơh Quôk hội dê. Rơcang lài pơgồp bal jơh nùs mờ ală anih lơh broă geh gơ rềng tàm tŭ rơcang cih, sền sơ wì, tam gơl rơndap lơh adat boh lam, nghị quyết; gròi sền broă lơh jat nền nòn jơnau sồr “jơnau rơcang cih sră nggal cih mùl màl pal geh rơcang lài mờ yal dơ̆ lĕ bal mờ rơndap lơh adat boh lam, kơrnuat boh lam”.

Ală mpồl kwang bàng Quôk hội mờ ală kwang bàng Quôk hội pơn jat tai sơlơ tơnguh jat sền broă lơh jat adat boh lam, ngui ală adat boh lam, nghị quyết bơh Quôk hội dê tàm kâp hơ đơm; Hội đồng Ñân zân mờ Ủy ƀan Ñân zân ală kâp, ngan là tàm ală tiah lơh tơrlòng lài jat ală nghị quyết bơh Quôk hội dê pal pơn jat tai tơnguh bơta rơcang lài, geh kơnòl mờ bơceh lơh, ngac ngar tàm broă lam lơh jat jơnau cih adat boh lam tàm kâp hơ đơm.

Củ tịc Quôk hội ồng Vương Đình Huệ đơs nền, broă lam lơh Pơrjum bè broă lơh jat ală adat boh lam, nghị quyết bơh Quôk hội dê là dùl bơta pa tàm broă lơh bơh Quôk hội khoă XV dê. Bơh cồng nha dơ̆ pơrjum dê, Cíñ phủ, ală anih lơh broă geh gơnoar, gơnoar atbồ tàm ƀòn lơgar kơlôi sơnơng, lam lơh ală pơrjum halà broă lơh dipal nàng kờñ pơlam lơh jat tơngume ngan ngồn bơh ală adat boh lam, nghị quyết bơh Quôk hội ai tơlik gơ wèt kơnòl lam lơh jat halà gơ rềng tơn tus anih lơh broă, mpồl lơh broă, ù tiah ƀòn lơgar he dê: “Pơlam lơh jat jơnau cih tàm Nghị quyết sồ 27 “Gơnăp gơnoar dà lơgar là ring bal, geh tam pà loh làng, pơgồp bal jơh nùs, gròi sền geh cồng nha”, añ pin dờn là, bơta lòt bal geh kơnòl, rơcang lài, geh cồng nha mờ jat sền nền nòn bơh Quôk hội dê, bal mờ pràn jak mờ bơta pơn đơl pràn lơh ngan lơh jat adat boh lam dùl bă jơh nùs, bơceh lơh bơh Cíñ phủ dê, bơta pơgồp bal jơh nùs bơh ală anih lơh broă dê, bè geh ai tơnggŏ loh làng ngan bơh cồng nha Pơrjum dơ̆ do dê rơp là bơnàng jă kuơmàng ngan nàng lam lơh “đơng pơlam dà lơgar tam gơl pa, geh cồng nha”, pơgồp bơnah nàng broă lam lơh jat adat boh lam, nghị quyết rơp geh ală bơta tam gơl loh làng, lơh geh uă cồng nha niam rlau tàm tơngai tus, drơng jơnau kờñ bơtàu tơnguh bơh dà lơgar dê, bơta gơn kơnờm mờ bơta pin dờn bơh ală kwang bàng Quôk hội, cau tĕ khà mờ làng bol dê”.