Ai jơnau đơs tàm Nghị quyết pơgồp bal đah Ủy ƀan Thường vụ Quôk hội mờ Mpồl Củ tịc Ủy ƀan Mặt trận dà lơgar (hòi lơyah là nghị quyết sồ 525) bè broă tìp mat cau tĕ khà bơh kwang bàng Quôk hội dê, ală kwang bàng đơs loh geh bơta “kwang bàng lòt tìp mat cau tĕ khà mơya mìng nggui iat lơm”. Kwang atbồ Mpồl lơh broă bơta kơp kờñ làng bol ồng Dương Thanh Bình pà git, bơh 10 nam lơh jat Nghị quyết sồ 525, uă kwang bàng Quôk hội neh rơcang lài, jơh nùs lơh jat broă tìp mat cau tĕ khà mờ uă broă lơh krơi is; tơrgùm, kơlôi sơnơng mờ yal uă jơnau dan, jơnau đơs bơh cau tĕ khà dê pơyua tus ală anih lơh broă, mpồl lơh broă geh gơnoar bơsong. Bulah bè hơ̆, Phó Củ tịc Quôk hội ồng Trần Quang Phương đơs loh, bơta geh ngan pal tam gơl bè tơngume, kung bè cau tìp mat cau tĕ khà, pal gròi sền là geh bơta “kwang bàng lòt tìp mat cau tĕ khà mơya mìng nggui iat lơm”: “Tìp mat cau tĕ khà tŭ do jat bơta là “cau ala mat cau tĕ khà”, ndrờm bè cau tĕ khà là geh pồ bơh kwang bàng, công chức ală kâp, ală gah broă lơh bơh xã dê; 2, 3 nă oh mi kwang bàng dờng sơnam, jơh sơnam rê rlô lơh broă geh bơngă pin dờn, gam dùl bơnah dùl êt là ală cau ndai. Broă lơh tìp mat geh uă bơta: tìp mat sùm, tìp mat mìng dùl tơngume, tìp mat pờ tơlik tơn tàm internet, tìp mat tơn… den pal sùm tam gơl pa. Bơta tơrgùm jơnau đơs, jơnau dan cau tĕ khà dê, bơsong mờ hơ jơnau đơs, jơnau dan, jat sền broă bơsong jơnau hơ hơ̆”.

Ai Phó Củ tịc Quôk hội ồng Nguyễn Khắc Định den đơs dùl bơta geh ngan ndai: “Geh càr lòt jat mpồl kwang bàng tus mpồl tĕ khà mờ lòt bal sùm jơh gùt tơngai lơh broă. Bè hơ̆ den 3 nă Kwang bàng tơlik mat tĕ khà tàm 3 kơnhoàl den sùm tàm pơ dờn gơp tàm 3 kơnhoàl hơ̆. Dùl nă kwang bàng đơs mblàng lơh loh, dùl nă cau geh gơnoar broă lơh dềt rlau, geh tŭ mìng nggui bơh chờm tus tŭ jơh. Ai kwang bàng geh gơnoar broă dờng ngan rlau jơh den đơs, cih dờp, mblàng lơh loh. Bè hơ̆ den tàng geh bơta kwang bàng lòt tìp mat cau tĕ khà mơya mìng nggui iat, do là dùl bơta geh ngan”.

Ală kwang bàng sồr ală tiah geh gal kwang bàng Quôk hội pal tam pà gơs uă mpồl nàng geh khà mờ dơ̆ tìp mat cau tĕ khà uă rlau. Bal mờ hơ̆, tàm dơ̆ tìp mat cau tĕ khà uă ngan tơrgùm tàm ală tơngume bè rài kis, bơsram sră, lơh broă, ù tiah… ală broă gơ wèt gơnăp gơnoar kâp hơ đơm dê, geh gơ rềng tơn tus bơta kuơ cau tĕ khà dê. Bè hơ̆ den tàng uă broă pal geh kwang đơng lam bồ kâp hơ đơm tus bal mờ dơ̆ tìp mat cau tĕ khà nàng cih dờp ală jơnau đơs, ală broă gơ wèt gơnăp gơnoar he dê.

Tàm pơrjum, Củ tịc Quôk hội ồng Vương Đình Huệ đơs nền: Kwang bàng Quôk hội là cau ala mat ai bơta kơp kờñ bơh làng bol dê tàm mpồl pồ he mờ ala mat ai làng bol gùt lơgar in, kong kơnòl tềng đap cau tĕ khà mờ tềng đap Quôk hội. Den tàng, broă tìp mat cau tĕ khà ờ mìng tàm mpồl tĕ khà mờ gam tàm anih lơh broă, tiah lơh broă tai: “Tàm tơl khà kwang bàng Quôk hội kung đơs là, kwang bàng pal sùm tàm yal jơnau nền nòn mờ làng bol, iat jơnau đơs làng bol dê, geh làng bol pin dờn. Adat Rơndap lơh Quôk hội tam gơl nam 2020 geh đơs: Kwang bàng Quôk hội pal sùm tìp mat cau tĕ khà, jòi git bơta kơp kờñ cau tĕ khà dê. Kwang bàng Quôk hội den tìp mat cau tĕ khà jat broă lơh tìp mat cau tĕ khà bơh mpồl kwang bàng Quôk hội dê là dùl bơta. Bơta dơ̆ 2 là tìp mat cau tĕ khà tàm tiah ơm kis mờ tiah lơh broă. Nghị quyết tus do kung pal đơs loh bơta do, broă lơh bè lơi hơ̆ sồng geh jơnau pơlam mùl màl”.

Ủy ƀan Thường vụ Quôk hội ring bal broă tam gơl, bơ tơl Nghị quyết sồ 525, tơmut tàm broă lơh lơh Nghị quyết bơh Ủy ƀan Thường vụ Quôk hội dê, jàu ai Ƀan bơta kơp kờñ làng bol in đơng lam pơgồp bal mờ ală anih lơh broă geh gơ rềng nàng lơh Nghị quyết jat di jơnau sồr bơh adat boh lam dê.

Kung tàm dơ̆ pơrjum do, Ủy ƀan Thường vụ Quôk hội sền sơ wì jơnau yal lơh broă bơta kơp kờñ làng bol bơh Quôk hội dê nhai 5 mờ nhai 6 pa do. Củ ñiệm Ủy ƀan sền gàr adat boh lam mò Lê Thị Nga đơs bơta geh ngan mè bèp kơnòm bơsram sap sèng gùt mang nàng tong sră dan bơsram kòn in mut ơdŭ 10, hơ̆ là dùl bơta kơn jơ̆ gơ wèt mờ kơnòm bơsran: “Bơta kơn jơ̆ gơ wèt mờ kơnòm bơsram pơrlòng mut ơdŭ 10 tàm Hà Nội, ƀòn dờng Hồ Chí Minh là bơta geh ngan tàm uă nam. Pơrlòng mut ơdŭ 10 tŭ do gam kal ke rlau mờ pơrlòng mut Đại họk. Geh halà là ờ bơta bol he ờ tơl uă ngan hìu bơsram dà lơgar kâp 3 mờ bơta geh ngan do pal bơsong bè lơi. Cíñ phủ neh sồr Ƀộ Giáo zụk mờ Đào tạo, den bol hi sồr pal tơmut tai tơngume do tàm jơnau yal bè broă lơh bơta kơp kờñ làng bol”.