Dùl tàm ală broă geh cau tĕ khà An Giang sền gròi hơ̆ là bơto bơtê mờ bơsram. Uă cau tĕ khà sền gròi ngan tus cồng nha bơto bơsram, ngan là gơ wèt mờ broă tam gơl pa bơto bơsram tàm tơngai lài. Uă jơnau đơs đơs là, tơngai lài, broă tam gơl pa bơto bơsram neh cèng wơl 2, 3 cồng nha bơh sơn rờp, cồng nha mờ bơta niam bơto bơsram 3 kâp neh geh tam gơl jat gùng dà tơnguh bơta niam, tơrmù ƀà bơta kơn jơ̆ bè điểm bơsram.

Gơ wèt mờ bơto bơsram 3 kâp, uă cau tĕ khà đơs là: broă lơh niam wơl, tam gơl pa bơto bơsram tŭ do neh mờ gam ai gŏ uă bơta ờ niam; tơngume bơto bơsram 3 kâp pa tŭ do tàm ală hìu bơsram, ală kâp bơsram ờ hềt geh bơta niam mờ ờ ndrờm bal; sră măi ờ geh bơta tàm pơ dờn, ờ mìng lơh gơlik bơta kơn jơ̆ bè priă jền ai mè bèp kơnòm bơsram in, mờ gam lơh hoàc huơr priă jền mpồl bơtiàn dê tai. Bơdìh hơ̆ tai, ală kơnòm bơsram gam ờ hềt geh anih nhơl ñŏ geh kuơ… Khà kơnòm bơsram tàm ală ơdŭ bơsram gam uă ir, bơh hơ̆ lơh gơbàn bơta ờ huan geh bơta sền gròi đah cau pơgru mờ kơnòm bơsram, den tàng bơta niam bơto bơsram  ờ hềt lơh geh jat bơta kơp kờñ. Cau tĕ khà Nguyễn Văn Tùng, ơm tàm thị trấn Vĩnh Bình, kơnhoàl Châu Thành đơs là: “Kơnòm bơsram tŭ do, jơh 50% broă bơsram niam chài boh bơr là ờ huan geh. Añ dan mờ Quôk hội, gah bơto bơsram pal geh tơngume, broă rơndap lơh tơnguh broă bơto bơtê niam chài boh bơr lài, bơsram nùs tồr kòn bơnus dê lài, nàng tơnơ̆ do ală oh gơ gơs cau ờ mìng jak chài mờ gam geh nùs nhơm niam tai. Broă tam gơl tơngume sră măi, ală cau kơlôi sơnơng, cau jak chài, tiến sĩ neh sền sơ wì, jòi git nàng cih gơs dùl pang sră kờñ mblàng wơl niam chài ai cau kơnòm să in, mơya bơsram mìng dùl nam là sang tĕ, bè hơ̆ den hoàc huơr ir mè bèp, ồng mò in. Den tàng, añ dan Quôk hội, gah bơto bơsram mìng cih dùl pang sră, mơya pang sră hơ̆ pal geh ngui jŏ jòng”.

Bè gah lơh sa suơn sre, cau tĕ khà đơs là, giă phơng sih, phan ngui lơh broă suơn sre sùm gơguh jơnhua, tàm tŭ giă kòi mờ ală bơta phan lơh gơs bơh suơn sre den tam gơl sùm. Cau tĕ khà An Giang dan Cíñ phủ pal gờñ geh broă lơh tơrbŏ bal, tac phan lơh gơs bơh suơn sre dùl bă kơ̆ kơljap mờ jŏ jòng sùm, nàng làng bol lơh broă sa gơtùi lơh pas bơh lŏ sre he dê. Bơdìh hơ̆ tai, broă bơtàu tơnguh lơh sa suơn sre jat gùng dà lơh bal, ngan là lơh bal đah làng bol lơh broă sa mờ mpồl lơh sa kă bro tŭ do gam ờ hềt kơ̆, ờ geh bơta tàm tơrbŏ bal, den tàng ờ hềt gơtùi ngui niam cồng nha bơh broă lơh bal dê, làng bol lơh broă sa ờ hềt geh dờp kuơ bơh ală broă lơh lơh bal tŭ do. Cau tĕ khà Trần Văn Đức, xã Vĩnh Chánh, kơnhoàl Thoại Sơn, càr An Giang geh jơnau đơs: “Cau lơi kung git, tiah ring dà dờng Cửu Long là tiah lơh kòi uă ngan rlau jơh gùt lơgar, mờ An Giang là tiah tờm bơh tiah ring dà dờng Cửu Long dê, mơya tŭ do bơta tơnhàu geh uă tac ờ yòm sùm gơlik geh, tàm tơngai giă kòi gơmù lơyah, jơh kàl den giă gơguh kas. Tàm xã kung hòi jà làng bol tam gơl chi tam, phan ròng, mơya mùl màl tam biap, khoah rơbài uă, mơya ờ git tac tềng lơi. Kòi den tac ờ yòm, phan lơh gơs bơh suơn sre tac ờ jơh mơya giă phơng den gơguh. Dan Cíñ phủ mờ ală Ƀộ, gah broă lơh dà lơgar geh gùng dà dong kờl làng bol in lơh sa suơn sre bơh tiah ring dà dờng Cửu Long dê, mờ kuơmàng là An Giang”.

Bè bơta do, Phó Củ tịc lơgar mò Võ Thị Ánh Xuân đơs là, An Giang mờ bơta ƀuơn là dùl càr geh bơta pràn tàm bơtàu tơnguh lơh sa suơn sre, kwang đơng lam bồ càr An Giang, kơnhoàl Châu Thành pal pơn jat tai kơlôi sơnơng, git tŭ niam, ngui bơta pràn mùl geh nàng bơtàu tơnguh gah lơh sa suơn sre gàr bơta sơrbac mhar, geh cồng nha mờ kơ̆ kơljap, lơh gơlik bơta kuơ gơguh uă jơnhua rlau, nàng làng bol lơh broă sa gơtùi lơh pas bơh gar kòi he lơh gơlik: “Gơrềng tus broă lơh sa suơn sre. Añ gŏ là tus tŭ do, ală gùng dà, broă lơh bơh Đảng, dà lơgar, kờp bal mờ priă jền, kờp bal mờ broă lơh… ndrờm bè neh geh, tŭ do mìng gam broă là bol he lam lơh bè lơi, bol he mblàng broă lơh do tàm làng bol bè lơi nàng làng bol lơh broă sa brồ guh lơh sa suơn sre, geh gơnoar broă lơh tờm gar phe he dê; kờñ gơtùi lơh tờm den pal geh bồ tơngoh kơlôi sơnơng bơh cau lơh tờm dê. Kơp kờñ là làng bol lơh broă sa bal mờ gơnoar atbồ tàm ƀòn lơgar kơlôi sơnơng bal nàng tơnguh rơhời gơnoar broă bơh cau lơh sa suơn sre dê.  Bè bơto bơsram: broă tam gơl pa pal geh dùl rơndap broă tam gơl, den ngan là bol he pal kong dùl tŭ tơngai tam gơl, jơh tŭ tơngai hơ̆ den rơp kơ̆ kơljap wơl”.

Jat Phó Củ tịc lơgar mò Võ Thị Ánh Xuân đơs, ală broă cau tĕ khà đơs tus kung là ală bơta kơlôi rơcang bơh kwang đơng lam bồ Đảng, Cíñ phủ, Quôk hội mờ kâp hơ đơm dê. Mpồl kwang bàng Quôk hội càr An Giang cih dờp ală jơnau dan bơh cau tĕ khà dê mờ bơh bơta geh ngan broă lơh rơp pơn jat tai geh ală jơnau dan tàm tơl dơ̆ cribơyai dipal.